ކުރިން ކޮވިޑު ޖެހިފައިވާ މީހުންނަށް އަލުން މި ބަލި ޖެހޭތޯ ބެލުމަށާއި، ބަލި ޖެހިއްޖެ ނަމަ ހަށިގަނޑުގެ ދިފާއީ ނިޒާމު މަސައްކަތް ކުރާ ގޮތް ދެނެގަންނަން އިނގިރޭސި ވިލާތުގެ ސައިންސްވެރިން ދިރާސާއެއް ފަށައިފި އެވެ.
މި ދިރާސާގެ ބައިވެރިންނަކީ ކުރިން ކޮވިޑު ޖެހި ރަނގަޅުވެފައިވާ މީހުންނެވެ. ދިރާސާ ކުރިއަށް ގެންދާނީ މި ބަލި ޖައްސާ ކޮރޯނާވައިރަހަށް އެ މީހުން "އެކްސްޕޯޒް" ކޮށްގެންނެވެ.
މިފަދަ "ޗެލެންޖު ޓްރަޔަލް" ދިރާސާތަކަށް އެންމެ ފުރަތަމަ ހުއްދަ ދިން ގައުމަކީ އިނގިރޭސި ވިލާތެވެ. މިދިޔަ ފެބްރުއަރީ މަހު އެ ގައުމުން ބުނީ ދިރާސާގައި ބައިވެރިވާ ވޮލަންޓިއަރުންގެ އިއުތިރާޒެއް ނެތް ނަމަ އެ މީހުން ވައިރަހަށް "އެކްސްޕޯޒް" ކުރެވިދާނެ ކަމަށެވެ. މީގެ ބޭނުމަކީ ކޮވިޑާ ގުޅޭ އާ މައުލޫމާތު ހޯދުމެވެ.
އޮކްސްފޯޑް ޔުނިވާސިޓީގެ ވެކްސިނޮލޮޖިސްޓު އަދި ދިރާސާގެ ޗީފް އިންވެސްޓިގޭޓަރު ހެލެން މެކްޝޭން ވިދާޅުވީ މި ދިރާސާގެ ސަބަބުން ރަނގަޅު ވެކްސިނާއު ފަރުވާ އުފައްދަން އެހީވެދޭނެ ކަމަށާއި އަދި ކޮވިޑު ޖެހިއްޖެ ނަމަ ރައްކާތެރިކަމެއް ލިބޭތޯ ބެލޭނެ ކަމަށެވެ.
މީގެ އިތުރުން ރައްކާތެރިކަމެއް ލިބޭ ނަމަ އެއީ ކިހާ މުއްދަތަކަށްތޯ ބެލުމުގެ ފުރުސަތު ވެސް މި ދިރާސާއިން ފަހިކޮށްދެ އެވެ.
މީގެ ކުރިން މެލޭރިއާ، ފްލޫ، ޓައިފޮއިޑް އަދި ކޮލެރާ ފަދަ ބޮޑެތި ބަލިތަކާ ދެކޮޅަށް ފަރުވާ އާއި ވެކްސިން އުފައްދަން "ޗެލެންޖް ޓްރަޔަލް" ދިރާސާތައް ކޮށްފައިވެ އެވެ.
