ލަންޑަނުގެ ނައިޓްކްލަބެއްގެ ތެރޭގައި މީހެއްގެ ބޮލުގައި ރާ ފުޅިއަކުން ދެ ފަހަރު ޖަހައި ހަމަލާދިން މައްސަލައިގައި، އެމެރިކާގެ މަޝްހޫރު ލަވަކިޔުންތެރިޔާ ކްރިސް ބްރައުން ޖަލަށް ނުގޮސް ސަލާމަތްވެއްޖެ އެވެ.
މޭފެއާގައި ހުންނަ "ޓޭޕް" ނަމަކަށް ކިޔާ ޕްރައިވެޓް ކްލަބެއްގައި 19 ފެބްރުއަރީ 2023 ގެ ދަންވަރުގެ ވަގުތެއްގައި ހިންގި މި ހަމަލާއާ ގުޅިގެން، އާރް އެންޑް ބީ ތަރި ކްރިސް ބްރައުންގެ މައްޗަށް އިއްވީ އަށް މަސް ދުވަހުގެ ޖަލު ހުކުމެކެވެ. ނަމަވެސް، 12 މަސް ދުވަހުގެ މުއްދަތަށް އެ ހުކުމް ތަންފީޒުކުރުން ވަނީ ފަސްކޮށްފަ އެވެ.
މި ހަމަލާގައި ބައިވެރިވި ބްރައުންގެ ވޯކަލް ކޯޗު، ރެޕާ އޮމޮލޮލޫ އަކިންލޯލޫގެ މައްޗަށް އިއްވީ ހަތަރު މަސް ދުވަހުގެ ޖަލު ހުކުމެކެވެ. އޭނާގެ ހުކުމް ވެސް 12 މަސް ދުވަހަށް ފަސްކޮށްފައިވާއިރު، އާންމު މަސްލަހަތު ގެއްލޭ ފަދަ މާރާމާރީ ހިންގިކަމަށް އިއުތިރާފުވި މި ދެ މީހުން ވެސް 1،500 ޕައުންޑުން ޖޫރިމަނާކުރުމަށް ވަނީ އަމުރުކޮށްފަ އެވެ.
މި މައްސަލަ ބެއްލެވި ފަނޑިޔާރު ޓޯނީ ބޯމްގާޓްނާ ވިދާޅުވީ، އަނިޔާ ލިބުނު މީހާގެ ބޮލުގައި ބްރައުން ބިއްލޫރި ފުޅިއަކުން ދެ ފަހަރު ޖެހުމަކީ "ސާފުކޮށް އެނގޭ ފަދަ ނުރައްކާތެރި" އަމަލެއް ކަމަށެވެ.
ކްރިސް ބްރައުންގެ ހުކުމް ތަންފީޒުކުރުން ފަސްކުރުމުގެ މާނައަކީ، ކުރިއަށް އޮތް 12 މަސް ދުވަހުގެ ތެރޭގައި އޭނާ އިތުރު ކުށެއް ނުކުރާ ނަމަ ޖަލަށް ދާން ނުޖެހުމެވެ.
ކޯޓަށް ހުށަހެޅި މައުލޫމާތުތަކުން އެނގޭ ގޮތުގައި، މިއުޒިކް ޕްރޮޑިއުސަރު އަބްރަހަމް 'އޭބް' ދިއާއުއަށް ބްރައުން ދިން މި ހަމަލާގެ ސަބަބުން ލިބުނު އަނިޔާތަކަށް ހޮސްޕިޓަލުގައި ފަރުވާ ހޯދަން ޖެހުނެވެ.
ހުކުމް އިއްވަވަމުން ފަނޑިޔާރު ބޯމްގާޓްނާ ވިދާޅުވީ، ބިއްލޫރި ފުޅިއެއް ފަދަ އެއްޗަކުން ތަކުރާރުކޮށް، ހާއްސަކޮށް ބޮލަށް އަމާޒުކޮށް ހަމަލާދިނުމަކީ ނުރައްކާތެރި ކަމެއް ކަމަށެވެ.
ކޯޓުގައި ދެއްކި ސީސީޓީވީ ފޫޓޭޖުން ފެންނަ ގޮތުގައި، ބްރައުން ވަނީ ދިއާއުގެ ގައިގައި ފުޅިން ހަތަރު ފަހަރު ޖަހާފަ އެވެ. އޭގެ ތެރެއިން ދެ ފަހަރު ބޮލުގައި ޖެހުނުއިރު، އަނެއް ދެ ފަހަރު ޖެހުނީ އޭނާގެ ކޮނޑުގަ އެވެ.
