ޗައިނާއިން ހިންގާ "ބެލްޓް އެންޑް ރޯޑް" މަޝްރޫއާ ގުޅިފައިވާ އެއްބަސްވުންތަކެއް އޮސްޓްރޭލިއާއިން އުވާލުމުން ދެ ގައުމުގެ ގުޅުން އިތުރަށް ގޯސްވެއްޖެ އެވެ.
އޮސްޓްރޭލިއާގެ މައި ސަރުކާރުން ވަނީ ވިކްޓޯރިއާ ސްޓޭޓުން ޗައިނާ އާއެކު ސޮއިކޮށްފައިވާ ދެ އެއްބަސްވުމަށް އުވާލާފަ އެވެ. ސަބަބެއް ކަމަށް ބުނީ ގައުމުގެ މަސްލަހަތު ހިމާޔަތް ކުރުމެވެ.
އޮސްޓްރޭލިއާގައި ހުންނަ ޗައިނާގެ އެމްބަސީން އެކަން ސިފަކުރީ ހަމަލާއެއް ގޮތަށެވެ. އަދި އެއީ ދެ ގައުމުގެ ގުޅުން އިތުރަށް ގޯސްވާނެ ކަމެއް ކަމަށް ބުންޏެވެ.
އޭގެ އިތުރުން ދެ ގައުމުގެ ގުޅުން ރަނގަޅު ކުރަން އޮސްޓްރޭލިއާ ސަރުކާރުގެ އެއްވެސް އިހުލާސްތެރި ކަމެއް ނެތް ކަމަށް އެމްބަސީން ނެރުނު ބަޔާނުގައި ވެއެވެ.
މިއީ އޮސްޓްރޭލިއާގެ ސްޓޭޓްތަކާއި ސަރަހައްދީ ސަރުކާރުތަކާއި ޕަބްލިކް ޔުނިވާސިޓީތަކުން ބޭރު ގައުމުތަކާ އެކު ވެފައިވާ އެއްބަސްވުމެއް އުވާލަން މައި ސަރުކާރުން ބާރުގެ ބޭނުން ކުރި ފުރަތަމަ ފަހަރެވެ. ގައުމުގެ މަސްލަހަތަށް ގެއްލުންވާ ކަމަށް ފެންނަ ނަމަ އެއްބަސްވުން އުވާލުމުގެ ބާރު ގާނޫނުން މައި ސަރުކާރަށް ލިބިދެ އެވެ.
ޗައިނާގެ އެއްބަސްވުންތަކުގެ އިތުރުން އިރާނާއި ސީރިއާ އާއެކު އެކުލަވާލި އެއްބަސްވުންތަކެއް ވެސް ފޮރިން މިނިސްޓަރު މެރީސް ޕެއިން ވަނީ އުވާލައްވާފަ އެވެ.
އެއީ ވިކްޓޯރިއާ ސްޓޭޓުގެ ތައުލީމާ ބެހޭ ޑިޕާޓްމަންޓުން 2004 ވަނަ އަހަރު އިރާނާއެކު ސޮއިކުރި މެމޮރެންޑަމް އޮފް އަންޑަސްޓޭންޑިންއަކާއި 1999 ވަނަ އަހަރު ސީރިއާ އާއެކު ސައިންސްގެ ދާއިރާއިން ގުޅިގެން މަސައްކަތް ކުރުމަށް ސޮއިކުރި އެއްބަސްވުމެކެވެ.
ޕެއިން ވިދާޅުވީ އުވާލި ހަތަރު އެއްބަސްވުމަކީ ވެސް އޮސްޓްރޭލިއާގެ ހާރިޖީ ސިޔާސަތަށް ނުފެތޭ އަދި ހާރިޖީ ގުޅުންތަކަށް ނުރަނގަޅު އަސަރު ކުރާނެ އެއްބަސްވުންތަކެއް ކަމަށެވެ.
އޮސްޓްރޭލިއަން ބްރޯޑްކާސްޓިން ކޯޕޮރޭޝަނަށް ދެއްވި އިންޓަވިއުގައި އެކަމަނާ ވިދާޅުވީ އެއްބަސްވުންތައް އުވާލުމަކީ ރަނގަޅު ނިންމުމެއް ކަމަށާއި އެކަމާ ބަދަލު ހިފުމަށް ޗައިނާއިން ކަމެއް ނުރާނެ ކަމަށް ގަބޫލުނުކުރެއްވޭ ކަމަށެވެ.
