ކުރީގެ ރައީސް އަބްދުﷲ ޔާމީން އަބްދުލްގައްޔޫމް، ކޮވިޑުން ރައްކާތެރިވުމަށް ވެކްސިން ޖެއްސުވުމަށް ދެކޮޅު ހެއްދެވި ކަމަށް ކަރެކްޝަނަލް ސާވިސްއިން ބުނެފައިވަނީ ހަގީގަތް އޮޅޭ ގޮތަށް ކަމަށް އެމަނިކުފާނުގެ ވަކީލުން ވިދާޅުވެއްޖެ އެވެ.
ކަރަކްޝަނަލް ސާވިސްއިން ރޭ ބުނި ގޮތުގައި ރޭގެ ވަގުތެއްގައި ވެކްސިން ޖެއްސެވުމަށްޓަކައި ޔާމީންގެ އިޒުނަފުޅާއެކު، ހޮސްޕިޓަލަށް ގެންދިޔަ ކަމަށާއި ނަމަވެސް، ފަހުން އެކަމަށް އެމަނިކުފާނު އިންކާރު ކުރެއްވުމުން ވެކްސިން ޖެހިފައިނުވާ ކަމަށެވެ.
ކަރެކްޝަނަލްގެ އެ ވާހަކަތައް ދޮގުކޮށް ޔާމީންގެ ވަކީލުން މިރޭ ނެރުނު ބަޔާނުގައި ބުނި ގޮތުގައި ވެކްސިން ޖެއްސެވުމަށް ޔާމީން އެދިވަޑައިގެންފައިވާތީ، އެމަނިކުފާނު މާލެ ގެނައުމަށްޓަކައި ރޭ ކަރެކްޝަނަލް ސާވިސްއިން މަސައްކަތް ކޮށްފައިވަނީ އިންތިޒާމްތަކެއް ނެތި ކަމަށެވެ.
"މާފުށި ޖަލުން ފުރި ކަރެކްޝަނަލްގެ ލޯންޗު މާލޭ އުތުރު ފަރާތު އެއް ނަންބަރު ޖެޓީ ސަރަހައްދު ބޭރުގައި ޓްރާންސްޕޯޓް ހަމަނުޖެހޭ ކަމަށް ބުނެ އެތައް އިރެއް ވަންދެން ދުއްވާލަ ދުއްވާލަ އޮތުމަށްފަހު މާލޭ ޖަލު ކައިރީގައި ވެސް އެތައް އިރަކު މަޑުކޮށްގެން އޮތުމަށްފަހު ވެސް ޓްރާންސްޕޯޓް ހަމަޖެހިފައިނުވުމުގެ ސަބަބުން ވެކްސިން ޖެހޭ ގޮތް ނުވީ،" ބަޔާނުގައިވެ އެވެ.
ޔާމީން، ހޮސްޕިޓަލަށް ގެންދެވި ކަމަށް ކަރެކްޝަނަލުން ބުނެފައި އޮތް ނަމަވެސް، ވަކީލުންގެ ބަޔާނުގައި ބުނި ގޮތުގައި، އެމަނިކުފާނު މާލެއަށް ބާލާފައި ވެސް ނުވާ ކަމާއި ލޯންޗުގައި އެމަނިކުފާނު އަނބުރާ މާފުށީ ޖަލަށް ގެންދެވީ ކަމަށެވެ.
"އެއްވެސް ހާލެއްގައި ރައީސް ޔާމީން ވެކްސިން ޖެހުމަށް އިންކާރު ކުރައްވާފައިވާތީއެއް ނޫން، އެގޮތަށް ހިނގާފައިވަނީ ވެކްސިން ޖެހުމަށްޓަކައި ހަމަޖައްސަންޖެހޭ އިންތިޒާމްތައް ކަރެކްޝަނަލް ސާވިސްގެ އިހުމާލުން ހަމަޖެހިފައިނުވާތީ،" ބަޔާނުގައިވެ އެވެ.
ވަކީލުންގެ ބަޔާނުގައި ބުނި ގޮތުގައި، ވެކްސިން ޖެއްސެވުމަށް ޔާމީން ދެކޮޅު ހެއްދެވީ ކަމަށް ބުނެ ކަރެކްޝަނަލް ސާވިސްއިން ނޫސްތަކަށް މައުލޫމާތު ދީފައިވަނީ، އެމަނިކުފާނުގެ ބަދުނާމުކޮށް އަގު ވައްޓާލުމަށްޓަކައި ކަމަށެވެ.
މިކަން ފެންމަތިވި މި ދަނޑިވަޅަކީ ޔާމީން ގެކޮޅަށް ބަދަލު ކުރެއްވުމަށް މަޝްވަރާތައް ކުރަމުންދާ ދަނޑިވަޅެއްގަ އެވެ. ރައީސް އިބްރާހިމް މުހައްމަދު ސޯލިހު ވެސް ވަނީ ޔާމީނަށް ދެރަ ގޮތެއް ނުވާނެ ކަމާއި ގެކޮޅަށް ބަދަލު ކުރުމަށް މަޝްވަރާ ކުރައްވާނެ ކަމަށް ވިދާޅުވެފަ އެވެ.
ޔާމީން މާފުށީ ޖަލުގައި ހުންނެވީ އެމްއެމްޕީއާރްސީގެ ފައިސާ އެމަނިކުފާނުގެ އެކައުންޓަކަށް ޖަމާކޮށްފައިވާ މައްސަލައެއްގައި މަނީ ލޯންޑަރިންގެ ކުށް ސާބިތުވެ ނޮވެމްބަރު 8، 2019 ގައި، ފަސް އަހަރަށް ޖަލަށްލުމަށް ކްރިމިނަލް ކޯޓުން ހުކުމް ތަންފީޒު ކުރެއްވުމަށެވެ.
