މިހާރު އިންތިހާބުވެފައިވާ ރަށްރަށުގެ ކައުންސިލަރުންގެ މުސާރަ ބޮޑުކޮށް، ކައުންސިލްތަކުގެ މުސާރައާއި އިނާޔަތްތައް ނެޝަނަލް ޕޭ ކޮމިޝަނުން ހުށަހެޅި ގޮތަށް ރައްޔިތުންގެ މަޖިލީހުގެ މާލިއްޔަތު ކޮމިޓީން މިއަދު ފާސްކޮށްފި އެވެ.

ޕޭ ކޮމިޝަނުން މަޖިލީހަށް ފޮނުވާފައިވާ ލިޔުމުގައިވާ ގޮތުން، ސިޓީ ކައުންސިލުތަކުގައި މޭޔަރަކަށް 40،000ރ.، ޑެޕިއުޓީ މޭޔަރަކަށް 35،000ރ. އަދި ސިޓީ ކައުންސިލް މެމްބަރަކަށް 30،000ރ ލިބެމުން އައި އައުމަށް ބަދަލެއް ގެނެސްފައެއް ނުވެ އެވެ.

ނަމަވެސް، އަތޮޅު ކައުންސިލްގެ ރައީސަކަށް ލިބެމުން އައި ޖުމްލަ 26،000ރ ގެ މުސާރަ މި ފަހަރު ވަނީ 28،000ރ. އަށް ބޮޑުކޮށްފަ އެވެ.

އަތޮޅު ކައުންސިލަރުންނަށް ސިޓިން އެލަވަންސެއް

އަތޮޅު ކައުންސިލުގެ ރައީސް ފިޔަވައި ނައިބު ރައީސް ހިމެނޭ ގޮތަށް ބާކީ ތިބޭ ކައުންސިލަރުން ތަމްސީލުކުރަނީ އެ އަތޮޅެއްގެ ރަށު ކައުންސިލުތައް ކަމުން، އެ ކައުންސިލަރުންނަށް މި ފަހަރު ކަނޑައަޅާފައިވަނީ ކޮންމެ ބައްދަލުވުމަކަށް ސިޓިން އެލަވަންސެކެވެ.

މިގޮތުން، ކޮންމެ ބަދަލުވުމަކަށް 500ރ. ގެ އެލަވަންސެއް ކަނޑައަޅާފައިވީ ނަމަވެސް، މަހަކު އެ އަދަދު ގިނަވެގެން 2،000ރ. އަށް ވަނީ ލިމިޓުކޮށްފަ އެވެ.

މުސާރަ ބޮޑުވީ ރަށު ކައުންސިލަރުންނަށް

މި ފަހަރު ކައުންސިލަރުންގެ މުސާރައަށް ޕޭ ކޮމިޝަނުން ހުށަހެޅި ބަދަލުތަކުގައި އެންމެ ހެޔޮ އަސަރެއްކޮށްފައިވަނީ ރަށު ކައުންސިލަރުންގެ މުސާރަ އާއި އިނާޔަތްތަކަށެވެ.

މިގޮތުން، މީގެ ކުރިން 15،000ރ. ލިބެމުން އައި ރަށު ކައުންސިލްގެ ރައީސަކަށް މިފަހަރު ހުށަހަޅާފައިވަނީ 23،000ރ. އެވެ.

ރަށު ކައުންސިލްތަކުގެ ނައިބު ރައީސުންގެ މުސާރަ ވެސް ވަނީ 12،000ރ. އިން 15،000ރ. އަށް ބޮޑު ކުރަން ހުށަހަޅައިފަ އެވެ.

އަދި ރަށު ކައުންސިލްތަކުގެ މެމްބަރުންގެ މުސާރަ ވަނީ 11،000ރ. އިން 12،000ރ. އަށް އިތުރުކުރަން ހިމަނައިފަ އެވެ.

ރަށު ކައުންސިލްގެ ރައީސްގެ މުސާރައާމެދު ކަންބޮޑުވުން

މިއަދު ކޮމިޓީ ބައްދަލުވުމުގައި ގިނަ މެމްބަރުން ވަނީ ރަށު ކައުންސިލަރުންގެ ރައީސާއި ނައިބު ރައީސްގެ މުސާރާގައި ހުރި ފަރަގުގެ ކަންބޮޑުވުންފާޅު ކުރައްވައިފަ އެވެ.

އަދި އެކަމަށްޓަކައި އެ ފަރަގު ކުޑަކުރަންވެސް މިއަދު ކޮމިޓީއަށް ހުށަހެޅުނެވެ.

އެކަން ސާފުކޮށް ދެއްވަމުން ކޮމިޓީގެ މުގައްރިރު އަދި ކިނބިދޫ ދާއިރާގެ މެމްބަރު މުހައްމަދު ނާޝިޒު ވިދާޅުވީ، އެ ފަރަގު ބޮޑުކޮށްފައިވަނީ، ކައުންސިލްތަކުގެ ޑިރެކްޓާ ޖެނެރަލުންގެ އަސާސީ މުސާރަ 17،000ރ. ގައި ހުރުމުން، ކައުންސިލް ރައީސްގެ މުސާރަ އެއަށްވުރެ ކުޑަ ނުކުރަން ވެގެން ކަމަށް ޕޭ ކޮމިޝަނުން ބުނެފައިވާ ކަމަށެވެ.

އެއާއެކު ޕޭ ކޮމިޝަނުން ފޮނުވާފައިވާ ގޮތަށް މުސާރަ ދިނުން ރަނގަޅު ކަމަށް ކޮމިޓީގެ އަގުލަބިއްޔަތުން މިއަދު ވަނީ ފާސްކޮށްފަ އެވެ.

ލާމަރުކަޒީ ގާނޫނަށް ގެނައި ބޮޑެތި އިސްލާހުތަކާއެކު ކައުންސިލްތަކުގެ އޮނިގަނޑަށް އައި ބަދަލުގެ ސަބަބުން މުސާރަ އާއި އިނާޔަތްތަކުގެ ގޮތުގައި މި ފަހަރު އަހަރަކަށް 162 މިލިއަނަށް ވުރެ ގިނަ ރުފިޔާ ހަރަދުވާނެ ކަމަށް ވަނީ ލަފާކޮށްފަ އެވެ.

އެއީ މިހާރު ދެމުންދާ އަދަދަށް ބަލާއިރު އަހަރަކު 85 މިލިއަނަށް ވުރެ ގިނަ ރުފިޔާގެ އިތުރުވުމެކެވެ.