ޗެލްސީން ސިޓީގެ ހަތަރު ތަށީގެ އުއްމީދަށް ނިމުން ގެނެސްފި

Apr 17, 2021, 8:29 PM
ލަނޑު ޖެހުމަށް ފަހު ޗެލްސީގެ ކުޅުންތެރިން އުފާފާޅުކުރަނީ.-- ފޮޓޯ: އޭއެފްޕީ

ލަނޑު ޖެހުމަށް ފަހު ޗެލްސީގެ ކުޅުންތެރިން އުފާފާޅުކުރަނީ.-- ފޮޓޯ: އޭއެފްޕީ

ލަންޑަން (އޭޕްރީލް 18) - އިނގިރޭސި އެފްއޭ ކަޕްގައި މިރޭ ޗެލްސީ އަތުން 1-0 އިން ބަލިވެ، މެންޗެސްޓާ ސިޓީން މި ސީޒަނުގައި ހަތަރު މުބާރާތް ކާމިޔާބުކުރަން ކުރަމުން އައި އުއްމީދަށް ނިމުމެއް އަތުވެއްޖެ އެވެ.

ޗެލްސީން ސިޓީ ބަލިކޮށް އެފްއޭ ކަޕްގެ ފައިނަލުން ފުރުސަތު ހޯދިއިރު، މިއީ އެފްއޭ ކަޕްގެ ސެމީ ފައިނަލުން ސިޓީ ޖެހިޖެހިގެން ކެޓި ދެ ވަނަ ފަހަރެވެ. މިދިޔަ އަހަރުގެ ސެމީގައި ސިޓީ ކަޓުވާލީ ޗެމްޕިއަންކަން ހޯދި އާސެނަލުންނެވެ.

އެފްއޭ ކަޕުން ކެޓި ނަމަވެސް ސިޓީ އަށް އަދި ތިން ތަށި ހޯދިދާނެ އެވެ. ސިޓީ މި ވަގުތު އިނގިރޭސި ޕްރިމިއާ ލީގުގެ އެއް ވަނައިގައި ބޮޑު ލީޑެއްގައި އޮތްއިރު، އަންނަ ހަފްތާގައި ލީގު ކަޕް ފައިނަލުގައި ޓޮޓެންހަމް ހޮޓްސްޕާސްއާ ބައްދަލުކުރާނެ އެވެ. އަދި ޗެމްޕިއަންސް ލީގުގެ ސެމީގައި ސިޓީ ކުޅޭނީ ފްރާންސްގެ ޗެމްޕިއަން ޕީއެސްޖީއާ އެވެ.

ސިޓީގެ ކޯޗު ޕެޕް ގާޑިއޯލާ ބުނީ ޗެލްސީއާ ދެކޮޅަށް މިރޭގެ މެޗުގައި މޮޅުވެވޭ ވަރަށް އޭނާގެ ޓީމުން ގޯލު ޖަހާނެ ފުރުސަތު ތަނަވަސްނުކުރާ ކަމަށެވެ. އަދި ޗެލްސީން ކައުންޓަ އެޓޭކުގައި ޖެހި ގޯލާ އެކު ބޭނުންވާ ކަންތައްތައް ހާސިލްކޮށް މޮޅުވީ ކަމަށާއި ސިޓީން ހަތަރު މުބާރާތް ކާމިޔާބުކުރުމުގެ ޕްރެޝަރަކީ މީޑިއާ އިން ދައްކާ ވާހަކައެއް ކަމަށް ގާޑިއޯލާ ބުންޏެވެ.

"އަހަރެމެންނަށް ދެން އޮތީ ދެން އޮތް ތިން މުބާރާތަށް ފޯކަސް ކުރުން. މެޗަކަށް ފަހު މެޗެއް ކުރިއަށް ދިއުން އޮތީ. ލީގު ކަޕް ފައިނަލަށް ދެން މަސައްކަތްކުރަން ޖެހިފައި މި އޮތީ،" ގާޑިއޯލާ ބުންޏެވެ.

އިނގިރޭސި ވެމްބްލީ ސްޓޭޑިއަމްގައި މިރޭ ކުޅުނު މެޗުގައި ޗެލްސީން ޖެހި ހަަމައެކަނި ގޯލު ކާމިޔާބުކުރީ މެޗުގެ 55 ވަނަ މިނިޓްގައި މޮރޮކޯގެ ވިންގް ހަކީމް ޒިޔެޗް އެވެ. އޭނާ މި ގޯލު ޖެހީ ޓިމޯ ވާނާ ތަނަވަސްކުރި ފުރުސަތަކުންނެވެ. ސިޓީން ނަތީޖާ ހަަމަހަމަ ކުރަން ގިނަ މަސައްކަތެއް ކުރި ނަމަވެސް ކެޕާ އަރިއްޒަބަލާގާ ހުރި ޗެލްސީގެ ގޯލަށް ސިޓީ އަށް ގޯލެއް ނުޖެހުނެވެ. އިތުރު ވަގުތުގައި ޗެލްސީގެ ކްރިސްޓިއަން ޕުލިސިޗް ޖެހި ގޯލެއް ވަނީ އޮފްސައިޑް ކަމަށް ނިންމައިފަ އެވެ.

