މާފުށީ ޖަލުގެ އޮފިސަރުންތަކެއް ކޮވިޑަށް ޕޮޒިޓިވްވުމަކީ ޖަލުގައި ބަލި ފެތުރުމުގެ ފުރުސަތު އޮތް ސަބަބެއް ކަމަށް ބުނެ ކުރީގެ ރައީސް އަބްދުﷲ ޔާމީން ގޭބަންދަށް ބަދަލުކޮށްދޭން އިދިކޮޅު ކޯލިޝަނުން މިއަދު ގޮވާލައިފި އެވެ.
ޕީޕީއެމާއި ޕީއެންސީން ނެރުނު ނޫސް ބަޔާނުގައި ބުނީ ޖަލުން ޕޮޒިޓިވްވި އޮފިސަރުންގެ ތެރޭގައި ޔާމީންގެ ކަންކަން ބަލަހައްޓަވާ އޮފިސަރެއް ހިމެނޭ ކަމުގެ މައުލުމާތު ލިބިފައިވާ ކަމަށެވެ. މިއީ ކަންބޮޑުވާ ކަމެއް ކަމަށާއި ޖަލުގެ ހާލަތު އާއްމުންނަށް ހާމަކޮށްދޭން ޖެހޭ ކަމަށް ބަޔާނުގައިވެ އެވެ.
ޖަލުން ޕޮޒިޓިވްވި އޮފިސަރުންނާއި މުވައްޒަފުންނަށް އަވަސް ޝިފާއަކަށް އެދިފައިވެ އެވެ.
އިދިކޮޅުން ބުނިގޮތުގައި ޖަލުން ކޮވިޑް ފެނިފައިވާތީ ޔާމީންގެ ސިއްހަތަށް ލިބިދާނެ ގެއްލުމަކުން އެމަނިކުފާނު ރައްކާތެރިކޮށްދިނުމަކީ ސަރުކާރުން ކުރަން ޖެހޭނެ ކަމެކެވެ.
"މިއީ، ސިޔާސީ ނުފޫޒަކުން ކުރެވިފައިވާ ހައްގު ނޫން ހުކުމެއް ޖަލުގެ ތޭރިތަކުގައި އެމަނިކުފާނަށް އަނިޔާދެމުން ގެންދާ ދެ ވަނަ ރަމަޟާން މަހެވެ،" ބަޔާނުގައިވެ އެވެ.
ޔާމީން ގެއަށް ބަދަލުކުރަން ޑޮކްޓަރުން ވެސް ލަފާ ދެއްވާފައިވާ ކަމަށާއި އެހެންވެ ވަގުތުން އެކަން ފަހިކޮށްދޭން ބަޔާނުގައި ގޮވާލާފައިވެ އެވެ.
ޔާމީންގެ ސިއްހީ ހާލުކޮޅު ހުރި ގޮތުން ގެއަށް ބަދަލުކޮށް ދިނުމަށް އާއިލާ އިން ވެސް ވަނީ ހޯމް މިނިސްޓްރީގައިއެދިފަ އެވެ. އެކަމާ މެދު މަޝްވަރާކުރަމުން އަންނަ ކަމަށާއި ދެރަގޮތެއް ނުހައްދަވާނެ ކަމަށް ރައީސް އިބްރާހިމް މުހައްމަދު ސޯލިހް ދާދި ފަހުން ވިދާޅުވެފައިވެ އެވެ.
ޔާމީނަށް ފަސް އަހަރުގެ ޖަލު ހުކުމެއް އައީ ދައުލަތަށް ލިބެން ޖެހޭ އެއް މިލިއަން ޑޮލަރު އަމިއްލަ އެކައުންޓަށް ޖަމާކޮށް އަސްލު އޮޅުވާލައި މަންފާ ހޯދިކަން ސާބިތުވެގެންނެވެ. މި ހުކުމް އިންސާފުވެރި ނޫން ކަމަށާއި މިއީ ސިޔާސީ ހުކުމެއް ކަމަށް އިދިކޮޅުން ދަނީ ބުނަމުންނެވެ.
