މާލެއިން ރަށްރަށަށް ދިއުމުގެ އުސޫލާ ހިލާފަށް ކުޅުދުއްފުށީ ސިޓީއަށް ދިޔަ ފުލުހަކު ކަރަންޓީނުވާން އަންގައިފި އެވެ.
ކޮވިޑް ފެތުރިފައި އޮތް، މާލޭން މީހުން ދިރިއުޅޭ ރަށަކަށް ދަތުރުކުރާ ނަމަ، ހެލްތު މިނިސްޓްރީގައި ޕޯޓަލް މެދުވެރިކޮށް އެ ރަށެއްގެ ކައުންސިލްގެ ހުއްދަ ނަގަން ޖެހެ އެވެ. އަދި، ކަރަންޓީނުވާން ޖެހޭ ތަނުގެ މައުލޫމާތު ވެސް ކައުންސިލަށް ފޯރުކޮށްދޭން ޖެހެ އެވެ.
ވެކްސިންގެ ދެ ޑޯޒް ހަމަކޮށް، ދެ ހަފުތާވެފައިވާ މީހުންނަށް ކަރަންޓީނުވެ، ރަށްރަށަށް ދެވޭ އުސޫލު މިހާރު އޮތް ނަމަވެސް އެ ފުރުސަތު ވެސް ލިބެނީ ޕޯޓަލް މެދުވެރިކޮށް ރަޖިސްޓްރީވެ އެކަން ކައުންސިލަށް އެންގުމުންނެވެ.
ކުޅުދުއްފުށީ ސިޓީ ކައުންސިލްގެ ރައީސް އަބްދުލްލަތީފް "އަދަދު"އަށް ވިދާޅުވީ، ރަށަށް ދިޔުމުގެ އުސޫލާ ހިލާފަށް އިއްޔެ ކުޅުދުއްފުށީ އެއާޕޯޓަށް ދިޔަ މީހަކު ހިފަހައްޓައި، ކަރަންޓީނުކޮށްފައިވާ ކަމަށެވެ. އެމީހާއަކީ ކުޅުދުއްފުއްޓަށް ނިސްބަތްވާ ފުލުހެކެވެ.
އެޗްޕީއޭގެ ގައިޑްލައިންތަކާ ހިލާފުވާ މީހުންނަށް ފިޔަވަޅު އަޅައި ޖޫރިމަނާކުރުމުގެ އިހްތިޔާރު ކައުންސިލަށް ވަނީ ދީފަ އެވެ. އެގޮތުން އއ. މަތިވެރީގައި ޕޮޒިޓިވްވެފައިވާ ބަޔަކު ބޭރަށް ނުކުމެ އުޅުނު މައްސަލާގައި ބޮޑު ޖޫރިމަނާއެއް ކޮށްފައިވާއިރު އުސޫލުން ބޭރުން ރަށްރަށަށް އެރި މައްސަލާގައި މީހުން ހައްޔަރުކޮށްފައި ވެސް ވެ އެވެ.
އުސޫލާ ހިލާފުވުމުގެ މައްސަލައެއް އިއްޔެ އެ ސިޓީން ދިމާވެފައިވީ ނަމަވެސް، ލަތީފް ވިދާޅުވި ގޮތުގައި އެ ސިޓީއަށް އަންނަ މީހުންނާއި ރައްޔިތުން އެޗްޕީއޭގެ ގައިޑްލައިންތަކަށް ވަރަށް ބޮޑަށް އަމަލު ކުރެ އެވެ.
"މިހާ އާބާދީ ބޮޑު ރަށެއްގައި މިވަރަށް ބަލިން ރައްކާތެރިވެފައި މި އޮންނަނީ ގިނަ ބަޔަކު ގައިޑްލައިންތަކަށް އަމަލު ކުރަމުންދާތީ،" ލަތީފް ވިދާޅުވި އެވެ.
އުތުރުގެ ގިނަ ރަށްރަށުގެ މީހުން މިހާރު މާލޭން ރަށަށް ދިޔުމަށް އިހްތިޔާރުކުރަނީ ކުޅުދުއްފުށީ އެއާޕޯޓުން ކަމުން، އެ އެއާޕޯޓަށް ކޮންމެ ދުވަހަކު ވެސް ގިނަ ބަޔަކު ދަތުރުކުރެ އެވެ.
ލަތީފް ވިދާޅުވި ގޮތުގައި އެ ސިޓީއަށް ކޮންމެ ދުވަހަކު ވެސް އުސޫލުގެ ތެރެއިން 10-15އާ ދެމެދުގެ މީހުން ދެ އެވެ. އެ އެންމެން ވެސް ކަރަންޓީނުވުމާއި ރަށްރަށަށް ދިޔުމުގެ ކަންކަން ބަލަހައްޓަނީ އެ ސިޓީގެ ކޮވިޑް ޓާސްކުފޯހުންނެވެ.