މިއީ ކޯޗިން ކެރިއަރުގައި ޗެލްސީގެ ކޯޗު ތޯމަސް ޓުޗެލް އަށް ގާޑިއޯލާ އަތުން ހޯދުނު ފުރަތަމަ މޮޅެވެ. ޗެލްސީ ގޮވައިގެން ފުރަތަމަ ފައިނަލު ކުޅުމުގެ ފުރުސަތު ލިބުމުން ޓުޗެލް ހުރީ ވަރަށް ބޮޑަށް ހިތްހަމަޖެހިފަ އެވެ.

"ލީގުގެ އެއް ނޫން ޔޫރަޕްގެ ވެސް އެންމެ ވަރުގަދަ އެއް ޓީމާ ދެކޮޅަށް މި ކުޅުނީ. އަހަރެމެންނަށް ހައްގު މޮޅެއް މިއީ. ސީޒަނެއްގެ މެދުތެރެއިން ޓީމަކާ ހަވާލުވެ މި ވީ ދުވަސްކޮޅުގައި މި ވަރުގެ ކަމެއް ހާސިލް މި ކުރެވުނީ ކުޅުންތެރިންގެ ވެސް މަސައްކަތުން. އެހެންވީމަ ހަމައެކަނި އަަހަންނަށް މީގެ ކްރެޑިޓް ނުދީ،" މިދިޔަ ޖެނުއަރީ މަހު ޗެލްސީގެ ކޯޗުކަމާ ހަވާލުވެ ރަނގަޅު މަސައްކަތްތަކެއް ކުރަމުން އަންނަ ޓުޗެލް ބުންޏެވެ.

އެފްއޭ ކަޕްގެ ފައިނަލުން ޖެހިޖެހިގެން ދެ ވަނަ ފަހަރަށް ޗެލްސީން ފުރުސަތު ހޯދިއިރު، އެ ޓީމާ ދެކޮޅަށް ފައިނަލުގައި ކުޅޭނެ ޓީމެއް އެނގޭނީ މާދަމާރޭގެ ދެ ވަނަ ސެމީ ފައިނަލަށް ފަހު އެވެ. ދެ ވަނަ ސެމީގައި ލެސްޓާ ސިޓީ ކުޅޭނީ ސައުތެމްޓަންއާ އެވެ.

ކޮމެންޓް

ފަހުގެ ޚަބަރު

ބްރޭކްތައް އަންނަ ގޮތުން "ލީގުގެ ފީލްއެއް ނީނދޭ": އާތީ

ދިވެހި ޕްރިމިއާ ލީގު މެދުކަނޑާލަން ޖެހުމުން ކުޅުންތެރިންގެ ފިޓްނަސް އާއި ޕާފޯމަންސަށް އަސަރުކޮށް، ލީގުގެ އަސްލު ފޯރި ނުލިބޭ ކަމަށް ޓީސީގެ ކޯޗު އާތީ ބުނެފި. އާތީ ފާހަގަކުރި ގޮތުގައި ގިނަ ދުވަސްތަކެއްގެ ބްރޭކްތަކުގެ ސަބަބުން ޓީމުތަކުގެ ކޮންޓިނިއުޓީ ގެއްލި، މެޗުތަކަށް ތައްޔާރުވުމުގައި ބޮޑެތި ގޮންޖެހުންތަކެއް ކުރިމަތިވޭ

ފީފާގެ އިންތިހާބުގައި އަރަބިންގެ ތާއީދު އިންފަންޓީނޯ އަށް

އަންނަ އަހަރު ބާއްވާ ފީފާގެ އިންތިހާބުގައި މިހާރުގެ ރައީސް ޖިއާނީ އިންފަންޓީނޯއަށް ތާއީދުކުރުމަށް 22 ގައުމު ހިމެނޭ އަރަބް ފުޓްބޯޅަ ޔޫނިއަން (ޔޫއޭއެފްއޭ) އިން ނިންމައިފިއެވެ. އިންފަންޓީނޯއާ އެކު ޖުމްލަ ތިން ކެންޑިޑޭޓުން ވާދަކުރާ މި އިންތިހާބުގައި، އޭޝިއާ އާއި އެފްރިކާގެ ގައުމުތަކުގެ ބޮޑު ތާއީދަކާއެކު އޭނާއަށް މަގާމު ދިފާއުކުރުމުގެ ފުރުސަތު ބޮޑުކަމަށް ބެލެވެއެވެ. ފީފާގެ އާ ރައީސަކު ހޮވުމަށް ވޯޓުލުން އޮންނާނީ އަންނަ އަހަރުގެ މާޗް މަހު މޮރޮކޯގައި ބާއްވާ ފީފާ ކޮންގްރެސްގައެވެ.

