ލަންޑަން (އޭޕްރީލް 21) - އިނގިރޭސި ސަރުކާރާއި ސަޕޯޓަރުން އަދި ޔުއެފާގެ ޕްރެޝަރު އިންތިހާ އަށް ބޮޑުވުމާ އެކު ޔޫރަޕިއަން ސުޕަ ލީގުން ރަސްމީކޮށް ވަކިވާން އިނގިރޭސި ހަ ކްލަބުން ނިންމައިފި އެވެ.
މިދިޔަ އާދިއްތަ ދުވަހު ޔުއެފާ އާއި ފީފާ އިން އިންޒާރު ދެމުން ދަނިކޮށް ސުޕަ ލީގު އިއުލާނުކުރިއިރުގައި ފައުންޑަރުންގެ ގޮތުގައި ތިބި 12 ކްލަބްގެ ތެރޭގައި އިންގްލެންޑްގެ ހަ ކްލަބް ހިމެނެ އެވެ. އެއީ މެންޗެސްޓާ ޔުނައިޓެޑާއި މެންޗެސްޓާ ސިޓީ، ލިވަޕޫލް، ޗެލްސީ، ޓޮޓެންހަމް އަދި އާސެނަލް އެވެ.
ސުޕަ ލީގު ދޫކޮށްލިކަން އެންމެ ފުރަތަމަ ރަސްމީކޮށް އިއުލާނުކުރި ކްލަބަކީ ސިޓީ އެވެ. އޭގެ ފަހުން ދެން އޮތް ފަސް ކްލަބުން ވެސް ކުރީ އެވެ. ސުޕަ ލީގުގެ ޗެއާމަނަކަށް ހުރި ރެއާލް މެޑްރިޑްގެ ރައީސް ފްލޮރެންޓީނޯ ޕެރޭޒް މިއަދު ވަނީ އެގްރީމެންޓްގައި ސޮއިކޮށްފައިވާ އެއްވެސް ކްލަބަކަށް ދެން ފަހަތައް ޖެހެން ފަސޭހަނުވާނެ ކަމަށް ވިދާޅުވެފަ އެވެ.
އެކަމަކު މެޑްރިޑްގެ އޮފިޝަލުންނާ ހަވާލާދީ ސްޕެއިނުގެ މީޑިއާ ރިޕޯޓްތައް ބުނާގޮތުން ފައުންޑަރު މެމްބަރުންގެ ގޮތުގައި ތިބި ކްލަބްތަކުގެ މެޖޯރިޓީ އޭގެއިން ވަކިވެއްޖެނަމަ މުބާރާތް ޖެހޭނީ ހުއްޓާލާށެވެ. އެ ހިސާބުން އެ ޕްރޮޖެކްޓަށް ނިމުން އައީ އެވެ. ޕްރިމިއާ ލީގުގެ ކްލަބްތަކުން ރަސްމީކޮށް ސުޕަ ލީގުން ވަކިވިއިރު، ބާސެލޯނާ އާއި އެތުލެޓިކޯ މެޑްރިޑް ވެސް ވަރަށް އަވަހަށް ސުޕަ ލީގުން ވަކިވާނެ އެވެ. މިއާ އެކު ސުޕަ ލީގު ހުއްޓުމަކަށް އަންނާނެ އެވެ.
އާސެނަލްގެ ކުރީގެ ކޯޗު އަދި ފީފާގެ ގްލޯބަލް ޑިވެލޮޕްމަންޓްގެ ހެޑް އާސެން ވެންގާ މިރޭ ބީން ސްޕޯޓްސް އަށް ދިން އިންޓަވިއުއެއްގައި ބުނީ ފުޓްބޯޅައިގެ އިތުރުން ކުޅިވަރުގެ ހުރިހާ އުސޫލަކާ ހިލާފަށް ހަދާފައިވާ މުބާރާތެއް ކުރިއަށް ނުދާނެކަން އޭނާ އަށް މާ ކުރިން ވެސް އެނގޭ ކަމަށެވެ. އަދި މި ލީގުގައި ބައިވެރިވި އިނގިރޭސި ކްލަބްތަކަށް ކޮންމެވެސް ފިޔަވަޅެއް އަޅަންޖެހޭ ކަމަށް ވެންގާ ގަބޫލުކުރެ އެވެ.
ސުޕަ ލީގުގެ ކަންތައްތަކާ އެންމެ އިސްކޮށް އުޅުނު ޔުނައިޓެޑްގެ އެގްޒެކްޓިވް ވައިސް ޗެއާމަން އެޑް ވުޑްވާޑް މި އަހަރަށް ފަހު މަގާމުން ވަކިވާނެ އެވެ. އެކަން އެ ކްލަބުން ވަނީ ރަސްމީކޮށް އިއުލާނުކޮށްފަ އެވެ.
ސުޕަ ލީގާ ދެކޮޅަށް ކްލަބްތަކުގެ ސަޕޯޓަރުން އެ ޓީމުތަކުގެ ހޯމް ސްޓޭޑިއަމް ބޭރުގައި މިއަދު އަޑުއުފުލައި ބެނާ ހަރުކުރުމުގެ އިތުރުން މުޒާހަރާކުރި އެވެ. އަދި އިނގިރޭސި ސަރުކާރުން ވެސް ވަނީ ސުޕަ ލީގާ ދެކޮޅަށް ޕްރިމިއާ ލީގުން އަޅާ ކޮންމެ ފިޔަވަޅަކަށް ތާއީދުކުރާނެ ކަމަށް ބުނެފަ އެވެ. ސުޕަ ލީގުގައި ބައިވެރިވި އެއްވެސް ޓީމެއްގެ ކޯޗެއް އެ އަށް ތާއީދުކޮށް ވާހަކަ ދައްކާފައިނުވެ އެވެ. ސުޕަ ލީގުގައި ބައިވެރިނުވާން ކްލަބްތަކުން ނިންމި ނިންމުމަށް ކުޅުންތެރިން ވަނީ މަރުހަބާ ކިޔައިފަ އެވެ.
