ފުލުހުންގެ އިސްތިއުނާފް ކޮމިޓީއަށް ކުރީގެ ޑެޕިއުޓީ ޕޮލިސް ކޮމިޝަނަރު އަބްދުﷲ ސޯދިގާ އެކު ފަސް ބޭފުޅަކު، ހޯމް މިނިސްޓަރު އިމްރާން އަބްދުﷲ ހަމަޖައްސަވައިފި އެވެ.
އެ ބޯޑުގައި ސޯދިގުގެ އިތުރުން ހިމެނިވަޑައިގަންނަވަނީ ގދ. ރަތަފަންދޫ، ޗަނބޭލީވިލާ، އަޒްމީން ރަޝީދާއި މ. ސަލްޖަމްގެ، ފާތުމަތު ލީނާ އާއި މ. ލިލީސް، މިންނާ ނާފިޒްގެ އިތުރުން ހއ. ހޯރަފުށީ، ބްލެސް، އަހްމަދު ޝިހާދެވެ.
ފުލުހުންގެ ގާނޫނުގެ ދަށުން އިސްތިއުނާފް ކޮމިޓީއެއް އެކުލަވާލަން ޖެހެނީ ޑިސިޕްލިނަރީ ބޯޑުގެ ނިންމުންތައް އިސްތިއުނާފް ކުރުމަށްޓަކަ އެވެ. މި ކޮމިޓީގައި ފުލުހުންގެ ހިދުމަތުގައި ވަޒީފާއަދާކުރާ މީހުންނަކަށް ނުތިބެވޭނެ އެވެ.
ފުލުހުންގެ ގާނޫނަށް އަމަލުކުރަން ފަށާތާ 30 ދުވަހުގެ ތެރޭގައި އިސްތިއުނާފް ކޮމިޓީ އެކުލަވާލަން ޖެހޭނީ ޕޮލިސް ބޯޑުގެ ލަފާގެ މަތިން ވަޒީރެވެ.
ޑިސިޕްލިނަރީ ބޯޑުން ފުލުހަކާ މެދު ފިޔަވަޅެއް އަޅައިފި ނަމަ އެ މައްސަލަ ނިންމާ ދުވަހުން ފެށިގެން 10 ދުވަހުގެ ތެރޭގައި އިސްތިއުނާފް ކޮމިޓީއަށް ހުށަހަޅަން ޖެހެ އެވެ. ކޮމިޓީން ބަލާ މައްސަލައަކާ ގުޅިގެން އިސްލާހު ކުރަން ޖެހޭ ކަމެއް ފާހަގަވެއްޖެ ނަމަ އެ ކަމެއް ހުށަހަޅަން ޖެހޭނީ ޕޮލިސް ބޯޑަށެވެ.
އަލަށް އެކުލަވާލާފައިވާ ޕޮލިސް ބޯޑުގެ ބައްދަލުވުންތައް ވަނީ ފަށައިފަ އެވެ. ތަހުގީގީ އުސޫލުތައް ކަނޑައެޅުމާއި ފުލުހުންގެ ތަމްރީނުތަކުގެ އޮނިގަނޑު އެކަށައެޅުން ފަދަ މުހިއްމު ބާރުތައް އެ ބޯޑަށް ގާނޫނުން ލިބިދެ އެވެ.
