އެކަކު ކުޅި ބޯކިބާ ތައްޔާރުކުރަން، ފުށް މޮޑެން ގެންގުޅޭ ބޮޑު ތައްޓަށް ތަކެތި ކޮށަނީ އެވެ. އަނެކަކު ތަރާވީސް ދަމަށް ރީނދޫ ބަތާއި ކަންކުން ބީފް ތައްޔާރުކުރަން ފަހަރަކު ތައްޓެއް ނަގައިގެން ފިޔަލާއި ތަރުކާރީ އާއި ދެން ވެސް ހުރިއްޔާ ހުރި ހުރިހާ ބާވަތެއް ކޮށައި ނަގަނީ އެވެ. އިރުކޮޅަކުން ފަނި ގިރާނެ އެވެ. އަދި ފޮނި އެއްޗެއް ތައްޔާރުކުރުން އޮތީ އެވެ. އެ ހުރިހާ ކަމެއް ނިމޭ އިރު ގޯންޏެއްގެ ތައްޓާއި ތެލި ހަޑިވެ، ދޮންނަން ޖެހޭނެ އެވެ. އަހަރެންގެ ހުރި ކުޅަދާނަ ކަމާއި ހިއްވަރު ދައްކަން ޖެހޭ ވަގުތަކީ އެއީ އެވެ. ހަޑިވާ ހުރިހާ ތައްޓެއް އަހަންނަށެވެ.
ބަލަން ނުހުރެ، ސިންކުގައި ފުނި ޖެހެމުންދިޔަ ތަށިތައް ދޮންނަމުން ދިޔައިރު ހިތަށް އަރަ އެވެ. ތަށި ދޮވުމަކީ ތެރެޕީ އެކެވެ. ސައިބޯނީގެ ވަސް ބަލަމުން، ތަށިތަކުގައި އަތް ކާއްތަމުން ސްޕޮންޖުގަނޑަށް ފެލަމުން، އިސްކުރުން ފައިބަމުންދާ ފެނާއި އެއް ރާގަކަށް އަތް ހަރަކާތްކުރަމުން ދާއިރު ސިކުނޑީގެ ސްޓްރެސް ލެވެލް 27 ޕަސެންޓު ދަށަށް ވައްޓާލައި، ޖޯޝު 25 ޕަސެންޓަށް މަތިކޮށްދޭ ކަމަށް ސައިންސުވެރިންގެ ދިރާސާތަކުން ދައްކަ އެވެ. އެކަމަކު އެ ސައިންސަކުން އެބުނާ ނަތީޖާއެއް ނިކުންނަ ވަރު ވަނީ ކިހާ ވަރަކަށް ތަށި ދޮވެވުނީމާ ހެއްޔެވެ؟ ރޯދަ މަސް ފެށުނު ފަހުން ކޮންމެ ދުވަހަކު ތައްޓާއި ތެލި ދޮވެވޭ އަދަދެއް ނޭނގެ އެވެ. އެ ނޫނީ ކޮށް ކޮށް ކުރި ނާރާ ކަމެއް ވެސް ނެތެވެ.
ތަށި ދޮވުން ފަސޭހަ ކޮށްލެވޭނީ ކިހިނެއް؟
މިވެސް ޒާތެއްގެ ކަމެކެވެ. ރޭގަނޑު ހާރު ކައިގެން ހަޑިވާ ހުރިހާ ތައްޓެއް ހެނދުނު ހޭލައިގެން ދޮންނަން ބަހައްޓާނަމަ ގިނަ ފަހަރަށް އެ ތަށި ތަކާއި ތެލިތައް ދޮންނަން ވަގުތެއް ވާނީ އޮފީހުގެ މަސައްކަތުން އަވަދިވެގެން ބަދިގެއަށް ވަދެވޭ ވަގުތުގަ އެވެ. އެހާ އިރު ވާއިރު ހުންނާނީ މީހާ ވަރުބަލިވެފަ އެވެ. ހަޑި ތަށި ތަކުގައި އަތްލާހިތް ނުވެފައި ފޫހިވެފަ އެވެ. އޭރުން މަސައްކަތް މާ ބުރަ ވާހެން ވެސް ހީވާނެ އެވެ. ކުރިން ހުރި ތަށިތައް ދޮވެ ނިމޭ އިރު ހުންނާނީ ރޯދަ ވީއްލަން އެއްޗެހި ހަދަން ފަށާ ގަޑި ޖެހިފަ އެވެ. ދެން އުޅެން ޖެހޭނީ އެ ޕްރޮސެސް ގައި ހަޑި ވާ ތަށިތަކާއި ތެލި ތައް ދޮވުމުގަ އެވެ.
