އޭޑީކޭ ހޮސްޕިޓަލުގައި ވިހެއުމުގެ ތެރޭގައި ސަލްމާ ނަސީރު މަރުވުމުގައި އެ ހޮސްޕިޓަލުގެ މުވައްޒަފުންތަކެއްގެ އިހުމާލު އޮތް ކަމަށް ތުހުމަތުކުރާ މައްސަލަ ތަހުގީގުކޮށްދޭން އެދި ފުލުސް އޮފީހަށް މިއަދު ހުށަހަޅައިފި އެވެ.
މިދިޔަ ފެބުރުއަރީ މަހުގެ ތެރޭގައި ސަލްމާ މަރުވި މައްސަލަ ހެލްތު މިނިސްޓްރީން ވެސް ބެލި އެވެ. ތަހުގީގު ރިޕޯޓުގައި މިނިސްޓްރީން ބުނެގައި ވަނީ ވިހެއުމާ ގުޅިގެން ގިނަ އަދަދެއްގެ ލޭ ސަލްމާގެ ހަށިގަނޑު ބޭރުވި ނަމަވެސް އޭނާގެ ގަޔަށް ލޭ އަޅާފައި ވަނީ ވިހެއިތާ ތިން ގަޑިއިރު ފަހުން ކަމަށެވެ.
ސަލްމާގެ ހަށިގަނޑުން ލޭ ފޭބީ ވަޒަންކުރެވުނު ވަރަށް ވުރެން ގިނައިން ކަމަށާއި އޭރު ލޭ ދޭނެ ދެ މީހަކު ކްރޮސްމެޗް ހެދި ނަމަވެސް އެ މީހުންގެ ގައިން ލޭ ނަގައި އަޅަން ތައްޔާރުވެފައި ނުވާ ކަމަށް މިނިސްޓްރީން ބުނެފައިވެ އެވެ.
މި މައްސަލަ ތަހުގީގުކޮށްދޭން ފުލުހުންނަށް ހުށަހެޅީ ސަލްމާގެ ފިރިމީހާ އިބްރާހީމް އަދުހަމްގެ ފަރާތުން އެޑްވޮކަސީ ޗެމްބާސްއިންނެވެ.
އެތަނުން މިރޭ ނެރުނު ބަޔާނުގައި ބުނީ ސަލްމާގެ މަރާ ގުޅިގެން ހެލްތު މިނިސްޓްރީއަށް ހުށަހެޅި ޝަކުވާއާ ގުޅިގެން ކަން ހިނގި ގޮތް ބަލައި އެ މިނިސްޓްރީން ފޮނުވި ސިޓީގައި ބަލިމީހާއަށް ފަރުވާދޭން އެކަށީގެންވާ ވަރަށް ތައްޔާރުވެފައި ނުވާ ކަން ފާހަގަކޮށްފައި އޮތް ކަމަށެވެ. މީގެ އިތުރުން ސަލްމާގެ މަރުގައި އޭޑީކޭ ހޮސްޕިޓަލުގެ އިހުމާލު އޮތް ކަމަށް އާއިލާ އިން ގަބޫލުކުރާ ކަމަށް ވެސް ބަޔާނުގައިވެ އެވެ.
އެ ލޯފާމުން އެދުނީ ޖިނާއީ މައްސަލައެއްގެ ގޮތުގައި އެކަން ތަހުގީގުކޮށް، އެކަމުގައި ހިމެނޭ ބިދޭސީ މުވައްޒަފުން ރާއްޖެ އިން ފުރައިގެން ދިޔަ ނުދޭން ތަހުގީގު ނިމެންދެން ޕާސްޕޯޓް ހިފަހައްޓައިދޭށެެވެ.
"ސަލްމާގެ ނަސީރު ނިޔާވި ހާދިސާއާ ގުޅިގެން އެ ފަރާތުގެ މެޑިކަލް ރެކޯޑްސް ހޯދުމަށް އަޅުގަނޑުމެން ކުރި މަސައްކަތުން އެ ލިއުންތައް އޭޑީކޭ ހޮސްޕިޓަލްގެ ފަރާތުން މިހާތަނަށް ފޯރުކޮށްދީފައި ނުވާ ކަން ފާހަގަކުރެވެ އެވެ،" ބަޔާނުގައިވެ އެވެ.
ސަލްމާގެ ގަޔަށް ލޭ އެޅުމުގައި ލަސްވި ކަމުގެ ތުހުމަތު އޭޑީކޭ އިން ދޮގު ކުރެ އެވެ.
އެ ހޮސްޕިޓަލުގެ މެނޭޖިން ޑިރެކްޓަރު، އަހުމަދު އަފްއާލް ވިދާޅުވެފައި ވަނީ އެ މައްސަލާގައި ހެލްތު މިނިސްޓްރީއާ ބައްދަލުކޮށް އެ މިނިސްޓްރީގެ ހޯދުންތަކަށް އިންކާރު ކޮށްފައިވާ ކަމަށެވެ.
މިނިސްޓްރީން ބުނެފައި ވަނީ މާބަނޑު މީހުންނަށް ބޭނުންވާ ހުރިހާ ވަސީލަތްތަކާއި އެހީތަކާ އެކު ވެސް، ވިހެއުމުގެ ތެރޭގައި ގަދައަށް އަދި މެދުކެނޑުމެއް ނެތި ލޭ އައިސް، މަރުވުމަކީ ވެދާނެ ކަމެއް ކަމަށެވެ. އެކަމަކު ވިހެއުމުގެ ތެރޭގައި ދިމާވެދާނެ ހާލަތަކަށް ފުރިހަމައަށް ތައްޔާރުވެފައި އޮތުމަކީ ސިއްހީ ފަރުވާ ދޭ ތަންތަނުން ކުރަން ޖެހޭނެ ކަމެއް ކަން ތަހުގީގު ރިޕޯޓުގައި ފާހަގަކޮށްފައިވެ އެވެ.
ވިހެއުމަށްފަހު ލޭ ފައިބާތީ އޭގެ ސަބަބު ދަނެގަތުމަށް މަސައްކަތްކޮށް ލޭ މަނާ ކުރުމަށް އޭޑީކޭގެ ޑޮކްޓަރުން ބޭސް ދީފައިވެ އެވެ. އަދި ސަލްމާގެ ފުރާނަ ސަލާމަތް ކުރަން ރަހިމު ނަގަން ޖެހިދާނެކަން އާއިލާއަށް ޑޮކްޓަރުން އެންގި އެވެ. ސަލްމާ ގަޔަށް ލޭ އަޅާފައި ވަނީ އޭގެ ވެސް އެއް ގަޑިއިރު ފަހުންނެވެ.
ހެލްތު މިނިސްޓްރީގެ ތަހުގީގުން އެނގުނީ ސަލްމާ ހަށިގަނޑުން ލޭ ބޭރުވެފައިވާ މިންވަރު އޭޑީކޭގެ ލިޔެކިޔެމުން ފެންނަން ވެސް ނެތް ކަމަށެވެ.
ސަލްމާގެ މަރުގެ މައްސަލައިގައި ކޯޓަށް ދާން ވެސް އާއިލާ އިން ވަނީ ނިންމައިފަ އެވެ.
