ކޮވިޑުން ރައްކާތެރިވުމުގެ ވެކްސިނަށް ފަހު ބައްޔަށް ޕޮޒިޓިވްވެ އެޑްމިޓްކުރަން ޖެހުނު މީހުންނަށް އެ ބަލީގައި ބޮޑުވަރުވާ މިންވަރު ކުޑަ ކަމަށް އައިޖީއެމްއެޗުގެ ނެޝަނަލް ރެސްޓިޕޭޓަރީ ޑިޕާޓްމެންޓުގެ ހެޑް، ޑރ. މޫސާ ހުސެއިން މިދިޔަ ބުރާސްފަތިދުވަހު ވިދާޅުވެއްޖެ އެވެ.
ރާއްޖޭގައި ކޮވިޑު ވެކްސިނޭޝަން ޕްރޮގްރާމް ފެށީ މިދިޔަ ފެބުރުއަރީ މަހުގެ ތެރޭގަ އެވެ. މާލެ އާއި އަތޮޅުތަކުގެ ގިނަ ބަޔަކަށް ފުރަތަމަ ޑޯޒު ދީ މިހާރު ވެކްސިންގެ ދެ ވަނަ ޑޯޒު ވެސް ވަނީ ފަށައިފަ އެވެ.
ވެކްސިން ޖެހި ފަހުން ވެސް ބައެއް މީހުން ބައްޔަށް ޕޮޒިޓިވްވެފައި އެބަހުއްޓެވެ.
މިކަމުގައި ބައެއް މީހުންގެ ހުރި ކަންބޮޑުވުންތަކާ ގުޅިގެން ޑރ. މުސަ "އަދަދު"އަށް ވިދާޅުވީ ވެކްސިން ޖެހިޔަސް ފުދޭވަރަކަށް މީހުންނަށް ބަލި ޖެހޭ ކަމަށެވެ. އެފަދަ ބައެއް މީހުންނަށް ފަރުވާދެމުން ގެންދަވާ ކަމަށް ވެސް ވިދާޅުވި އެވެ.
ޑރ. މޫސަ: އޭނާ ވިދާޅުވަނީ ވެކްސިން ޖެހި ފަހުން ވެސް ފުދޭވަރަކަށް މީހުންނަށް ބަލި ޖެހިއްޖެ ކަމަށް. -- ފޮޓޯ / އަދަދު
ވެކްސިން ޖެހުމުގެ އެންމެ ބޮޑު ބޭނުމަކީ، މޫސަ ވިދާޅުވި ގޮތުގައި، ބަލި ޖެހުނަސް އެ ބަލީގައި ބޮޑުވަރުން ދަށްކުރުމެވެ.
"ފުރަތަމަ ޑޯޒު ޖަހާފައި ދެ ހަފުތާ ތިން ހަފުތާ ފަހުން ވެސް ޕޮޒިޓިވްވާ މީހުން އެބަ ފެނޭ. އަޅުގަނޑަށް ފާހަގަކުރެވުނު ގޮތުގައި, ފަހަކަށް އައިސް ދަރުމަވަންތަ ހޮސްޕިޓަލުގައި ފުދޭވަރަކަށް ގިނަ މީހުން އެޑްމިޓްވެފައި އެބަހުރި ހައި ރިސްކް ކެޓަގަރީގެ މީހުން ވެކްސިން ޖަހާފައި ތިބެގެން. އެކަމަކު އެ މީހުން ނިއުމޯނިއާ ޖެހިގެން ބަލީގައި ބޮޑުވަރުވަމުން ނުއެއްދޭ," ޑރ. މޫސަ ވިދާޅުވި އެވެ.
އެކަމަކު ވެކްސިން ނުޖަހައި ތިއްބައި ބަލި ޖެހުނުު ޅަ އުމުރުގެ މީހުންނާއި ހައި ރިސްކް ކެޓަގަރީގެ މީހުން ވެސް ބަލީގައި ބޮޑުވަރުވި ކަމަށް ވިދާޅުވި އެވެ. އޭގެތެރޭގައި ޒުވާނުން ވެސް ހިމެނޭ ކަމަށް ވިދާޅުވި އެވެ.
ވެކްސިނުން އެންމެ ރަނގަޅަށް ރައްކާތެރިކަން ލިބޭނީ ދެ ޑޯޒު ފުރިހަމަވުމުންނެވެ. ވެކްސިންގެ ފުރަތަމަ ޑޯޒުން ހަށިގަނޑުގައި ރައްކާތެރިކަން އުފައްދަން ފަށަން ދެ ހަފްތާ ނަގާ ކަމަށާއި އެންމެ ރަނގަޅަށް ދިފާއު ލިބެނީ ދެވަނަ ޑޯޒަށް ދެ ހަފްތާ ފަހުން ކަމަށް ސިއްހީ މާހިރުން ވިދާޅުވެ އެވެ.
އެހެންވެ ވެކްސިން ޖެހުމަކީ މުހިއްމު ކަމެއްގެ ގޮތުގައި ފާހަގަކުރެއްވި ކަމެކެވެ.
ޑރ. މޫސަ ވިދާޅުވީ ކޮވިޑުން އެންމެންނަށް ދަސްވި އެންމެ މުހިއްމު ކަމަކީ ސާފުތާހިރުވެ ވަކި ގޮތަކަށް އުޅުން ދަސްކުރުން ކަމަށެވެ. އެހެންވެ ވެކްސިނާ އެކު ވެސް މުހިއްމީ ކޮވިޑާ އެކު ދިރިއުޅެން ދަސްކުރުން ކަމަށް ވިދާޅުވި އެވެ.
