އެފްއޭއެމް ތިން ވަނަ ޑިވިޝަން ފުޓްބޯޅަ މުބާރާތުގެ ކުޅުން ރޭ ފެށިއިރު ފުރަތަމަ މެޗުން ކްލަބް ބްލޫ ލެޕާޑް ސްޕޯޓްސްއާ ވާދަކޮށް ޓެންޓް ސްޕޯޓްސް ކްލަބް 4-1 އިން މޮޅުވެއްޖެ އެވެ.
އެއް ސީޒަނުގެ މެދުކެނޑުމަށް ފަހު ތިން ވަނަ ޑިވިޝަން އަލުން ފެށިއިރު، ރޭގެ މެޗު ކުޅުނީ ޓާފް އެއް ވަަނަ ދަނޑުގަ އެވެ. ފުރަތަމަ ޑިވިޝަނުގައި ކުޅެފައި ތިބި ތަޖުރިބާކާރު ކުޅުންތެރިން ކަމަށްވާ އާފިއު މުހައްމަދާއި ޔާމީން އިބްރާހިމް (ޔާމްބެ) އަދި އަބްދުﷲ ޒުބައިރު (ޒުއްބަ) ހިމެނޭ ޓެންޓުން ރޭގެ މެޗުގައި މޮޅު ކުޅުމެއް ދެއްކި އެވެ.
ޓެންޓަށް ރޭގެ މެޗުގައި ލީޑުނަގައިދިނީ މެޗުގެ 13 ވަނަ މިނިޓްގައި ޑިފެންޑަރު އިބްރާހީމް ސަނޫނެވެ. އަދި ދެ ވަނަ ލަނޑު 29 ވަނަ މިނިޓުގައި ޖަަހައި ޓެންޓުގެ ލީޑުފުޅާ ކޮށްދިނީ ކުރިން ވެލެންސިއާ އާއި ޓީސީ ސްޕޯޓްސް ކްލަބަށް ކުޅުނު ޔާމްބެ އެވެ.
ދެ ގޯލުގެ ލީޑަކާ އެކު ޓެންޓުން ފުރަތަމަ ހާފު ނިންމާލިއިރު، ޓެންޓް ސްޕޯޓްސް ކުލަބުގެ ފޯވަޑް އަޒްމާން އަހުމަދު ވަނީ ދެ ވަނަ ހާފުގައި އެ ޓީމަށް އިތުރު ދެ ގޯލު ޖަަހައިދީފަ އެވެ. މެޗުގެ އިތުރު ވަގުތުގައި ކްލަބް ބްލޫ ލެޕާޑްގެ ހަމައެކަނި ގޯލު ކާމިޔާބު ކޮށްދިނީ ދެ ވަަނަ ހާފްގައި ބަދަލު ކުޅުންތެރިއެއްގެ ގޮތުގައި ކުޅެން އެރި ފޯވަޑް އަހުމަދު ފިރާޝް އެވެ.
ތިން ވަނަ ޑިވިޝަނުގައި މިރޭ 10 ޖަހާއިރު ކުޅޭ މެޗުގައި ވިލިމާލެ ޔުނައިޓެޑް ބައްދަލުކުރާނީ ދެ ވަނަ ޑިވިޝަނަށް ރަނގަޅު ސްކޮޑަކާ އެކު ތައްޔާރުވި ވިލިމާލެ ޔުނައިޓެޑާ އެވެ.
މުބާރާތުގެ ފޯމެޓް މި ވަގުތު އޮތްގޮތަށް ބަލާއިރު، ފުރަތަމަ ދެ ގްރޫޕްގައި ހަތަރު ޓީމު ހިމެނޭނެ އެވެ. އަދި ދެން އޮތް ދެ ގްރޫޕްގައި ހިމެނޭނީ ތިން ޓީމެވެ. ކޮންމެ ގްރޫޕަކުން ވެސް ދެ ޓީމު ކުއާޓާ ފައިނަލަށް ހޮވޭނެ އެވެ.
ގްރޫޕް އޭގައި ހިމެނެނީ ޓެންޓް ސްޕޯޓްސް ކްލަބް، ކްލަބް ބްލޫ ލެޕާޑް ސްޕޯޓްސް، ބިސްބުރު ސްޕޯޓްސް، ތުޅާދޫ އެވެންޗާސް ސްޕޯޓްސް އެވެ. ގްރޫޕް ބީގައި ހިމެނެނީ ވިލިމާލެ ޔުނައިޓެޑް، ލޮރެންޒޯ ސްޕޯޓްސް ކްލަބް، ކެޕިޓަލް ސިޓީ ސްޕޯޓްސް ކްލަބް އަދި ބެންޗް ސްޕޯޓްސް ކްލަބް އެވެ. ގްރޫޕް ސީގައި އޮތީ ސްޕޯޓްސް ކްލަބް ހޮސްކޯވޯ، ލިޓްލް ޓައުން ސްޕޯޓްސް ކްލަބް އަދި ބުރު ސްޕޯޓްސް ކްލަބް އެވެ. ފަހު ގްރޫޕްގައި ހިމެނެނީ ކްލަބް ޓީނޭޖް، ކްލަބް އޮންލީ ވަން އޮޕޮޗިއުނިޓީ އަދި ރޭޖް ސްޕޯޓްސް ކްލަބް އެވެ.
ކޮވިޑް-19ގެ ސަބަބުން އަވަހަށް ސީޒަން ނިންމާލަން ޖެހޭތީ މިދިޔަ ސީޒަނުގައި ތިން ވަނަ ޑިވިޝަން ނުބާއްވަ އެވެ. އެހެންވެ މި ފަހަރުގެ ތިން ވަނަ ޑިވިޝަން އަވަހަށް ބާއްވަން ނިންމީ ދެ ވަނަ ޑިވިޝަނަށް ޕްރޮމޯޓްވާނެ ހަތަރު ޓީމެއް ކަނޑައެޅުމަށެވެ. އެފްއޭއެމުން ބުނީ ތިން ވަނަ ޑިވިޝަން ނިމުމުން އެކަށީގެންވާ މުއްދަތެއް ދިނުމަށް ފަހު ދެ ވަނަ ޑިވިޝަން ފުޓްބޯޅަ މުބާރާތް ވެސް ފަށާނެ ކަމަށެވެ.
