މެރިން ޕޮލިސްގެ ކުރީގެ ވެރިޔާ، އިބްރާހީމް އަދްނާނު އަނީސް ފުލުހުންގެ ވަޒީފާއަށް އަލުން ނުކުންނަވައިފި އެވެ.
އޭނާއަކީ، 2012 ވަނަ އަހަރު ތުހުމަތުތަކެއްކޮށް ފުލުހުންގެ މަގާމުން ވަކިކުރި ބޭފުޅެކެވެ. އެގޮތުން އޭނާއަށް ކޮށްފައިވަނީ "ފުލުހުންނާއި ސިފައިން ހިންގި ބަގާވާތު"ގެ ނަމުގައި އެމްޑީޕީން ނެރުނު ރިޕޯޓެއްގައި އެކުލަވާލުމުގައި ބައިވެރިކަމުގެ ތުހުމަތެވެ.
އެ މައްސަލާގައި އޭނާ ވަޒީފާއިން ވަކިކުރީ ގަވައިދާ ހިލާފަށް ކަމަށް ބުނެ، ސިވިލް ކޯޓަށް މައްސަލަ ހުށަހެޅުމުން އެ ކޯޓުން ނިންމީ، ވަޒީފާއިން ވަކިކުރީ ގޯސްކޮށް ކަމަށެވެ. ނަމަވެސް، ހައިކޯޓުން އެ ހުކުމް ބާތިލްކުރި އެވެ.
އެ މައްސަލާގައި އަދުނާން އަނީސް، ސުޕްރީމް ކޯޓަށް ދިޔުމުން އޭނާއަށް ކާމިޔާބުވި އެވެ. ސަރުކާރު ބަދަލުވެ، ރައީސް އިބްރާހިމް މުހައްމަދު ސޯލިހުގެ ވެރިކަމުގައި، ދައުލަތުން ވެސް ވަނީ އަދުނާން ވަޒީފާއިން ވަކިކޮށްފައިވަނީ ގޯސްކޮށް ކަމަށް ސުޕްރީމް ކޯޓުގައި އެއްބަސްވެފަ އެވެ.
ސުޕްރީމް ކޯޓުން މައްސަލާގައި ކުރި ހުކުމްގައި ބުނެފައިވަނީ، އަދުނާން އަނީސް ވަޒީފާއިން ވަކިކުރުމުގައި ފުލުހުންގެ ޑިސިޕްލިނަރީ ބޯޑުން ރިއާޔަތްކުރި ހެކިތައް އެނގެން ނެތް ކަމަށެވެ. ފުލުހަކު ވަޒީފާއިން ވަކި ކުރެވޭނީ ގާނޫނާއި ގަވާއިދާ ހިލާފު ކަމެއް ކުރިކަން ތަހުގީގަކަށް ސާބިތުވެ، އެއީ އެމީހަކު ވަކިކުރަން އެކަށީގެންވާ ސަބަބެއް އޮތް ހާލަތުގައި ކަމަށް ހުކުމްގައިވެ އެވެ.
އަދުނާން ވަޒީފާއިން ވަކިކުރި ގޮތް ގޯސް ކަމުގައިވީ ނަމަވެސް އަލުން ވަޒީފާ ދިނުމަށާއި މުސާރަތައް ނަގައިދިނުމަށް ހުކުމްކޮށްފައެއް ނުވެ އެވެ. އެގޮތަށް އަމުރުކޮށްފައިނުވަނީ، މުސާރަ އަލުން ނަގައިދިނުމަށާއި ވަޒީފާ ހޯދުމަށް އޭނާ ދަށު ކޯޓުގައި އެދިފައިނެތުމުންނެވެ.
ނަމަވެސް، އިއްޔެ އޭނާ ވަނީ ފުލުހުންގެ ވަޒީފާއަށް ނުކުންނަވާފަ އެވެ. އެކަމަކު، އޭނާ ނުކުންނެވީ ކޮން މަގާމަކަށް ސާފެއް ނޫނެވެ.
މިހާރު ކޮމިޝަނާ އޮފް ޕޮލިސް މުހައްމަދު ހަމީދަކީ ވެސް 2012 ވަނަ އަހަރު އަދުނާން އަނީސްއެކޭ އެއްގޮތަށް އެ މައްސަލައިގެ ތެރެއިން ވަޒީފާއިން ވަކިކުރި ބޭފުޅެކެވެ. ނަމަވެސް އާ ސަރުކާރު ވެރިކަމަށް އައުމާއެކު، ހަމީދުގެ ވަޒީފާ އަލުން ދިނުމަށް ސުޕްރީމް ކޯޓުން ހުކުމްކޮށްފައިވެ އެވެ.
