ވެރިކަން ކުރާ ނިޒާމް ބަދަލުކުރާނީ، ރައްޔިތުންގެ ވޯޓަކުން ކަމާމެދު ޝައްކެއް ނެތް ކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.
ނަޝީދު މިހެން ވިދާޅުވެ، ޓްވީޓް ކުރެއްވީ، ރައްޔިތުންގެ ވޯޓަކަށް ނުގޮސް ނިޒާމް ބަދަލުނުކުރައްވާނެ ކަމުގެ ޔަގީންކަން ރައީސް އިބްރާހިމް މުހައްމަދު ސޯލިހް މިއަދު ދެއްވާފައިވަނިކޮށެވެ.
"ރާއްޖޭގެ ވެރިކަމުގެ ނިޒާމަށް ބަދަލު ގެނެވޭނީ ރައްޔިތުންގެ ފެންނަ ނުފެންނަ ވޯޓަކުން ކަމާމެދު ޝައްކެއް ނެތް،" ނަޝީދުގެ ޓްވީޓްގައި ވިދާޅުވި އެވެ. "ނިޒާމު ބަދަލު ކުރުމުގެ ކޮންމެ މަޝްވަރާއަކީ އަދި ކޮންމެ މަސައްކަތަކީ ފެންނަ ނުފެންނަ ވޯޓާ ގުޅޭ ކަންކަން،"
ނަޝީދު، އިއްޔެ ރައީސަށް ފޮނުއްވި މެސެޖާ ގުޅިގެން ރައްޔިތުންގެ ރުހުމެއް ނެތި، މަޖިލީހުގައި އެމްޑީޕީއަށް ލިބިފައިވާ ސުޕަ މެޖޯރިޓީ ބޭނުންކޮށްގެން ނިޒާމު، ބަރުލަމާނީއަށް ފުރޮޅާލުމަކީ ގާތް ކަމެއް ކަމަށް ބުނެ ގިނަ ބަޔަކު ވަނީ ކަންބޮޑުވެފަ އެވެ. އޭގެ ތެރޭގައި ކުރީގެ ރައީސުންނާއި މަޖިލިސް މެންބަރުން ހިމެނިވަޑައިގަންނަވަ އެވެ.
ރައީސަށް، ނަޝީދު އިއްޔެ ފޮނުއްވި މެސެޖުގައި ސާފުކޮށް ވިދާޅުވެފައި އޮތީ ވެރިކަމުގެ މި ދައުރު ނިމެންދެން ވެސް އެއްފަރާތްވެވަޑައިގެން އެމަނިކުފާނު ހުންނަވަން ބޭނުންފުޅު ނުވާ ކަމަށެވެ. ބޮޑުވަޒީރުގެ ގޮތުގައި ގައުމު ހިންގަވަން ފުރުސަތު ދެއްވަން ސާފުކޮށް އެދިވަޑައިގެންފައިވެ އެވެ.
ނަޝީދު ހުށަހެޅުއްވީ 2023ގެ ފެބުރުއަރީ މަހުގެ ތެރޭގައި ވެރިކަމުގެ ނިޒާމް ބަދަލުކޮށް މަޖިލީހުން ސަރުކާރު އެކުލަވާލުމަށެވެ. އަދި އާ ސަރުކާރެއް ހޮވުމުގެ ރިޔާސީ އިންތިހާބު އެ އަހަރު ނުބޭއްވުމަށް ވެސް އެދިވަޑައިގަތެވެ. ޖެހިގެން އަންނަ 2024ގައި ރައްޔިތުންގެ މަޖިލީހުގެ އިންތިހާބަށްދާ އިރު ގާނޫނުގައިވާ ގޮތުގެ މަތިން ރައްޔިތުންގެ މަޖިލީހުން ރައީސުލްޖުމްހޫރިއްޔާ ކަނޑައެޅުމަށް ވެސް އެމަނިކުފާނު ހުށަހެޅުއްވި އެވެ.
އެ މެސެޖު ރައީސަށް ލިބިވަޑައިގެންނެވިކަން ކަށަވަރުކޮށް ދެއްވަމުން ރައީސް އޮފީހުގެ ތަރުޖަމާނު މަބުރޫކު އަޒީޒު ވިދާޅުވި ގޮތުގައި، އެކަމަކުގައި ރައީސް ދެކެވަޑައިގަންނަވާ ގޮތަކީ، މިހާރު އަމަލުކުރަމުންދާ ވެރިކަމުގެ ނިޒާމަކީ ރައްޔިތުންގެ ސީދާ ވޯޓަކުން އަމަލުކުރުމަށް ނިންމާފައިވާ ގޮތެއް ކަމަށް ވާތީ މިކަމަށް ބަދަލެއް ގެނެވޭނީ އާއްމު ރައްޔިތުންގެ ވޯޓަކުންނެވެ.
ނަޝީދު، މިދިޔަ އަހަރުގެ ސެޕްޓެމްބަރު މަހުގެ ތެރޭގައި އެމްޑީޕީގެ "ޚަބަރު ސިޓީ"އަށް ލިއުއްވާފައިވާ ގޮތުގައި ރައީސް ސޯލިހްގެ ދެ ވަނަ ދައުރު ލިބުމުގެ އެންމެ ކަށަވަރު މަގަކީ ވެސް ބަރުލަމާނީ ނިޒާމެވެ. އަދި ކުރިއަށް އޮތް 10 އަހަރު އެމްޑީޕީއަށް، ރާއްޖޭގެ ރައްޔިތުންނަށް ހިދުމަތް ކޮށްދެވެން އޮތް ނިޒާމަކީ ވެސް އެއީ ކަަމަށް އެމަނިކުފާނު ވިދާޅުވެފައިވެ އެވެ.
ރާއްޖޭގެ ވެރިކަމުގެ ނިޒާމް ކަނޑައެޅުމަށް ސިއްރު ވޯޓެއް ނެގީ އޮގަސްޓް، 18، 2007 ގަ އެވެ. އެ ވޯޓުގައި ރިޔާސީ ނިޒާމަށް 95،619 މީހުން ވޯޓު ދިނެވެ. ބަރުލަމާނީ ނިޒާމަކަށް ވޯޓު ދިނީ 58،504 މީހުންނެވެ.
