މިދިޔަ ހުކުރު ދުވަހު އަވަހާރަވި ޑިއުކް އޮފް އެޑިންބަރާ، އަމީރު ފިލިޕްގެ ޖަނާޒާގެ ކަންކަން ހަމަޖެހިފައިވަނީ ކޮވިޑްގެ ރައްކާތެރިކަމުގެ ފިޔަވަޅުތަކާ އެއް ގޮތަށެވެ.
އެގޮތުން ހޮނިހިރު ދުވަހު އޮންނަ ޖަނާޒާގައި ބައިވެރިވެ ވަޑައިގެންނެވޭނީ އެންމެ 30 ބޭފުޅުންނަށެވެ. ސެއިންޓް ޖޯޖް ޗެޕަލްގައި އޮންނަ ޖަނާޒާގެ ދައުވަތު ލިބިވަޑައިގެންނެވީ ޝާހީ އާއިލާގެ ވެސް ބައެއް މެމްބަރުންނަށެވެ.
އޭގެ ތެރޭގައި ހިމެނިވަޑައިގަންނަވަނީ ފިލިޕްގެ އަނބިކަނބަލުން ރާނީ އެލިޒަބަތު ދެ ވަނަ އާއި ހަތަރު ދަރިކަލުންނާއި ބައެއް ކާފަ ދަރިކަލުންނެވެ. ބައެއް ބޭފުޅުންގެ ފިރިކަލުންނާއި އަނބިއަނބި ކަނބަލުންނަށް ވެސް ދައުވަތު އަރުވާފައި ވެއެވެ.
ޖަނާޒާގެ ބައެއްގެ ގޮތުގައި އަސްކަރީ ޕެރޭޑެއް ކުރިއަށް ދާނެ އެވެ. ފިލިޕްގެ ހަށިކޮޅު ސަންދޯކުގައި ސެއިންޓް ޖޯޖް ޗެޕަލްއަށް ގެންދާނީ އެމަނިކުފާނު އަމިއްލަފުޅަށް ޑިޒައިން ކުރެއްވި ލޭންޑް ރޯވާ ކާރެއްގަ އެވެ. ސަންދޯއް ތިރިކުރަން ހަމަޖެހިފައި ވަނީ ޗެޕަލް އަޑީގައިވާ "ރޯޔަލް ވޯލްޓް" އަށެވެ.
އަށާރަ ސަތޭކައިގެ އަހަރުތަކުގައި ހެދި "ރޯޔަލް ވޯލްޓް" އަކީ ރަސްގެފާނު ޖޯޖް ތިން ވަނަ އަވަހާރަވުމުން ހަށިކޮޅު ތިރިކުރުމަށް ތައްޔާރު ކުރި ތަނެކެވެ. އޭގެ ފަހުން ޝާހީ އާއިލާގެ އިސް ބޭބޭފުޅުން އަވަހާރަވުމުން ހަށިކޮޅު ސަންދޯކާއެކު ބާއްވަނީ އެ ތަނުގަ އެވެ.
