ފުރަތަމަ ޑިވިޝަންގެ ފުޓްބޯޅަ ކްލަބްތައް މާލީ ގޮތުން ދަތި ހާލަތަކަށް ވެއްޓޭއިރު، މުސާރަ ނުލިބި ކުޅެން ޖެހުމުން ކުޅުންތެރިންގެ ކެތްތެރިކަން ވަރަށް ރަނގަޅަށް ފެންނަ ކަމަށް ކްލަބް ވެލެންސިއާގެ ކޯޗު މުހައްމަދު އާތިފް (އާތީ) ބުނެފި އެވެ.
ގައުމީ ޓީމުގެ އެސިސްޓަންޓް ކޯޗަކަށް މަސައްކަތްކޮށްފައިވާ އާތީ ވަނީ ފުރަތަމަ ޑިވިޝަންގެ ގިނަ ކްލަބްތަކެއްގައި މަސައްކަތްކޮށްފަ އެވެ. އޭގެ ތެރޭގައި ޔުނައިޓެޑް ވިކްޓްރީ (ޔޫވީ) ވިކްޓްރީ އަދި ޓީސީ ސްޕޯޓްސް ކްލަބް ވެސް ހިމެނެ އެވެ.
މިދިޔަ 10 ވަރަކަށް އަހަރަށް ބަލާއިރު ފުރަތަމަ ޑިވިޝަނުގެ ގިނަ ކްލަބްތަކެއްގެ ކުޅުންތެރިންނަށް މުސާރަ ނުލިބޭ މައްސަލަ ވަނީ އެފްއޭއެމަށް ވެސް އެތަކެއް ފަހަރަކު ހުށަހަޅައިފަ އެވެ. ގިނަ ކުޅުންތެރިން ވަނީ އެފްއޭއެމް މެދުވެރިކޮށް މުސާރަ ހޯދައިފަ އެވެ.
މުސާރަ ނުދޭ މައްސަލައިގައި ރާއްޖޭގެ އެންމެ ކާމިޔާބު ކްލަބް ނިއު ރޭޑިއަންޓް ސަސްޕެންޑްކޮށްފައި އޮންނަތާ ދެ އަހަރަށް ވުރެ ގިނަ ދުވަސްވީ އެވެ. މި ސީޒަނުގައި ވެސް މިހާތަނަށް ބަލާއިރު ގަވާއިދުން މުސާރަ ނުދެވުމުގެ މައްސަލަތައް އަންނަނީ ކުރިމަތިވަމުންނެވެ.
މިދިޔަ 10 ވަރަކަށް އަހަރަށް ބަލާނަމަ ވެލެންސިއާގައި ވެސް މުސާރައިގެ ގިނަ މައްސަލަތަކެއް ޖެހުނެވެ. އެކަަމަކު މި އަހަރުގެ މިހާތަނަށް އެކަން އެގޮތަށް ދިމާނުވާ ކަމަށާއި ކޯޗުންނަށް މެޗަށް އެއްކޮށް ފޯކަސް ކޮށްލައިގެން މަސައްކަތްކުރެވޭނެ މާހައުލެއް އެބައޮތް ކަމަށް އާތީ ވަނީ ބުނެފަ އެވެ.
އިއްޔެ ބޭއްްވި ނޫސްވެރިންގެ ބައްދަލުވުމުގެ ތެރެއިން ވެލެންސިއާގެ ކޯޗު މުހައްމަދު އާތިފް (އާތީ).-- ފޮޓޯ: އިބްރާހިމް ފާއިދު/ އެފްއޭއެމް
"ވެލެންސިއާގެ މި އަހަރުގެ ތަޖުރިބާ އަށް ބަލާއިރު. އަޅުގަނޑުމެން އެއްގޮތަކަށް ވެސް އެކަމާ ވިސްނާކަށެއް ނުޖެހޭ. އެ ހުރިހާ ކަމެއް އެބަދޭ ރަނގަަޅަށް. އަޅުގަނޑު މެން ކޮޅުގައި ބޯޅަ އޮތީ. އަޅުގަނޑުމެންނަށް އެބަޖެހޭ ވީވަރަކުން ޕޮއިންޓްތައް ނަގަމުން (ޕޮއިންޓް ޓޭބަލްގެ) މައްޗަށް އަަރަން މަސައްކަތްކުރަން،" ޔުނައިޓެޑް ވިކްޓްރީއާ ދެކޮޅަށް މާދަމާރޭ ކުޅޭ މެޗުގެ ކުރިން އިއްޔެ ބޭއްވި ނޫސްވެރިންގެ ބައްދަލުވުމުގައި އާތީ ބުންޏެވެ.
