މޯލްޑިވްސް އިންލެންޑް ރެވެނިއު އޮތޯރިޓީ (މީރާ)އިން ޓެކްސް ދައްކަންޖެހޭ މުއްދަތު ފަސްކޮށް، ޓެކްސް ނުދައްކާ ފަރާތްތަކާ ދެކޮޅަށް ފިޔަވަޅު އެޅުން ހުއްޓާލުމުގެ ނޭދެވޭ އަސަރު ދައުލަތުގެ އާމްދަނީއަށް ކުރަމުން އަންނަ ކަމަށް ރައްޔިތުންގެ މަޖިލީހުގެ އެސްއޯއީ ކޮމިޓީގެ ހޯދުންތަކުން ދައްކައިފި އެވެ.
އެސްއެމްއީތަކާ ގުޅިގެން އެސްއޯއީ ކޮމިޓީން ދިރާސާކުރަމުން އަންނަ މައްސަލައެއްގެ ރިޕޯޓުގައި ވަނީ، މީރާއިން ވިޔަފާރިތަކަށް ދީފައިވާ ލުއިތަކާއި އެ ލުއިތަކުގެ ސަބަބުން ދައުލަތުގެ އާމްދަނީއަށް ކުރަމުން އަންނަ އަސަރުތަކަށް އަލިއަޅުވާލައިފަ އެވެ.
އަދި މި ފިޔަވަޅުތަކުގެ ނާޖާއިޒު ފައިދާ ނެގުމުގެ ފުރުސަތު ބޮޑުވެ، ދައުލަތަށް ލިބޭނެ ކަމަށް އަންދާޒާ ކުރި ވަރަށް އާމްދަނީ ނުލިބުމުގެ ފުރުސަތު އެބައޮތް ކަމަށް ރިޕޯޓުގައި ފާހަގަކުރި އެވެ.
ކޮވިޑް-19ގެ ސަބަބުން މީރާއިން ދިން ލުއިތައް
- ބީޕީޓީ ދެއްކުން ފަސްކޮށް ދިނުން
- އިންސްޓޯލްމަންޓުން ޓެކްސް ދެއްކޭނެ އިންތިޒާމް ހަމަޖެއްސުން
- އެންފޯސްމަންޓް އެކްޝަން ނެގުން ހުއްޓާލުން
- ޖޫރިމަނާތައް މައާފުކުރުން
އެސްއޯއީ ކޮމިޓީއަށް މީރާއިން މައުލޫމާތު ދީފައިވާ ގޮތުގައި، މި ފިޔަވަޅުތަކާއެކު މިދިޔަ އަހަރު އެ އިދާރާއިން އެއްވެސް ވިޔަފާރިއަކާ ދެކޮޅަށް ކޯޓަށް މައްސަލައެއް ހުށަހަޅާފައެއް ނުވެ އެވެ. އަދި ބޭންކު އެކައުންޓުތައް ފްރީޒްކުރުމާއި ސްކިޕް އެންޑް ޓްރޭސް މެދުކަނޑާލި އެވެ.
މީރާ އިން ބުނީ ގާނޫނުގެ ތެރެއިން ޓެކްސް ދެއްކުމުގައި ވިޔަފާރިތަކަށް ދެވެން ހުރި ހުރިހާ ލުއިތަކެއް 2020 ވަނަ އަހަރުގެ ތެރޭގައި ފޯރުކޮށް ދިން ކަމަށެވެ.
މީރާގެ ލުއިތަކާ ގުޅިގެން ކޮމިޓީގެ ކަންބޮޑުވުން
އެސްއޯއީ ކޮމިޓީގެ ރިޕޯޓުގައި ފާހަގަކޮށްފައިވާ ގޮތުގައި، މީރާއިން ދީފައިވާ ލުއިތަކުގެ ސަބަބުން ކޭޝްފްލޯގް މައްސަލަ ދިމާވެފައި ނުވާ ފަރާތްތަކުން ވެސް ޓެކްސް ދެއްކުން ފަސްކުރުމުގެ ފުރުސަތު އޮންނާނެ އެވެ. އަދި، ޖޫރިމަނާ ކުރުން މެދުކަނޑާލާފައި އޮތުމުގެ ސަބަބުން ޓެކްސް ނުދައްކާ މީހުން އިތުރުވެ ޓެކްސް ކޮމްޕްލަޔަންސް ދަށަށް ދާނެ އެވެ.
މިއީ ޓެކްސްއަށް މަކަރު ހަދާ ފަރާތްތަކަށް ވެސް ނަހަމަ ގޮތުގައި ބޭނުން ހިފުމުގެ ފުރުސަތު ބޮޑު ކަމެއް ކަމަށް ރިޕޯޓުގައި ފާހަގަކުރި އެވެ.
ރާއްޖޭގެ ޓެކްސް ނިޒާމަކީ ސެލްފް އެސެސްމަންޓް ނިޒާމެއް ކަމުން ޓެކްސް ކޮމްޕްލަޔަންސް ދެނެގަނެވެނީ މިހެން ކުރާ އޮޑިޓްތަކާއި މީރާގެ ރަސްމީ ސާވޭތަކުން ހޯދާ މައުލޫމާތުންނެވެ.
މާރުކޭޓުގައި ބަޔަކު ވިޔަފާރި ކުރަނީ: ޓެކްސް މުއްދަތުތައް ފަސްކުރި ނަމަވެސް ޓެކްސް އާމްދަނީ ހީކުރި ވަރަށް ވުރެ ރަނގަޅު -- ފޮޓޯ: ހުސެއިން ވަހީދު/ އަދަދު
ދައުލަތުގެ އާމްދަނީއާ ގުޅިގެން އެސްއޯއީ ކޮމިޓީގެ ކަންބޮޑުވުންތަކެއް ހުރި ނަމަވެސް، އަހަރުގެ ފުރަތަމަ ތިން މަސް ދުވަހުގެ މީރާއިން ބަލައިގަތް އާމްދަނީ އުޅެނީ އަންދާޒާތަކުން މަތީގަ އެވެ. ފުރަތަމަ ކުއާޓަރުގައި ޓެކްސް އާމްދަނީން އެކަނިވެސް 3.3 ބިލިއަން ރުފިޔާ ލިބުނެވެ.
