ފޮރިން މިނިސްޓަރު އަބްދުﷲ ޝާހިދު އިންޑިއާގެ އެކްސްޓާނަލް އެފެއާޒް މިނިސްޓަރު ޑރ. ޖައިޝަންކަރުއާ މިއަދު ބައްދަލުކުރައްވައިފި އެވެ.
ގުޅުން ބަދަހިކުރުމުގެ މި ބައްދަލުކުރެއްވުގައި ދެ ގައުމުގެ ބަދަހި ގުޅުމާއި މިހާރު އިންޑިއާ އިން ވެދެމުން އަންނަ އެހީތަކުގެ އިތުރުން ކުރިއަށް އޮތް ތަނުގައި ދެ ގައުމުގެ ގުޅުމުގައި އެހީގެ ޔަގީންކަން ޖައިޝަންކަރު ދެއްވި އެވެ. ރާއްޖެއާ އެންމެ އެކުވެރި ގައުމުގެ އެހީތަކަށް ޝާހިދު ޝުކުރު އަދާކުރެއްވި އެވެ.
ފޮރިން މިނިސްޓްރީން ބުނިގޮތުގައި ޖައިޝަންކަރާ އެކު މިނިސްޓަރު ބޭއްވި ބައްދަލުވުމުގައި ކޮވިޑް-19 އިން ރައްކާތެރިވުމަށް ކުރާ މަސައްކަތާއި ވެކްސިން ޕްރޮގްރާމްތަކާ ބެހޭ ގޮތުން ވެސް ދެ ވަޒީރުން މަޝްވަރާ ކުރެއްވި އެވެ.
"އެކްސްޓާނަލް އެފެއާޒް މިނިސްޓަރު ޖައިޝަންކަރު ވަނީ ދިވެހިރާއްޖޭގެ އިޖްތިމާއީ އަދި އިގްތިސާދީ ތަރައްގީއަށް އިންޑިއާއިން ވެދެމުން އަންނަ އެހީތެރިކަން މެދުނުކެނޑި ފޯރުކޮށްދެވާނެކަނުގެ ޔަގީންކަން ދެއްވައިފަ އެވެ. އެގޮތުން ރާއްޖެއަށް ބޭނުންވާ އަސާސީ މުދާ، އެއްވެސް މެދުކެނޑުމެއް ނެތި ރާއްޖެއަށް ފޯރުކޮށްދެއްވާނެކަމުގެ ޔަގީންކަން ދެއްވި އެވެ،" ފޮރިން މިނިސްޓްރީން ބުންޏެވެ.
ޝާހިދު އިންޑިއާ އަށް މި ވަޑައިގަތީ އަންނަ ޖޫން މަހު ބާއްވަން ނިންމާފައިވާ އދ.ގެ 76 ވަނަ އާއްމު މަޖިލީހުގެ ރައީސް ހޮވުމުގެ އިންތިހާބާ ދިމާކޮށެވެ. އޭނާ ވަނީ އިންޑިއާގައި ތިއްބެވި 16 ގައުމެއްގެ މަންދޫބުންނާއި ހަތް ގައުމެއްގެ އެމްބެސެޑަރުންނާ ބައްދަލު ކުރައްވައިފަ އެވެ.
އާންމު މަޖިލީހުގެ ރައީސް ހޮވުމަށް ބާއްވާ އިންތިހާބުގައި ވާދަ ކުރައްވަނީ އަބްދުﷲ ޝާހިދާއި އަފްގާނިސްތާނުގެ ކުރީގެ ފޮރިން މިނިސްޓަރު ޑރ. ޒަލްމާއި ރަސޫލެވެ.
ޑރ. ރަސޫލަކީ 2010 އިން 2013 އަފްގާނިސްތާނުގެ ފޮރިން މިނިސްޓަރުކަން ކުރައްވާފައިވާ ތަޖުރިބާކާރު ބޭފުޅެކެވެ.