އިންޑިއާގެ ލެޖެންޑުން ފުޓްބޯޅަ ރައީސްގެ ޝަކުވާ ސަރުކާރަށް

އިންޑިއާގެ ފުޓްބޯޅަ ފެޑެރޭޝަންގެ ރައީސް ކަލްޔާން ޗޯބޭގެ އިތުބާރު ނެތްކަމުގެ މައްސަލަ، ބައިޗުން ބުޓިއާ ހިމެނޭހެން އެ ގައުމުގެ 14 ލެޖެންޑުން ސްޕޯޓްސް މިނިސްޓަރަށް ހުށަހަޅައިފި. މި ސިޓީގައި ފާހަގަކޮށްފައިވަނީ ފެޑެރޭޝަންގެ މާލީ ހާލަތު ގޯސްވެ ބަނގުރޫޓުވަމުންދާ ކަމަށް

ސުޒޭނާއި މޯހަންގެ ދުލުން: ބަދުނަސީބާއި ހައްލެއްގެ ވާހަކަ!

ސަރަހައްދުގެ އެހެން ގައުމުތަކުން ބޭރުގައި އުޅޭ އެ ގައުމުތަކުގެ ދަރިފަސްކޮޅުގެ ކުޅުންތެރިންނަށް ރަށްވެހިކަން ދީގެން ގައުމީ ޓީމުތައް ވަރުގަދަކުރަމުންދާއިރު، ރާއްޖެއަށް އެ ފުރުސަތު ކުޑަކަމަށް ކުރީގެ ކޯޗުން ފާހަގަކުރެއެވެ. މިކަމުގެ ސަބަބުން ރާއްޖޭގެ ފުޓްބޯޅައަށް ކުރިމަތިވެފައިވާ ގޮންޖެހުންތަކަށް ހައްލެއް ހޯދުމަށް އެކަށީގެންވާ ނިޒާމެއް ނެތްކަމުގެ ކަންބޮޑުވުން ވަނީ ފާޅުކޮށްފައެވެ.

ވޭގާގެ ނަމެއް ނެތް، ފީފާ އިންތިހާބުގައި ތިން ކެންޑިޑޭޓުން!

އަންނަ އަހަރު ބާއްވާ ފީފާގެ އިންތިހާބުގައި ވާދަކުރާ ތިން ކެންޑިޑޭޓުންގެ ނަން އިއުލާނުކުރިއިރު، ކުރީގެ ކުޅުންތެރިޔާ ރަމޮން ވޭގާގެ ނަން ޝަރުތު ހަމަނުވުމުގެ ސަބަބުން ވަނީ ބާކީވެފައި. މި އިންތިހާބުގައި ވާދަކުރައްވަނީ މިހާރުގެ ރައީސް އިންފަންޓީނޯގެ އިތުރުން ފްރާންސްގެ ފިލިޕޭ ޑިއާލޯ އަދި ޖަޕާނުގެ ކޯޒޯ ޓަޝީމާ

އަނިޔާއިން ރަނގަޅުވެ އިލާން އެނބުރި އަންނަން ތައްޔާރު

ކަކުލަށް ލިބުނު އަނިޔާއަކާ ގުޅިގެން ދެ މަހެއްހާ ދުވަހު ކުޅުމާ ދުރުގައި ހުރުމަށްފަހު، މާޒިޔާގެ ފޯވާޑް މުހައްމަދު އިލާން އިމްރާން އަލުން ކުޅުމަށް އެނބުރި އަންނަން ތައްޔާރުވެއްޖެ. މި އަނިޔާގެ ސަބަބުން އިލާނަށް ސާފް ޗެމްޕިއަންޝިޕާއި ލީގުގެ މުހިންމު މެޗުތަކެއް ގެއްލުނު ނަމަވެސް، އޭނާ މިހާރު ވަނީ ފަރިތަކުރުންތަކުގައި ބައިވެރިވާން ފަށާފައި

ފީފާ އިން ނޭޕާލްގެ ސަސްޕެންޝަން އުވާލަނީ؟

ފީފާގެ އެންގުންތަކަށް ބޯނުލެނބުމުގެ ސަބަބުން ނޭޕާލް ފުޓްބޯޅަ ފެޑެރޭޝަނަށް ދީފައިވާ ސަސްޕެންޝަން، ކުރިއަށް އޮތް މަހެއްހާ ދުވަސް ތެރޭގައި އުވާލާނެ ކަމަށް ނޭޕާލުން ވަނީ ބުނެފައި. މި ސަސްޕެންޝަން އުވާލުމަށް ނޭޕާލް ސަރުކާރުގެ މަންދޫބުން ފީފާ އާއި އޭއެފްސީއާ އެކު މަޝްވަރާކޮށްފައި

Newsletter

Get the latest news delivered straight to your inbox