އާތީ ވަނީ ކޯޗިންގައި އޭނާގެ ތަޖުރިބާ އަށް ބަލާއިރު ފުރަތަމަ ޑިވިޝަނުގައި ފެނިފައި ހުރި ކަންތައްތަކަށް ބަލައި ދެކޭ ގޮތް ހިއްސާކޮށްފަ އެވެ. އޭނާ ބުނީ ހަގީގަތުގައި މުސާރަ ނުލިބި ވެސް ގިނަ ކުޅުންތެރިންތަކެއް ކުޅޭ ސަބަބަކީ އެ ކުޅުންތެރިންގެ ކެތްތެރިކަމާއި ދަތިވަގުތުގައި ކްލަބަށް އެހީވާން ބޭނުންވެފައި ހުންނަ ހުރުން ކަމަށެވެ.
"އަޅުގަނޑު މި ލީގުތަކުގައި ވޯކްކުރާތާ ފުދޭ ވަރަކަށް އަހަރުތަކެއްވެގެން މިދިޔައީ. އައިއިރު އަޅުގަނޑު ހަމަ ގަބޫލުކުރާގޮތުގައި ޕްލޭޔަރުންނަކީ ވަރަށް ކެތްތެރި ޕްލޭޔަރުންތަކެއް. އެކި ޓީމުތަކުގައި އަޅުގަނޑު މަސައްކަތްކުރިއިރު، އެއީ ފައިނޭންޝިއަލީ ވެއްޓިގެންދާތަނުގައި ވެސް ކުޅުންތެރިން ވަރަށް ބޮޑަށް ސަޕޯޓިވްވޭ ކްލަބްތަކަށް ޓީމަށް ސެކްރިފައިސް ވުމަށާއި ބައިވަރެއް ގޮތްގޮތަށް،" އާތީ ބުންޏެވެ.
"ފައިނެންޝިއަލީ މިހެން ވެއްޓިގެންދާއިރު (ކުޅުންތެރިންގެ) އާއިލާ އަށް ދިމާވާ ދަތިތަކުގައި މެންޓަލީ ކުދި ކުދި ލޮޅުންތަކެއް އަންނާނެ. ރާއްޖޭގެ ކުޅުންތެރިންނަކީ ނިސްބަތުން ފައިނޭންޝިއަލީ ޓީމުތަކަށް ސަޕޯޓް ދީ ހެލްޕްވާ ބައެއް،"
ކުޅުންތެރިންނަށް ދޭ މުސާރަ މައްސަލަ ހައްލުވާނެ ކަމަށް އެންމެ ބޮޑަށް ބެލެވުނީ އެންމެ ފަހުން އޮތް ސަރުކާރުން 2017 ވަނަ އަހަރު އެސްއޯއީ އެގްރީމެންޓްތަކެއް ހަދައި ސަރުކާރު ހިއްސާވާ ކުންފުނިތަކުން ކްލަބްތަކަށް ބަޖެޓް ދޭން ނިންމުމުންނެވެ. އެކަމަކު އެސްއޯއީ ފައިސާ ލިބިގެން ދެ ސީޒަން ނިންމާލިއިރު ވެސް ބައެއް ކްލަބްތައް އޮތީ ކުޅުންތެރިންނަށް ދޭން ޖެހޭ ފައިސާ ނުދީ އެވެ.
،މި ސަރުކާރު އައި ފަހުން އެސްއޯއީ އެގްރީމެންޓް އާ ނުކުރަން ނިިންމި އެވެ. އެހެންވެ ކްލަބްތަކަށް ފަންޑް ދޭން ފެށީ އެފްއޭއެމުންނެވެ. މިދިޔަ ސީޒަނުން ފެށިގެން އެފްއޭއެމުން ކްލަބްތަކަށް ފަންޑް ދޭން ފެށިއިރު، އެ އެސޯސިއޭޝަންގެ ދުރު ރާސްތާ ވިސްނުމަކީ ކުރިއަށް އޮތްތަނުގައި ބޭރުން ބައެއްގެ މާލީ އެހީތެރިކަން ހުރިހާ ފަހަރަަކު ދިނުމުގެ ބަދަލުގައި ކްލަބްތައް އަމިއްލަ ފައި މައްޗަށް ތެދުވެވޭ ވަރު ކުރުމެވެ.
ފުރަތަމަ ޑިވިޝަންގައި ވާދަކުރަން ފެށިއްސުރެ މުސާރަ މައްސަލައެއް ނުޖެހި އޮތް ހަަމައެކަނި ކްލަބަކީ މާޒިޔާ އެވެ.
