ލޯކަލް ގަވަމެންޓް އޮތޯރިޓީ (އެލްޖީއޭ)ގެ ބޯޑުގެ މޭޔަރުންގެ ގޮނޑިއަށް މާލޭ ސިޓީ މޭޔަރު ޑރ. މުހައްމަދު މުއިއްޒާއި ފުވައްމުލައް ސިޓީގެ މޭޔަރު އިސްމާއިލް ރަފީގު ކުރިމަތިލެއްވުމުން ވާދަވެރިކަން ބޮޑުވެއްޖެ އެވެ.
ލޯކަލް ކައުންސިލްގެ ގާނޫނަށް ގެނެސްފައިވާ އިސްލާހާ ގުޅިގެން އެލްޖީއޭގެ ބޯޑުގައި ސިޓީ ކައުންސިލަރުންގެ ތެރެއިން މެންބަރަކާއި ރަށު ކައުންސިލަރުންގެ ތެރެއިން މެންބަރެއް އަދި، އަތޮޅު ރައީސުންގެ ތެރެއިން މެންބަރެއް އިންނަވަން ޖެހެ އެވެ.
އެގޮތުގެ މަތިން، އެ މަގާމުތަކަށް ކުރިމަތިލާން އިލެކްޝަން ކޮމިޝަނުން ހުޅުވާލުމުން އެލްޖީއޭ ބޯޑުގެ ސިޓީ ކައުންސިލަރުންގެ ގޮނޑިއަށް ކުރިމަތިލައްވާފައިވަނީ ޕީޕީއެމްއަށް ނިސްބަތްވާ މުއިއްޒު އަދި އެމްޑީޕީއަށް ނިސްބަތްވާ ރަފީގެވެ.
މި ދެ ބޭފުޅުންގެ މެދުގައި އިންތިހާބު ކުރިއަށް ގެންދަން ނިންމާފައިވާއިރު އެ އިންތިހާބުގައި ވޯޓު ދޭނީ ސިޓީ ކައުންސިލުތަކުގެ މެންބަރުންނެވެ.
ހަތަރު ސިޓީ ކައުންސިލުގެ ތެރެއިން މާލޭ ސިޓީ ކައުންސިލްގެ މެޖޯރިޓީ ޕީޕީއެމްއަށް އޮތްއިރު އައްޑޫ ސިޓީގެ މެޖޯރިޓީ ވަކި ޕާޓީއަކަށް ނެތެވެ. ކުޅުދުއްފުށީ ސިޓީ ކައުންސިލްގެ ފުލް މެޖޯރިޓީ އެމްޑީޕީއަށް އޮތްއިރު ފުވައްމުލައް ސިޓީ ކައުންސިލްގެ މެޖޯރިޓީ ވެސް އޮތީ އެމްޑީޕީއަށެވެ.
އިލެކްޝަން ކޮމިޝަނުން މިއަދު، ކެންޑިޑޭޓުންގެ ނަންތައް އިއުލާންކޮށްފައިވާއިރު އަންނަ މަހުގެ 12 ވަނަ ދުވަހު އިންތިހާބު ބޭއްވުމަށް ވަނީ ނިންމާފަ އެވެ.
އެލްޖީއޭގެ ބޯޑުގެ ރަށު ކައުންސިލަރުންގެ ގޮނޑިއަށް ކޮމިޝަނުން އާންމުކޮށްފައިވާ ގޮތުން ހަތް ކައުންސިލަރަކު ވާދަކުރެ އެވެ. އެއީ، އެމްޑީޕީގެ ފަސް ކައުންސިލަރުންނާއި ޕީޕީއެމްގެ އެއް ކައުންސިލަރަކު އަދި އަމިއްލަ ގޮތުން އިންތިހާބުވެ ހުރި ކައުންސިލަރެކެވެ.
އިލެކްޝަން ކޮމިޝަނުން ހާމަކޮށްފައިވާ ގޮތުގައި، އަތޮޅު ރައީސްގެ ގޮނޑިއަށް އިންތިހާބަކާ ނުލައި، ޕީޕީއެމްއަށް ނިސްބަތްވާ ކ. އަތޮޅުގެ ރައީސް އަހުމަދު ނިމާލު ވަނީ ހޮވިފަ އެވެ. އެއީ، އެ ގޮނޑިއަށް އެމްޑީޕީގެ ފަރާތުން ވާދަކުރައްވާ ނ. އަތޮޅުގެ ރައީސް މުހައްމަދު ބަޝީރު، ވަގުތު ހަމަވިފަހުން ފޯމް ހުށަހަޅުއްވާފައިވާ ކަމަށް ބުނެ އެ ފޯމް ބަލައިނުގަތުމުންނެވެ.
ނަމަވެސް، ބަޝީރު ވަނީ ގަޑި ޖެހުމުގެ ކުރިން އޭނާ ފޯމް މެއިލް ކުރެއްވި ކަމަށް ވިދާޅުވެ، އިލެކްޝަން ކޮމިޝަންގެ ނިންމުން ހައިކޯޓުގައި އިސްތިއުނާފު ކުރުމަށް ނިންމާފަ އެވެ.