އެހެންވީމާ އެންމެ މޮޅު ގޮތަކީ، ހަޑި ވަމުން ދާ ވަރަކަށް ހަޑިވާ ތަށި ދޮންނަމުން ދިއުމެވެ. މިހެން ހަދައިގެން ރޯދަ މަހުގެ ފެން ބިލު ވޮލެޓަށް ނުކަތައިފާނެ ކަމުގެ ބިރު އޮތް ނަމަ، އެ އިރަކު ކުރާ ހުރިހާ ކަމެއް ކޮށް ނިމުމުން ހަޑިވެފައި ހުރި ހުރިހާ ތައްޓެއް އެކީ އެކަށް ދޮންނަން މަޑު ކުރެވިދާނެ އެވެ. ދެން ތައްޓަކަށް ނުވަތަ ވަކި ތެއްޔަކަށް ފެން ފުރާލުމަށްފަހު އެއް ކައިރީގައި ބަހައްޓާފައި ފަހަރަކު ތައްޓެއް ސައިބޯލި ލާފައި ދޮވުމަށްފަހު އެ ތެލިން ފެން ލަމުން ދޮންނަމުން ދާނީ އެވެ. ހުރިހާ ތައްޓެއް މިގޮތަށް ދޮވެ ނިމުމުން ރީތި ފެނުން ފެން ލާނީ އެވެ.
ތަށި ދޮންނަ އިރު އަންގި ބޭނުންކުރަން ވާނެ
އަހަރެމެންގެ އާދަ ހުންނަ ގޮތުން ތަށި ދޮންނަ އިރު އަތަށް އަންގި ލުމާއި އަތުގެ ހަންގަނޑަށް މާބޮޑަށް އަޅާލުމަކީ އިސްކަންދޭ ކަންކަމެއް ނޫނެވެ. އެކަމަކު ގިނައިން ތަށިތައް ދޮންނަ ނަމަ ގިނައިން ފެނުން އަތް ތެމޭނެ އެވެ. ތަށި ދޮންނަން ބޭނުންކުރާ ޒާތްޒާތުގެ އޯމޯ ހަންގަނޑުގައި އުނގުޅޭލެއް ގިނަ ވާނެ އެވެ. ހަމުގެ ނާޒުކު ކަމެއް ހުންނަ މީހެއް ނަމަ، ގިނައިން ފެނާއި އޯމޯ ބޭނުންކުރަން ފެށުމުން ނިޔަފަތި ތަކާއި ނިޔަރޮދީގެ ހަންގަނޑު މަޑުވެ ހަން ފޮޅޭ ގޮތްވާނެ އެވެ. ސައިބޯންޏަށް އެލާޖިކް ރިއެކްޝަން ހުންނަ މީހުންގެ އަތްތިލަ އަށް މިއަށްވުރެ ބޮޑުވަރު ވާނެ އެވެ.
ތަށި ދޮންނަ އިރު ބޭނުންކުރަން އެންމެ ރަނގަޅު ވާނީ އަތުގެ ކުޑަހުޅަށްވުރެ މައްޗަށް ހުންނަ ރަބަރު އަންގި އެވެ. އަންގީގެ ފައިދާ އަކީ، އޭގެއިން އަތްތިލަ އާއި އިނގިލިތައް ސައިބޯންޏާއި ފެނުން ރައްކާތެރިކޮށްދޭނެ އެވެ. އަދި ރަބަރު އަނގީގައި ތަތްލަވާ ގޮތެއް ހުންނާތީ ބިއްލޫރި އާއި މުށި ތަށި ދޮންނަ އިރު ފަސޭހައިން ކައްސާލައިގެން ނުދާނެ އެވެ.
އަންގީގައި ހުންނަ ރަބަރު ވަހުން އުނދަގޫ ވާނަމަ ބޭކިން ސޯޑާ ކޮޅެއް އަންގީގެ ތެރެއަށް އަޅާލުމުން ވަސް ކެނޑޭނެ އެވެ.
އެހެންވީމަ، ތެރަޕީ އަކަށް ވާ ކަހަލަ ގޮތަށް މިކަން ނުކުރެވިގެން އުޅެނީ ފަހަރެއްގައި މި ހުރިހާ ކަމެއް ހިމަނައިގެން ތަށި ދޮވުން ޕްލޭން ނުކުރެވޭތީ ކަމަށް ވެސް ވެދާނެ އެވެ.
