ބާސެލޯނާ (އޭޕްރީލް 19) - ބާސެލޯނާ އިން އެ ޓީމުގެ ތަރި ލިއޮނަލް މެސީ އަށް ބޮޑު މުސާރައާ އެއްކޮށް އާ ކޮންޓްރެކްޓެއް ދޭނީ ކްލަބްގެ މާލީ ހާލަތު ފުރިހަމަ އަށް ދިރާސާކޮށް ނިމުމަށް ފަހު ކަމަށް ސްޕެއިނުގެ މީޑިއާ ރިޕޯޓްތައް ބުނެފި އެވެ.
މި ސީޒަނަށް ފަހު މެސީ ބާސެލޯނާއާ އެކު ހަދާފައިވާ ކޮންޓްރެކްޓް ހަމަވާނެ އެވެ. މެސީ އެ ކްލަބާ އެކު 2017 ވަނަ އަހަރު ހަދާފައިވާ ކޮންޓްރެކްޓް ދާދި ފަހުން މީޑިއާގައި ލީކްކޮށްލުމާ އެކު އޭނާ ދެން އެ ޓީމާ އެކު އާ އެއްބަސްވުމެއް ނަހަދާނެ ކަމަށް ސްޕެއިނުގެ މީޑިއާ ރިޕޯޓްތައް ބުނެ އެވެ. އެކަމަކު މިދިޔަ އާދިއްތަ ދުވަހު ބޭއްވި ބާސެލޯނާގެ އިންތިހާބު ކާމިޔާބުކޮށް ޖޮއާން ލަޕޯޓާ ރައީސްކަމަށް އިންތިހާބުވުމުން މެސީ އެ ކްލަބްގައި މަޑުކުރުމުގެ ފުރުސަތު ބޮޑުވެފައިވާ ކަމަށް ބާސެލޯނާގެ އޮފިޝަލުންނާ ހަވާލާދީ ސްޕެއިނުގެ ނޫސްތަކުން ރިޕޯޓްކޮށްފައިވެ އެވެ.
އެކަމަކު މިހާތަނަށް ރަސްމީކޮށް ބާސެލޯނާ އިން އުމުރުން 33 އަހަރުގެ މެސީ އަށް އާ ކޮންޓްރެކްޓެއް ހުށަހަޅާފައިނުވެ އެވެ. އެކަމާ ބެހޭގޮތުން ބާސެލޯނާގެ އޮފިޝަލަކާ ހަވާލާދީ ސްޕެއިނުގެ މާރްކާ އިން ރިޕޯޓްކުރާގޮތުގައި ސީޒަން ނިމުމުގެ ކުރިން ބާސެލޯނާގެ މާލީ ހާލަތު އެއްކޮށް ދިރާސާކޮށް ނިމޭނެ ކަމަށާއި އެއާ އެކު މެސީ އަށް ރަނގަޅު ފެންވަރުގެ ކޮންޓްރެކްޓެއް ހުށަހަޅާނެ ކަމަށެވެ.
ދާދި ފަހުން ބާސެލޯނާ އިން ސްޕެނިޝް ކަޕް ކާމިޔާބުކުރި މެޗަށް ފަހު އެ ކްލަބްގެ ރައީސް ލަޕޯޓާ ވިދާޅުވީ ކާމިޔާބީ ލިބޭނަމަ މެސީ ހުންނާނީ ބާސެލޯނާގައި ކަމަށެވެ.
މިދިޔަ އަހަރު ލީކުވި މެސީ އެންމެ ފަހުން ބާސެލޯނާއާ އެކު ހެދި ކޮންޓްރެކްޓްގައިވާ ގޮތުން މެސީ އަށް އެ ޓީމުން ޖުމްލަ އެއްކޮށް އަހަރަކު ބާސެލޯނާ އިން ލިބޭ ފައިނޭންޝިއަލް ޕެކޭޖްގެ އަގަކީ 166 މިލިއަން ޑޮލަރެވެ. ބާސެލޯނާގެ ދަރަނިތައް ހުރިގޮތުން މެސީ އަށް ކުރިން ލިބޭ މުސާރަ ދެން ނުލިބިދާނެ ކަމަށް މީގެ ކުރިން ވަނީ އެ ކްލަބްގެ އޮފިޝަލުން ބުނެފަ އެވެ. އެކަމަކު ލަޕޯޓާ ވަނީ މެސީ އަށް ނޫނެކޭ ނުބުނެވޭވަރުގެ ކޮންޓްރެކްޓެއް ދީ އޭނާ އެ ކްލަބްގައި ބެހެއްޓޭނެ ފެންވަރު އެބަހުރި ކަމަށް ބުނެފަ އެވެ.
މިދިޔަ ޖެނުއަރީ މަހު ނެރުނު ރިޕޯޓްތަކަށް ބަލާއިރު، ބާސެލޯނާގެ ޖުމްލަ ދަރަނީގެ އަދަދަކީ 1.173 ބިލިއަން ޔޫރޯ (1.4 ބިލިއަން ޑޮލަރު) އެވެ. ރިޕޯޓްތައް ބުނާ ގޮތުން އެ ދަރަނީގެ ތެރެއިން ދެ އަހަރުތެރޭގައި ބާސެލޯނާ އިން ދައްކަން ޖެހޭ ލޯންތަކާއި އެ ނޫން ވެސް ފައިސާގެ އަދަދު 550 މިލިއަން ޑޮލަރާ ގާތްކުރެ އެވެ.
