ކުޅުމުގެ ކެރިއަރުގައި ވެސް އެންމެ އުނދަގޫކަމަކަށްވީ ތަށި ދިފާއުކުރުން ކަމަށާއި އެ ވިސްނުމުގައި ބަލާއިރު، ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް)ގެ ރައީސަކަށް އައިސް ކުރަން ޖެހިފައިވާ މަސައްކަތުގެ ތެރެއިން އުނދަގޫ ކަމަކަށް ވާނެ އެއް ކަމަކީ މެޑަލް ދިފާއުކުރުން ކަމަށް ވީއޭއެމްގެ ރައީސް މުހައްމަދު ރަނޭޝް (ރަނޭ) ވިދާޅުވެއްޖެ އެވެ.
ވޮލީ ފިިރިހެން ގައުމީ ޓީމުން ވަނީ ސެންޓްރަލް ޒޯން ވޮލީބޯޅަ މުބާރާތުން ރިހި އަދި ލޯ މެޑަލް ހޯދައިފަ އެވެ. ގައުމީ އަންހެން ވޮލީ ޓީމުން ވެސް ވަނީ ސެންޓްރަލް ޒޯން އަންހެން މުބާރާތުން ރިހި މެޑަލް ގެނެސްފަ އެވެ. މީގެ އިތުރުން އިންޑިއަން އޯޝަން އައިލެންޑް ގޭމްސް (އައިއޯއައިޖީ) އިން ބީޗް ވޮލީބޯޅަ ޓީމު ވެސް ދާދި ފަހުން ވަނީ ރިހި މެޑަލް ގެނެސްފަ އެވެ.
"އިންޑިވިޖުއަލީ ބަލައިފިއްޔާ އަޅުގަނޑުމެންގެ އަންހެން ޓީމު ވެސް އަދި ފިރިހެން ޓީމު ވެސް އެބަތިބި މި ރީޖަންގައި ތަފާތު މޮޅު ކުޅުންތެރިއެއް. އަޅުގަނޑުމެންގެ ފިރިހެން ޓީމަކީ މެޑަލް ހޯދަމުން އަންނަ ޓީމެއް. އަންހެން ޓީމަކީ މެޑަލް ހޯދާފައި އޮތް ޓީމެއް. އަޅުގަނޑަށް މިހާރު ކުރަން ޖެހިފައި އޮތް މަސައްކަތަކަށްވާނީ ހަގީގަތުގައި މެޑަލް ދިފާއުކުރުން،" ދާދި ފަހުން "އަދަދު" އަށް ދެއްވި އިންޓަވިއުއެއްގައި ރަނޭ ވިދާޅުވި އެވެ.
"އަޅުގަނޑު ކުޅުނުއިރުގައި ވެސް މެޑަލް ދިފާއު ކުރުމަކީ އެހާ ފަސޭހަކަމެއް ނޫން. އެހެންވީމަ މެޑަލް ދިފާއުކުރަން ކުރަންޖެހޭ މަސައްކަތަކީ މެޑަލް ހޯދަން ކުރަން ޖެހޭ މަސައްކަތަށް ވުރެ ބުރަ މަސައްކަތެއް. ދެން މީގަ އަަޅުގަނޑަށް އެންމެ މުހިއްމު ވަނީ ކޮންސިސްޓެންސީ،"
ވީއޭއެމްގެ ރައީސް ރަނޭ އަދަދު އަށް އިންޓަވިއުދެނީ.
ރަނޭ ވިދާޅުވީ ސެންޓްރަލް ޒޯން މިހާރު ދެ ބަޔަކަށް ބެހިފައި އޮންނައިރު، ރާއްޖެ މި ހިމެނޭ ބީ ގްރޫޕްގައި އޮތް ބަންގްލަދޭޝް އާއި ނޭޕާލަށް ވުރެ ރާއްޖެ މޮޅު ކަމަށެވެ. އެކަމަކު އަންހެން ވޮލީގައި ނޭޕާލް ތަންކޮޅެއް ވަރުގަދަކަން ގަބޫލުކުރާ ކަމަށެވެ.
"އެކަމަކު އަޅުގަނޑުމެންނަށް (އަންހެން ވޮލީ ޓީމަށް) އެ ހިސާބަށް ދެވޭ ވަރުގެ ޓެލެންޓެޑް (ހުނަރުހުރި) ކުޅުންތެރިން އެބަތިބި. ބޭނުންވަނީ އެ ކުޅުންތެރިންނަށް ފުރުސަތު. އެ މަސައްކަތް ރެޔާއި ދުވާލު ކުރެވިއްޖިއްޔާ އެ މެޑަލް ގޯލްޑަކަށް ބަދަލުކުރުމަކީ ވެސް ދުރުގައި އޮތް ކަމެއް ނޫން،" ރަނޭ ވިދާޅުވި އެވެ.