ބްރައުންގެ މައްޗަށް ހުކުމް އިއްވަވަމުން ފަނޑިޔާރު ވިދާޅުވީ، މިއީ ކުރިން ރާވައިގެން ހިންގި މާރާމާރީއެއް ނޫން ނަމަވެސް، މީހުން ގިނަ ނައިޓްކްލަބެއްގެ ތެރޭގައި ދެ މީހަކު ބައިވެރިވެގެން ހިންގި ސީރިއަސް މާރާމާރީއެއް ކަމަށެވެ.
މީހުން ގިނަ ކްލަބެއްގެ ތެރޭގައި މިފަދަ ހަމަލާތައް ދިނުމަކީ، ހަމަލާ އަމާޒުވާ މީހާގެ އިތުރުން ކައިރީގައި ތިބޭ އެހެން މީހުންނަށް ވެސް އޮތް ބޮޑު ނުރައްކަލެއް ކަމަށް ފަނޑިޔާރު ބްރައުންއަށް ވިދާޅުވި އެވެ.
މީގެ އިތުރުން، ބްރައުންގެ އަމަލުތަކަކީ "ވަރަށް ނުރައްކާތެރި" އަމަލުތަކެއް ކަމަށާއި، އޭނާ އެ ހަމަލާ ހުއްޓާލީ އެހެން މީހުން އައިސް އޭނާ ދުރަށް ޖެއްސުމުން ކަމަށް ވެސް ފަނޑިޔާރު ފާހަގަކުރެއްވި އެވެ.
ފަނޑިޔާރު އިތުރަށް ވިދާޅުވީ، ބްރައުންގެ މަޝްހޫރުކަމާއި، ވިޔަފާރީގެ ކާމިޔާބީ އަދި މުޖުތަމައުގައި އޮތް މަގާމުގެ ސަބަބުން އޭނާއަށް ހާއްސަ އިނާޔަތްތަކެއް ނުލިބޭނެ ކަމަށާއި، ގާނޫނު އެންމެންގެ މައްޗަށް ހިނގާނީ ހަމަހަމަކޮށް ކަމަށެވެ.
ނަމަވެސް، ބްރައުން ކުށަށް އިއުތިރާފުވުމާއި، ކަފާލާތުގެ ޝަރުތުތަކަށް ބޯލަނބާފައިވުމާއި، އަދި އޭނާ ޖަލަށްލުމުން އޭނާގެ ދަރިންނަށް ކުރާނެ އަސަރަށް ފަނޑިޔާރު ބޯމްގާޓްނާ ރިއާޔަތްކުރެއްވި އެވެ. އަދި ބްރައުންގެ ފަރާތުން އިތުރު ކުށެއް ފެނުމުގެ ފުރުސަތު ކުޑަ ކަމަށް ވެސް ފަނޑިޔާރު ވިދާޅުވި އެވެ.
ބްރައުން އާއި އަކިންލޯލޫ ވަނީ މިދިޔަ ޖުލައި މަހު ސައުތުވޯކް ކްރައުން ކޯޓުގައި، އާންމު މަސްލަހަތު ގެއްލޭ ފަދަ މާރާމާރީ ހިންގިކަމުގެ ދައުވާއަށް އިއުތިރާފުވެފަ އެވެ.
މީގެ ކުރިން ބްރައުންގެ މައްޗަށް މިއަށްވުރެ ސީރިއަސް ދައުވާތަކެއް އުފުލި ނަމަވެސް، އޭނާ އެ ދައުވާތަކަށް އިންކާރުކުރުމުން ފަހުން އެ މައްސަލަތައް ވަނީ އަނބުރާ ގެންގޮސްފަ އެވެ.
އޭރު އޭނާގެ މައްޗަށް އުފުލާފައިވަނީ މީހަކަށް ހަމަލާދިނުމާއި، މީހަކަށް ބޮޑު އަނިޔާއެއް ދޭން އުޅުމާއި، އަދި ނުރައްކާތެރި ހަތިޔާރެއް ގެންގުޅުމުގެ ދައުވާ އެވެ.
އުމުރުން 37 އަހަރުގެ ކްރިސް ބްރައުންއަކީ "ޓާން އަޕް ދަ މިއުޒިކް"، "އަޔޯ"، "ފްރީކީ ފްރައިޑޭ"، "ރަން އިޓް"، "ފޯއެވާ"، "ޔޭ 3އެކްސް" އަދި "ޑޯންޓް ވޭކް މީ އަޕް" ފަދަ މަޝްހޫރު ލަވަތައް ކިޔާފައިވާ، އާރް އެންޑް ބީ މިއުޒިކް ދާއިރާގައި މިހާރު ހުރި އެންމެ ބޮޑު އެއް ތަރި އެވެ.
