ހުއްދަ ނެތި އެއްވި ކަމުގެ ކުށުގައި ހޮންކޮންގެ ޑިމޮކްރަސީއަށް ވަކާލާތު ކުރާ މީޑިއާ ހިންގާ ބިލިއަނަރު، ޖިމީ ލައި 14 މަހަށް ޖަލަށްލާން ހުކުމްކޮށްފި އެވެ.
ލައިގެ އިތުރުން ގިނަ އަދަދެއްގެ އެކްޓިވިސްޓުން މިއަދު ވަނީ ހުކުމް ކުރަން ކޯޓަށް ހާޒިރުކޮށްފަ އެވެ. އެ މީހުންގެ މައްޗަށް ކުށް ސާބިތުވީ 2019 ވަނަ އަހަރު ބޭއްވި އެއްވުންތަކާ ގުޅިގެންނެވެ.
އެޕަލް ޑެއިލީ މީޑިއާގެ ވެރިޔާ އުމުރުން 73 އަހަރުގެ ލައި އަކީ ޗައިނާގެ ސަރުކާރަށް ވަރަށް ބޮޑަށް ފާޑުކިޔާ މީހެކެވެ. އޭނާ ޖަލަށް ހުކުމް ކުރިއިރު ޗައިނާއިން އަންނަނީ ހޮންކޮންގެ ހައްގުތަކާއި މިނިވަންކަން ހިފަހައްޓަމުންނެވެ.
މި ހަފްތާގެ ކުރީކޮޅު އެޕަލް ޑެއިލީން ވަނީ ޖަލުގައި ހުރި ލައި އަތުން ލިޔެފައި ފޮނުވި ސިޓީއެއް ނޫހުގައި ޝާއިއުކޮށްފަ އެވެ.
ނޫސްވެރިންގެ ގޮތުގައި އަޅުގަނޑުމެންގެ ޒިންމާއަކީ އިންސާފު ހޯދުން. ނާއިންސާފު އެދުންތަކާ ހެދި އަނދިރިވެ، ފަސާދަ އަޅުގަނޑުމެންގެ ހަށިގަނޑު ތެރެއަށް ވަދެ ގަންނަން ފުރުސަތު ނުދޭހާ ހިނދަކު، އެ ޒިންމާ އަދާކުރުމުގައި އަޅުގަނޑުމެން ދެމިތިބޭނަން. -- ލައި
ހުއްދަ ނެތި އެއްވުމުގެ ކުށް އޭނާގެ މައްޗަށް ސާބިތުވެފައި ވާއިރު، ލައިއާ ދެކޮޅަށް ވަނީ އިތުރު ހަ ދައުވާއެއް އުފުލާފަ އެވެ. އަލަށް އެކުލަވާލި ނޭޝަނަލް ސެކިއުރިޓީ ގާނޫނުގެ ދަށުން އެ ދައުވާތައް ސާބިތުވެއްޖެ ނަމަ އުމުރު ދުވަހުގެ ޖަލު ހުކުމެއް އައުން އެކަށީގެންވެ އެވެ.
ހޮންކޮންގަށް ޗައިނާގެ ނުފޫޒު
ޗައިނާ ސަރުކާރުން ހޮންކޮންގައި ނޭޝަނަލް ސެކިއުރިޓީ ގާނޫނު ތަންފީޒު ކުރަން ފެށީ މިދިޔަ އަހަރު އެވެ. މި މަހުގެ ކުރީކޮޅު ޗައިނާއިން ވަނީ ހޮންކޮންގެ އިލެކްޓޯރަލް ގަވާއިދު ބަދަލުކޮށް، ޗައިނާގެ ބާރު ބޮޑަށް ހިނގާނޭ ގޮތަށް ހަމަޖައްސާފަ އެވެ.
ގަރުނަކަށް ވުރެ ގިނަ ދުވަހު އިނގިރޭސިންގެ އަތް ދަށުގައި އޮތް ހޮންކޮން، ޗައިނާއާ ހަވާލުކުރީ 1997 ގައެވެ. އޭރު އެއްބަސްވީ ހޮންކޮންގައި "ބޭސިކް ލޯ" ހިންގުމަށެވެ. އޭގެ ދަށުން ހޮންކޮންގަކީ ޗައިނާގެ ބައެއް ނަމަވެސް، ހޮންކޮންގައި ހިނގާނީ ޗައިނާއާ މުޅިން ވަކި ނިޒާމެކެވެ.
އެ އެއްބަސްވުމުގެ ސަބަބުން ޗައިނާގެ އެހެން ހިސާބުތަކަށް ނުލިބޭ ހައްގުތަކާއި މިނިވަންކަން ހޮންކޮންއަށް ލިބެ އެވެ. އެއްވެ އުޅުމާއި ހިޔާލު ފާޅުކުރުމާއި މިނިވަން ޖުޑިޝަރީ އާއި ބައެއް ޑިމޮކްރެޓިކް ހައްގުތައް ވެސް ހޮންކޮންގެ ރައްޔިތުންނަށް ލިބެ އެވެ.
ނަމަވެސް 2019 ވަނަ އަހަރު ހޮންކޮންގެ ރައްޔިތުން މަގުތަކަށް ނިކުމެ އަޑުއުފުލަން ފެށީ ޗައިނާއިން އެ ނިޒާމަށް ނުފޫޒު ފޯރުވާ ކަމަށް ބުނެ އެވެ. އަދި ހައްގުތައް އަނބުރާ ދީ، ޑިމޮކްރެސީ ގާއިމްކުރަން އެ މުޒާހަރާތަކުގައި ގޮވާލި އެވެ.
