ވެކްސިންގެ ދެވަނަ ޑޯޒް ފުރިހަމަ ކުރުމަށް ފަހު ކަރަންޓީނުވުމަކާ ނުލައި ރަށްރަށަށް ދަތުރު ކުރެވޭނެ އިންތިޒާމް ވަރަށް އަވަހަށް ހަމަޖެހިގެންދާނެ ކަމަށް ރައީސް އިބްރާހިމް މުހައްމަދު ސޯލިހް މިރޭ ވިދާޅުވެއްޖެ އެވެ.
މާލޭން އެހެން ރަށްރަށަށް ދަތުރު ކުރުން މަނާކޮށް ފިޔަވަޅުތައް އެޅިތާ މިއަދަށް އަހަރެއްވެފައިވާއިރު، މާލޭން އެއްވެސް ރަށްރަކަށް ދަތުރު ކުރާ ނަމަ، ކޮންމެ މީހަކު ވެސް 10 ދުވަހުގެ ކަރަންޓީނު މުއްދަތެއް ފުރިހަމަ ކުރަން ޖެހެ އެވެ.
ކަރަންޓީންގައި މުއްދަތެއް ހޭދަކުރަން ޖެހޭތީ މާލޭން ބޭރުނުވެވި ގިނަ ބަޔަކު އެބަތިއްބެވެ. އެ މީހުންނަށް ކިރިޔާ ވެސް އުއްމީދެއް އާވީ، ކޮވިޑް ވެކްސިންގެ ދެ ވަނަ ޑޯޒް ޖެހުމަށް ފަހު ކަރަންޓީނުވުމަކާ ނުލައި ދަތުރު ކުރެވޭނެ އުސޫލު އެކުލަވާލުމުގެ މަސައްކަތް ކުރަމުންދާކަން ހެލުތު މިނިސްޓްރީން އާއްމު ކުރުމުންނެވެ.
މާލޭން ކޮވިޑްގެ ފުރަތަމަ ކޭސް ފެނި، މާލެ ލޮކްޑައުން ކުރިތާ އެއް އަހަރުގެ ހަނދާންތައް އާ ކުރައްވައި ރައީސް ކުރެއްވި ޓުވީޓުގައި ގިނަ ބަޔަކަށް ހިތްހަމަޖެހޭ ފަދަ ކަމެއް އިއުލާންކުރެއްވި އެވެ. އެއީ، ވެކްސިންގެ ދެ ވަނަ ޑޯޒް ފުރިހަމަކުރާތާ ދެ ހަފުތާވެފައިވާ ކޮންމެ މީހަކަށް މިނިވަންކަމާ އެކު ރަށަށް ދަތުރުކުރުމުގެ ފުރުސަތު ލިބިގެންދާނެ ކަމެވެ.
ރައީސް ވިދާޅުވި ގޮތުގައި އެކަން ވަރަށް އަވަހަށް ހަމަޖެހިގެންދާނެ އެވެ.
ފެބުރުއަރީ މަހުގެ ތެރޭގައި ރާއްޖޭގައި ފެށި ވެކްސިނޭޝަން ޕްރޮގްރާމްގައި ގިނަ ބަޔަކު ފުރަތަމަ ޑޯޒު ފުރިހަމަކޮށް، މިހާރު ވަނީ ދެ ވަނަ ޑޯޒު ޖަހަން ފަށައިފަ އެވެ. އެހެންކަމުން ރޯދަ މަސް ނިމި، އީދު ފެށޭއިރު ދެ ވަނަ ޑޯޒަށް ދެ ހަފުތާ ވެފައި ތިބި މީހުންނަށް ކަރަންޓީން ނުވެ ރަށްރަށަށް ދަތުރުކުރުމުގެ ފުރުސަތު ލިބިގެންދާނެ އެވެ.
ސިއްހީ މާހިރުން ވިދާޅުވާ ގޮތުގައި، ވެކްސިނުން އެންމެ ރަނގަޅަށް ރައްކާތެރިކަން ލިބޭނީ ދެ ޑޯޒް ފުރިހަމަވުމުންނެވެ. ވެކްސިންގެ ފުރަތަމަ ޑޯޒުން ހަށިގަނޑުގައި ރައްކާތެރިކަން އުފައްދަން ފަށަން ދެ ހަފްތާ ނަގާ ކަމާއި އެންމެ ރަނގަޅަށް ދިފާއު ލިބެނީ ދެވަނަ ޑޯޒަށް ދެ ހަފްތާ ފަހުން ކަމަށް އެ ބޭފުޅުން ވިދާޅުވެ އެވެ.
މާލޭގައި ދިރިއުޅޭ ގިނަ ބަޔަކު ވެކްސިންގެ ފުރަތަމަ ޑޯޒް ފުރިހަމަކޮށްފައިވާއިރު ދެވަނަ ޑޯޒް ޖެހުމަށް ވެސް ކިޔުތައް ދިގެވެ. ކޮވިޝީލްޑް ވެކްސިންގެ ދެވަނަ ޑޯޒް ޖަހަން ހަ ސެންޓަރެއް އެޗްޕީއޭ އިން ވަނީ ކަނޑައާޅާފަ އެވެ. އެއީ، ސޯޝަލް ސެންޓަރާއި ނޭޝަނަލް އާޓް ގެލަރީއާއި ރައްޔިތުންގެ މަޖްލިހާއި ހުޅުމާލެ ވެކްސިނޭޝަން ސެންޓަރާއި ވިލިމާލެ ޒުވާނުންގެ މަރުކަޒުގެ އިތުރުން ސެނެހިޔާއިންނެވެ.
ފުރަތަމަ ޑޯޒް ވެސް މާލޭގައި އަދިވެސް ޖަހައިދޭއިރު، އެކަމަށް ހާއްސަކޮށްފައިވަނީ ޓްރީޓޮޕް ހޮސްޕިޓަލެވެ. ފުރަތަމަ ޑޯޒްއަށް މިހާރު ޖަހަމުން ދަނީ ހަމަ އެކަނި ސިނޮފާމް ވެކްސިނެވެ. ދެވަނަ ޑޯޒްއަށް ޖަހަނީ ކޮވިޝީލްޑް ވެކްސިނެވެ.
ރާއްޖޭން މިހާތަނަށް ވަނީ 273،660 މީހުން ވެކްސިން ޖަހާފަ އެވެ.
