ލަންޑަން (އޭޕްރީލް 25) - އިނގިރޭސި ޕްރިމިއާ ލީގުގައި މިރޭ ވެސްޓް ހޭމް ޔުނައިޓެޑް ދަނޑުގައި 1-0 އިން މޮޅުވެ ޗެލްސީން ގަދަ ހަތަރެއްގެ ރޭހުގައި ބޮޑު މޮޅެއް ހޯދައިފި އެވެ.
މި މޮޅާ އެކު ޗެލްސީން ވަނީ ހަތަރު ވަަނައިގައި ތިން ޕޮއިންޓުގެ ލީޑެއްނަގައިފަ އެވެ. ގަދަ ހަތަރެއްގެ ރޭހުގައި މިހާރު ޓީމުތަކުން ވާދަކުރަމުން އަންނަނީ ތިން ވަނަ އާއި ހަތަރު ވަނަ މަގާމަށެވެ. އެ ދެ މަގާމަށް ވާދަކުރާ ހަ ޓީމު އެބައޮތެވެ. އެ ރޭހުގައި އެވަޓަން އާއި ލެސްޓާ ސިޓީ ނޫނީ ދެން އޮތް ހަތަރު ޓީމު ވެސް ވަނީ 33 މެޗުން ކުޅެފަ އެވެ. އެވަޓަން އާއި ލެސްޓާ ކުޅުނީ 32 މެޗެވެ.
ލެސްޓާ ތިން ވަނައިގައި އޮތީ 59 ޕޮއިންޓާ އެކު އެވެ. ޗެލްސީ ހަތަރު ވަނައިގައި އޮތީ 58 ޕޮއިންޓް ހޯދައިގެންނެވެ. ފަސް ވަނައިގައި އޮތް ވެސްޓް ހޭމް އަށް 55 ޕޮއިންޓް ލިބިފައިވާއިރު، ހަ ވަނައިގައި އޮތް ލިވަޕޫލަށް ވަނީ 54 ޕޮއިންޓް ލިބިފަ އެވެ. ހަތް ވަނައިގައި އޮތް ޓޮޓެންހަމަށް 53 ޕޮއިންޓް ލިބިފައިވާއިރު، އަށް ވަނައިގައި އޮތް އެވަޓަންގެ އޮތީ 52 ޕޮއިންޓެވެ.
ވެސްޓް ހޭމް ދަނޑުގައި މިރޭ ކުޅުނު މެޗުގައި ޗެލްސީގެ ހަމައެކަނި ގޯލު ޖެހީ މެޗުގެ 43 ވަނަ މިނިޓްގައި ޖަރުމަނުގެ ފޯވާޑް ޓިމޯ ވާނާ އެވެ. ބެން ޗިލްވެލް ދިން ބޯޅައަކުން ވާނާ ޖެހި މި ގޯލަކީ މިދިޔަ ފެބްރުއަރީ މަހުގެ ފަހުން އޭނާ ލީގުގައި ޖެހި ފުރަތަމަ ގޯލެވެ. އަދި މި ފަހަރު ލީގުގައި ޖެހި ހަ ވަނަ ގޯލެވެ. ފަހުން އިތުރު ގޯލެއް ޖަހަން ވާނާ އަށް ލިބުނު ފުރުސަތުގެ ބޭނުމެއް ނުހިފުނެވެ.
ލަނޑު ޖެހުމަށް ފަހު ވާނާ އުފާފާޅުކުރަނީ.
ޖުމްލަކޮށް ބަލާއިރު ވެސްޓް ހޭމް އަށް ޗެލްސީ ކޮޅަށް މާ ނުރައްކާތެރި ހަމަލާތަކެއް ފޮނުވާނުލެވުނެވެ. ވެސްޓް ހޭމް އިން މެޗު ނިންމާލީ އެއް ކުޅުންތެރިއަކު މަދުކޮށެވެ. އެއީ މެޗުގެ 81 ވަނަ މިނިޓްގައި އެ ޓީމުގެ ޕެރަގުއޭ ޑިފެންޑަރު ފަބިއަން ބަލްބުއޭނާ އަށް ރަތް ކާޑެއް ދެއްކުމުންނެވެ. އެއީ ޗިލްވެލް އަށް ނުރައްކާތެރި ފައުލެއް ކުރިކަމަށް ނިންމުމަށް ފަހު އެވެ. އެ ގޮތަށް ނިންމީ ވީޑިއޯ އެސިސްޓަންޓް ރެފްރީ (ވީއޭއާރް) އިން ބެލުމަށް ފަހު އެވެ.
ޗެލްސީގެ ކޯޗު ތޯމަސް ޓުޗެލް ބުނީ އޭނާގެ ޓީމަށް މި މޮޅު ލިބުމުގައި ފުރަތަމަ ހާފު ދެއްކި ކުޅުން ވަރަށް މުހިއްމު ކަމަށާއި ހަގީގަތުގައި ގަދަ ހަތަރެއްގެ ރޭހުގައި އޮތް ޓީމެއްގެ ދަނޑުގައި މޮޅުވުމަކީ ކުޅުންތެރިންގެ ކޮންފިޑެންސަށް ވަރަށް މުހިއްމު ކަމެއް ކަމަށެވެ.
ޓުޗެލް އަކީ ޕްރިމިއާ ލީގުގެ ތާރީހުގައި އަލަށް ޓީމަކާ ހަވާލުވެ ރަށުންބޭރުގައި ބަލިނުވެ 10 މެޗު ހަަމަކުރި ދެ ވަނަ ކޯޗެވެ. މީގެ ކުރިން އެކަން ހާސިލްކުރީ ލެސްޓާ ސިޓީއާ އެކު ކްްލައުޑިއޯ ރަނިއޭރީ އެވެ.
