ރާއްޖޭގައި ކޮވިޑް-19 ފެތުރޭ މިންވަރު ރެކޯޑް މިންވަރަކަށް އިތުރުވަމުންދާއިރު، އެކަމާ މިފަހުން ބޭއްވި ލޯކަލް ކައުންސިލް އިންތިހާބާ ސީދާ ގުޅުމެއް އޮތް ކަމެއް އަދި ނޭނގޭ ކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ)އިން މިއަދު ބުނެފި އެވެ.
ކޮވިޑްގެ ގިނަ ކޭސްތަކެއް ރަށްތަކުން ފެނި، މުޅި ރާއްޖޭން ޕޮޒިޓިވްވި މީހުންގެ އަދަދު ވަނީ ފުރަތަމަ ފަހަރަށް 300 ހުރަސްކޮށްފަ އެވެ.
އެކި ރަށްތަކުން ޖުމްލަ 182 މީހަކު ކޮވިޑަށް ޕޮޒިޓިވްވެފައިވާއިރު އިއްޔެ އަކީ އެއް ދުވަހެއްގައި ރަށްރަށުން މިފަހުން އެންމެ ގިނަ މީހުން ޕޮޒިޓިވްވި ދުވަހެވެ.
މާލޭން ވެސް 108 މީހަކު ޕޮޒިޓިވްވެފައިވާއިރު، އިއްޔެގެ އިރުއޮއްސުމާ ހަމައަށް ޖުމްލަ އަދަދު 319 އެރި އެވެ.
"އިލެކްޝަން ކްލަސްޓާ"އެއް؟
ކޭސްތައް މި މިންވަރަށް އިތުރު މިވީ، މި މަހުގެ 10 ވަނަ ދުވަހު ކައުންސިލް އިންތިހާބު ބޭއްވި ފަހުން ދެ ހަފްތާ ހަމަވުމާ ދިމާއަށެވެ.
ބަލިމަޑުކަމެއްގެ ތެރޭގައި އިންތިހާބު ބޭއްވުމާ މެދު އެޗްޕީއޭއިން ވަނީ އެކި ފަހަރު މަތިން ކަންބޮޑުވުންފާޅުކޮށްފަ އެވެ.
ނަމަވެސް، މިދިޔަ އަހަރު ބާއްވަން ތާވަލުކުރި އިންތިހާބު، ގާނޫނަކުން އެއް އަހަރަށް ފަސްކުރުމަށްފަހު، އިތުރަށް ފަސްނުކުރެވޭނެކަމަށް ބުނެ ސިޔާސީ ގޮތުން ބޮޑެތި ޕްރެޝަރުތައް ކުރިމަތިވި އެވެ.
އެއާއެކު އިލެކްޝަންސް ކޮމިޝަނުގެ ޝަކުވާތަކާ އެކު، އިންތިހާބާ ދިމާކޮށް އެޗްޕީއޭއިން ވަނީ ރައްކާތެރިކަމަށް އޭރު އަޅާފައިވާ ފިޔަވަޅުތަކަށް ބޮޑެތި ލުއިތައް ދީފަ އެވެ.
އޭގެ ތެރޭގައި، ބަލި ފެތުރިފައިވާ ރަށްރަށުން އެހެން ރަށަކަށް ދަތުރުކުރާއިރު ކަރަންޓީނުވާންޖެހޭ ގޮތަށް އޮތް ފިޔަވަޅު، ވޯޓުލީ ދުވަހު ވަނީ އުވާލައިފަ އެވެ. އެއާއެކު ގިނަ ބަޔަކު ވަނީ އެކަމުގެ ފައިދާ ނަގައިގެން، ހާއްސަކޮށް މާލޭން އަތޮޅު ތެރެއަށް ގޮސްފަ އެވެ.
އޭގެ އިތުރުން، ވޯޓުލުމުގެ ހައްގުގެ ހަމަހަމަކަން ހިފެހެއްޓުމަށް ކޮވިޑަށް ޕޮޒިޓިވްވެފައިވާ މީހުންނަށް ވެސް ވޯޓުލާ މަރުކަޒުތަކަށް އައިސް ވޯޓުލުމުގެ ފުރުސަތު ފުރަތަމަ ހަމަޖެއްސީ އެހެން މީހުން ވޯޓުލާ ނިމުމަށްފަހު އެވެ. ނަމަވެސް، އެކަން ވެސް ބޮއްސުންލައިގެން ގޮސް، ޕޮޒިޓިވް މީހުންނަށް ހާއްސަކުރި ގަޑީގައި އެހެން މީހުންނަށްވެސް ވޯޓުލުމުގެ ފުރުސަތު ވަނީ ދީފަ އެވެ.
އެއާއެކު އެއްވެސް އިންތިޒާމެއް ނެތި، އެތައް ބަޔަކު ވަނީ ވޯޓުލާ މަރުކަޒުގެ ތެރޭގައި ތޮއްޖެހިފައިވާއިރު، ގައިދުރުކަމާއި މާސްކު އެޅުން ފަދަ ރައްކާތެރިކަމުގެ ފިޔަވަޅުތަކަށް ވެސް ގިނަ ބަޔަކު ތަބާވެފައިނުވާއިރު، އެކަން ތަންފީޒު ކުރެވުނު މަންޒަރެއް ވެސް ނުފެނުނެވެ.
މިހާރު ފެންނަމުންދާ ނަންބަރުތަކާ ގުޅޭގޮތުން ޑެޕިއުޓީ ޑިރެކްޓާ ޖެނެރަލް ތަސްލީމާ އުސްމާނު "އަދަދު"އަށް ވިދާޅުވީ ބަލި ފެތުރޭ މިންވަރާ ކައުންސިލް އިންތިހާބާ ސީދާ ގުޅޭ ކަމެއް އަދި ނޭނގޭ ކަމަށެވެ.
"އަދި އަޅުގަނޑުމެންނަށް ސީދާ ބުނަން ނޭނގޭ އިލެކްޝަނާ ގުޅުން އޮތް ކަމެއް. އެކަމަކު އަޅުގަނޑުމެން އެކަން މިދަނީ ގާތުން ބަލަމުން،" ތަސްލީމާ ވިދާޅުވި އެވެ.
ހާއްސަކޮށް އަތޮޅު ތެރޭގައި ބަލި ފެތުރޭ ދުވެލި އިންތިހާއަށް އަވަސްވެފައިވާއިރު، ކޮންޓެކްޓް ޓްރޭސިންގެ ތެރެއިން ވެސް އިންތިހާބާ ދިމާކޮށް ދަތުރުފަތުރަށް ދިން ލުޔާ ގުޅުމެއް އޮތް ކަމެއް އަދި ދެނެގަނެވިފައި ނުވާކަމަށް އޭނާ އިތުރަށް ވިދާޅުވި އެވެ.
އިއްޔެއާ ހަމައަށް ރާއްޖޭގައި ކޮވިޑު ޖެހުނު މީހުންގެ ޖުމްލަ އަދަދު 27،400 އަށް ވުރެ މައްޗަށް އަރާފައިވާއިރު، އޭގެ ތެރެއިން މިހާތަނަށް 71 މީހަކު ވަނީ މަރުވެފަ އެވެ.
