ޕާކިސްތާނުގައި ދިރިއުޅޭ ފްރާންސްގެ ހުރިހާ ރައްޔިތުން ވަގުތީ ގޮތުން އެ ގައުމުން ފޭބުމަށް ފްރާންސުން އަންގައިފި އެވެ.
ފްރާންސްގައި ކީރިތި ރަސޫލާގެ ކާޓޫނު ކުރެހި މައްސަލައެއް ހޫނުވެ، ޕާކިސްތާނުގައި މި ވަގުތު އަންނަނީ ހަމަނުޖެހުން ހިންގަމުންނެވެ.
ޕާކިސްތާނުގައި ހުންނަ ފްރާންސްގެ އެމްބަސީން ބުނީ އެ ތަނުގައި ދިރިއުޅޭ ފްރާންސް ރައްޔިތުންނަށް ނުރައްކާ އެބަ އޮތް ކަމަށެވެ.
ހަމަނުޖެހުން ފެށުނީ ތެހްރީކޭ ލައްބައިކް ޕާޓީ (ޓީއެލްޕީ) ގެ ލީޑަރު، ސާދު ރިޒްވީ ހައްޔަރު ކުރުމުންނެވެ. އޭނާ ވަނީ ފްރާންސްގެ ސަފީރު ގައުމަށް ފޮނުވާލުމަށް ސަރުކާރު މުހުލަތެއް ދީފަ އެވެ.
އެ އިންޒާރާ ގުޅިގެން އޭނާ ހައްޔަރު ކުރުމާއެކު ޓީއެލްޕީން ފެށި މުޒާހަރާތަކުގައި ހަމަނުޖެހުން ބޮޑުވެ، ދެ ފުލުހަކު ވަނީ މަރުވެފަ އެވެ.
ޓީއެލްޕީން ހަމަނުޖެހުން ހިންގަމުން ދާތީ މިހާރު ވަނީ އެ ޕާޓީ ހިންގުން މަނާކޮށްފަ އެވެ. ނަމަވެސް ސަޕޯޓަރުން އަދިވެސް ދަނީ ބޮޑެތި ސިޓީތަކުގައި ހަމަނުޖެހުން އުފައްދަމުންނެވެ.