ރާއްޖޭގައި 2023 ވަނަ އަހަރު ބާއްވަން މަސައްކަތްކުރި އައިއޯއައިޖީ މިހާރު އެ އަހަރު ބާއްވާނީ މަޑަގަސްކަރާގަ އެވެ. ރަނޭ ވިދާޅުވީ އެ އަށް ތައްޔާރުވާއިރު ބީޗް ވޮލީބޯޅަ ޓީމުން އެންމެ ފަހުން ހޯދި ކާމިޔާބީ އެހެން ލެވަލަކަށް ގެންދެވޭތޯ ބެލުން ވެސް މުހިއްމު ކަމަށެވެ.
"އައިއޯއިޖީގައި އަޅުގަނޑުމެންގެ މައިގަނޑު މަސައްކަތަކަށް ވާނީ އެހެން ގައުމުތަކުން އެ ކުރާ މަސައްކަތުގެ ޑަބަލް އަޅުގަނޑުމެން ކުރުން. މި ވަގުތު އަޅުގަނޑުމެންނަށް އެ މަސައްކަތެއް ނުުކުރެވޭ. އެހެންވީމަ އަޅުގަނޑުމެން އެބަޖެހޭ އެހެން ގައުމުތަކުން ކުރާ މަސައްކަތުގެ ދެ ގުނަ މަސައްކަތްކުރަން ކޮށްގެން ކާމިޔާބަަކަށް ދެވޭނީ،" ރަނޭ ވިދާޅުވި އެވެ.
ވީއޭއެމްގައި އެންމެ ފަހުން އޮތް ލީޑަޝިޕުގައި ދިމާވި އެކި ކަހަލަ މައްސަލަތަކުގެ ސަބަބުން ގައުމީ ވޮލީބޯޅަ ޓީމުތަަކަށް ވެސް ކޮންމެ ވެސް ވަރެއްގެ އަސަރުތަކެއްް ކޮށްފައިވެ އެވެ. އެކަން ބައެއް ފަހަރު ބައިނަލްއަގުވާމީ މުބާރާތްތައް ކަވަރުކުރަން ދިޔަ މީޑިއާތަކަށް ވެސް ކުޅުންތެރިން ހިއްސާކޮށްފައިވެ އެވެ.
ރަނޭ ވެސް ވަނީ ވީއޭއެމްގެ ހިންގުމުގެ އެ ފަދަ މައްސަލަތަކުގެ ސަބަބުން ކުުޅުންތެރިންނަށް ވެސް އޭގެ އަސަރުކޮށްފައިވާ ކަމަށް ވިދާޅުވެފަ އެވެ.
"އަޅުގަނޑުމެންގެ އެސޯސިއޭޝަން މިދިޔަ ހަތަރު އަހަރު މިދިޔައީ ވަރަށް ހަލަބޮލި މާހައުލެއްގައި. ހަގީގަތުގައި އޭގެ ސަަބަބުން އެއީ މެނޭޖްމަންޓްގައި ހިނގި ކަމެއް ވިޔަސް އެ ކުޅުންތެރިންނަށް މެންޓަލީ ވަރަށް ދަތިތަކެއް އަންނާނެ. އަޅުގަނޑުގެ މަގުސަދަކަށްވާނެ އެ ކޮންސިސްޓެންސީ ހިފެހެއްޓުމާ އަބަދުވެސް އެއް މަންޒިލަކަށް ދަތުރުކުރުން އެންމެން،" ރަނޭ ވިދާޅުވި އެވެ.
ކުރީގެ ގައުމީ ޓީމުގެ ކެޕްޓަން އަދި ވީއޭއެމްގެ މިދިޔަ ދައުރުގައި ސީނިއާ ނައިބު ރައީސެއްގެ މަގާމު އަދާކުރި ރަނޭ ވަނީ ވޮލީ ކްލަބްތަކާއި ކުޅުންތެރިންނަށް ދެމެހެއްޓެނިވި ގޮތެއްގައި ވޮލީން މަންފާކުރާނެ ގޮތެއް ހޯދައި ވޮލީގެ ހިންގުމުން ތަފާތެއް ދައްކާނެ ކަމަށް ވިދާޅުވެފަ އެވެ.
