އިނގިރޭސި ރާނީގެ ފިރިކަލުން ޑިއުކް އޮފް އެޑިންބަރާ، އަމީރު ފިލިޕްގެ ޖަނާޒާގެ ކަންކަން މިއަދު ނިންމާލައިފި އެވެ.
ކޮވިޑާ ގުޅިގެން ރައްކާތެރިކަމުގެ ގިނަ ފިޔަވަޅުތަކާއެކު ވެސް ޖަނާޒާ ބާއްވާފައިވަނީ އަމީރު ފިލިޕް ދުނިޔޭގައި ހުންނެވި އިރު އެދިވަޑައިގެންނެވި ގޮތަށެވެ.
ސެއިންޓް ޖޯޖް ޗެޕަލްގެ ތެރޭގައި ކުރިއަށް ދިޔަ ޖަނާޒާގައި ބައިވެރިވުމުގެ ފުރުސަތު ލިބިވަޑައިގެންނެވީ ޝާހީ އާއިލާގެ 30 މެމްބަރުންނަށެވެ.
ކޮވިޑާ ގުޅިގެން ރައްކާތެރިކަމުގެ ހާއްސަ ފިޔަވަޅެއްގެ ގޮތުން އެ ތަނުގެ ތެރޭގައި ވެސް އާއިލީ މެމްބަރުން ތިއްބެވީ ދުރުދުރުގަ އެވެ. އެހެންކަމުން އުމުރުފުޅުން 94 އަހަރުގެ ރާނީ އެލިޒަބަތު ދެ ވަނަ އިންނެވީ ގިނިކަންޏާ އެވެ.
ސެއިންޓް ޖޯޖް ޗެޕަލް ތެރޭގައި ރާނީ އެލިޒަބަތު ދެ ވަނަ. ކޮވިޑާ ގުޅިގެން ރައްކާތެރިކަމުގެ ފިޔަވަޅެއްގެ ގޮތުން ރާނީ އާއި އާއިލީ އެހެން މެމްބަރުން ވެސް ތިއްބެވީ ދުރުދުރުގައި-- ފޮޓޯ: ގެޓީ އިމޭޖަޒް
ޖަނާޒާގެ ގިނަ ކަންކަން ކުރިއަށް ގެންދަންވީ ގޮތުގެ އިރުޝާދު ދެއްވާފައިވަނީ އަވަހާރަވިއިރު އުމުރުފުޅުން 99 އަހަރުގެ އަމީރު ފިލިޕް އެވެ. އެގޮތުން ކޮޔާ މިއުޒިކް ހުށަހެޅީ ހަތަރު މެމްބަރުންގެ ބޭންޑަކުންނެވެ.
އޭގެ އިތުރުން އެމަނިކުފާނުގެ ހަށިކޮޅު ސަންދޯކުގައި ސެއިންޓް ޖޯޖް ޗެޕަލްއަށް އުފުލާފައި ވަނީ އަމިއްލަފުޅަށް ޑިޒައިން ކުރެއްވި ލޭންޑް ރޯވާ ކާރެއްގަ އެވެ.
ޖަނާޒާ ފެށުމުގެ ކުރިން މުޅި އިނގިރޭސިވިލާތުގައި ވަނީ ހަމަހިމޭންކަމުގެ ސުކޫތެއް ފާހަގަކޮށްފަ އެވެ. ޖަނާޒާގެ ކުރިން ބޭއްވި ޕެރޭޑާއި ސަންދޯކުގައި އަޅާފައިވާ ދިދައިން ފިލިޕް އަސްކަރިއްޔާއަށް ކޮށްދެއްވި ހިދުމަތް ރަމްޒުވެ އެވެ.
ސަންދޯކުގެ މަތީގައި އެމަނިކުފާނުގެ ކަނޑުގެ ސިފައިންގެ ތޮތްޕާއި، ކަނޑިކޮޅު އޮތެވެ. އަދި އަސްކަރީ ބޭންޑުތަކުން ވަނީ ފިލިޕްގެ ހަނދާނުގައި މިއުޒިކް ކުޅެފަ އެވެ.
ސަންދޯއް ފަސްދާނުލުމުގެ ބަދަލުގައި ވަނީ ސެއިންޓް ޖޯޖް ޗެޕަލްގެ ބިމު އަޑީގައި ހަދާފައިވާ "ރޯޔަލް ވޯލްޓް" އަށް ތިރިކޮށްފަ އެވެ.
އަށާރަ ސަތޭކައިގެ އަހަރުތަކުގައި ހެދި "ރޯޔަލް ވޯލްޓް" އަކީ ރަސްގެފާނު ޖޯޖް ތިން ވަނަ އަވަހާރަވުމުން ހަށިކޮޅު ތިރިކުރުމަށް ތައްޔާރު ކުރި ތަނެކެވެ. އޭގެ ފަހުން ޝާހީ އާއިލާގެ އިސް ބޭބޭފުޅުން އަވަހާރަވުމުން ހަށިކޮޅު ސަންދޯކާއެކު ބާއްވަނީ އެ ތަނުގަ އެވެ.
ޖަނާޒާގެ ސަބަބުން ގިނަ މަސްތަކަކަށް ފަހު ޝާހީ އާއިލާގެ އެންމެ މުހިއްމު މެމްބަރުން ވަނީ އެއް ތަނަކުން ބައްދަލުވެ ވަޑައިގެންފަ އެވެ.
އެގޮތުން ޝާހީ ޒިންމާތަކާ ވަކިވެ ވަޑައިގެން އެމެރިކާގައި ދިރިއުޅުއްވަމުން ގެންދަވާ ފިލިޕްގެ ކާފަ ދަރިކަލުން، އަމީރު ހެރީ ވެސް ބައިވެރިވެ ވަޑައިގެންނެވި އެވެ.
ނަމަވެސް ހެރީގެ އަނބިކަނބަލުން މޭގަން މާކަލް ބައިވެރިވެ ވަޑައިގެންފައެއް ނުވެ އެވެ. އެއީ ދެ ވަނަ ދަރިއަކަށް ބަލިވެ އިން އިރު، ޑޮކްޓަރުން ދަތުރު ނުކުރުމަށް އަންގާފައި ވާތީ އެވެ.
