އަފްގާނިސްތާނުގައި ސުލްހަ ގާއިމް ކުރުމުގެ މަޝްވަރާތައް ރޯދަ މަސް ނިމެންދެން ފަސް ކުރަން ނިންމާފައިވާ ކަމަށް ތުރުކީއިން ބުނެފި އެވެ.
"އަޅުގަނޑުމެންނަށް ފެނުނީ މަޝްވަރާ ފަސްކުރުމުން ފައިދާވާނެ ކަމަށް. މި ކަމުގައި ގަތަރު، އެމެރިކާ އަދި އދ. ގެ މަޝްވަރާ ހޯދިން. އެއަށްފަހު ނިންމީ ރޯދަ މަހާއި އީދަށް ފަހު ބައްދަލުވުން ބާއްވަން،" ތުރުކީގެ ފޮރިން މިނިސްޓަރު މެވްލުތް ކަވުސޮގްލޫ އެ ގައުމުގެ ހަބޭޓާކް ނޫހަށް ވިދާޅުވި އެވެ.
އޭނާ ވިދާޅުވީ އަފްގާނިސްތާނުން އެމެރިކާ އާއި ނޭޓޯގެ ސިފައިން ފައިބާނެ އެންމެ ފަހު ތާރީހަކަށް ސެޕްޓެމްބަރު 11 ކަނޑައަޅާފައި ވާތީ، މަޝްވަރާ ފަސްކުރިޔަސް ވާނެ ގެއްލުމެއް ނެތް ކަމަށެވެ.
ރޯދަ މަހާއި އީދަށް ފަހު މަޝްވަރާ ބާއްވާ ނަމަ އެންމެ އަވަހަށް ވެސް ބޭއްވޭނީ މޭ މަހުގެ މެދު ތެރޭގަ އެވެ.
ހަނގުރާމައިގެ ސަބަބުން ސުންނާފަތިވެފައިވާ އަފްގާނިސްތާނަށް މި ބައްދަލުވުމަކީ މުހިއްމު ބައްދަލުވުމެކެވެ. މިއީ އެމެރިކާ ސިފައިން ގައުމުން ފޭބުމުން ސުލްހަ ގާއިމް ކުރާނެ ގޮތުގެ މަގު ޗާޓު އެކުލަވާލަން ލިބޭ ފުރުސަތެވެ. ކުރިން މި ބައްދަލުވުން ތާވަލުކުރީ އޭޕްރިލް 24 އިން މޭ 24 އަށެވެ.
މީގެ ކުރިން ތާލިބާނުން ވަނީ ބޭރުގެ ސިފައިން އަފްގާނިސްތާނުން ނުފައިބާ ތިބިހާ ހިނދަކު މަޝްވަރާގައި ބައިވެރި ނުވާނެ ކަމަށް ބުނެފަ އެވެ.
"ތާލިބާނުން ބައިވެރި ނުވާ ނަމަ ބައްދަލުވުމުގެ އެއްވެސް މާނައެއް ނޯންނާނެ. މި ވަގުތު ބައްދަލުވުން ފަސް ކުރަން ނިންމީ، ބައިވެރިވާނެ ފަރާތްތަކުގެ މައުލޫމާތު ޔަގީން ނުވާތީ،" ތާލިބާނުންގެ ފަރާތުން އެއްބާރުލުން ނުލިބޭކަން ފާހަގަކުރައްވާ ކަވުސޮގްލޫ ވިދާޅުވި އެވެ.
އަފްގާނިސްތާނުގެ ސަރުކާރުގެ އޮފިޝަލުން ވެސް ބުނީ ބައްދަލުވުން ފަސްކުރަން ޖެހުނީ ތާލިބާނުން ބައިވެރިވާނެ ކަމުގެ ނިޝާނެއް ނުފެނުމުން ކަމަށެވެ.
ތާލިބާނުންގެ ތަރުޖަމާނު މުހައްމަދު ނައީމް ރޮއިޓާޒްއަށް ވިދާޅުވީ ބައްދަލުވުން ފަސްކުރިކަން ނާންގާ ކަމަށާއި ރޯދަ މަހަށް ފަހު ބައްދަލުވުމުގައި ބައިވެރިވާނެ ކަމާ މެދު އެއްޗެއް ދަންނަވަން ނޭނގޭ ކަމަށެވެ.
މިދިޔަ އަހަރު އެމެރިކާ އާއި ތާލިބާނުންނާ ދެމެދު އެއްބަސްވީ މި އަހަރުގެ މޭ މަހުގެ ކުރިން ހުރިހާ ސިފައިން އެ ގައުމުން ފޭބުމަށެވެ. ނަމަވެސް މިދިޔަ ހަފްތާގައި އެމެރިކާއިން ވަނީ އެ ސުންގަޑި ސެޕްޓެމްބަރާ ހަމައަށް ދިގުދަންމާލާފަ އެވެ.
