އިއްޔެ ފެށި ރަމަޟާން ކްރިކެޓް ކާނިވަލުގެ އޮފީސް ޓޭޕް ބޯލް މުބާރާތުގައި ރައްޔިތުން މަޖިލީސް ޓީމު ކުޅުނު މެޗުން ކްލަބް އިމިގްރޭޝަން އަތުން ބަލިވެއްޖެ އެވެ.
ރޯދަ މަހަށް ހާއްސަކޮށް ވަރަށް ފުޅާކޮށް ކުރިއަށްގެންދާ ކްރިކެޓް ކާނިވަލަކީ މި މަހުގައި ބޭއްވޭ އެންމެ ބޮޑު އެއް ކުޅިވަރު މުބާރާތްތަކެވެ. އެގޮތުން މި ކާނިވަލުގައި ޖުމްލަ ތިން މުބާރާތެއް ކުޅޭ ގޮތަށް ކްރިކެޓް ބޯޑުން ވަނީ ހަމަޖައްސައިފަ އެވެ. އެއީ އޯޕަން ޓޭޕް ބޯލް ކްރިކެޓް މުބާރާތާއި އަމިއްލަ ކުންފުނިތަކަށް ހުޅުވާލައިގެން ބާއްވާ ކޮމްޕެނީ ޓޭޕް ބޯލް ކްރިކެޓް މުބާރާތުގެ އިތުރުން ސަރުކާރު އޮފީސްތަކުގެ މެދުގައި ކުރިއަށްގެންދާ އޮފީސް ޓޭޕް ބޯލް ކްރިކެޓް މުބާރާތެވެ.
ކުޅިވަރު އެކުވެނި ކްރިކެޓް ދަނޑުގައި ކުރިއަށްދާ އޮފީސް މުބާރާތުގައި ހަ ޓީމެއް ވާދަކުރެ އެވެ. އިއްޔެ ކުޅުނު ފުރަތަމަ މެޗުން ޔޫތު މިނިސްޓްރީ ވަނީ މީރާއާ އެއްވަރުވެފަ އެވެ. މި މެޗުގައި މިނިސްޓްރީ ޓީމުގައި ކުޅިވަރާ ބެހޭ މިނިސްޓަރު އަހުމަދު މަހުލޫފް ހިމެނިވަޑައިގެންނެވި އެވެ. މި މެޗު އެއްވަރުވިއިރު، މީރާ އާއި މިނިސްޓްރީން ކޮންމެ ޓީމަކުން ވަނީ 87 ލަނޑު ހަދައިފަ އެވެ.
އިއްޔެ މީރާ އާއި ސްޕޯޓްސް މިނިސްޓްރީ ކުޅުނު މެޗުގައި ސްޕޯޓްސް މިނިސްޓަރު މަހުލޫފް (ވ) ބެޓްކުރައްވަނީ. -- ފޮޓޯ: ކްރިކްޓް ބޯޑް
މަޖިލީހުގެ ރައީސް މުހައްމަދު ނަޝީދު ހިމެނިވަޑައިގެން އިއްޔެ ކުޅުނު މެޗުން މަޖިލިސް ޓީމު ބަލިވީ އިމިގްރޭޝަނާ ވާދަކޮށް 20 ލަނޑުންނެވެ. މަޖިލިސް ޓީމަށް އަށް އޯވަރުގެ ތެރޭ 58 ލަނޑު ހެދުނުއިރު، އިމްގްރޭޝަން މޮޅުވީ 78 ލަނޑު ހަދައިގެންނެވެ. މި މެޗުގައި މަޖިލީސް ޓީމަށް އެންމެ ގިނަ ލަނޑު ޖެއްސެވީ އެމްޑީޕީގެ ޕާލަމެންޓްރީ ގްރޫޕްގެ ލީޑަރު އަދި ގައުމީ ކްރިކެޓް ޓީމުގެ ކުރީގެ ކުޅުންތެރިޔާ އަލީ އާޒިމް އެވެ. އާޒިމް ވަނީ 17 ލަނޑު ހައްދަވައިފަ އެވެ.
ކްރިކެޓް މުބާރާތުގައި ވާދަކުރާ މަޖިލީސް ޓީމުގައި ނިލަންދޫ ދާއިރާގެ މެމްބަރު އަބްދުލް މުހްސިން (ޖޭފޯ) އާއި ހުޅުމާލޭ ދާއިރާގެ މެމްބަރު އަދި ކުރީގެ ކުޅުންތެރިޔާ އަލީ ނިޔާޒް (ހިރިޔާ ނިޔާ) އާއި ހެންވޭރު ދެކުނު މެމްބަރު އަދި ކުރީގެ ޔޫތު މިނިސްޓަރު ހަސަން ލަތީފާއި ބިލެއްދޫ ދާއިރާގެ މެމްބަރު އަދި ކުރީގެ ފުޓްބޯޅަ ކުޅުންތެރިޔާ ދޮންބިލެއް އަހްމަދު ހަލީމް ހިމެނެ އެވެ.
އޮފީސްތަކުގެ މުބާރާތް ކުރިއަށްދަނީ ދެ ގްރޫޕަކަށް ބަހާލައިގެންނެވެ. ގްރޫޕް އޭގައި ހިމެނެނީ ޔޫތު މިނިސްޓްރީ އާއި މީރާ އަދި ކަސްޓަމްސް އެވެ. އަދި ގްރޫޕް ބީގައި ހިމެނެނީ އިމިގްރޭޝަން އާއި މަޖިލިސްގެ އިތުރުން އެމްއެމްއޭ އެވެ.
ކްރިކެޓް ބޯޑުން މި މުބާރާތް ކުރިއަށް ގެންދަނީ ހެލްތު ޕްރޮޓެކްޝަން އެޖެންސީގެ ގައިޑްލައިންގެ ދަށުންނެވެ. މި މަހުގެ 18 ވަނަ ދުވަހު ފެށި މި މުބާރާތް 28 ދުވަހުގެ މިުއްދަތަށް ކުރިއަށްދާނެ އެވެ.
