ދުނިޔޭގެ މައްސަލަތަކާއި ހާރިޖީ ގުޅުންތަކަށް އަމާޒުކޮށްގެން މަޝްހޫރު ނޫސްވެރިޔާ ފަރީދު ޒަކަރިއާ ސީއެންއެންގައި ގެނެސްދޭ "ފަރީދު ޒަކަރިއާ ޖީޕީއެސް" ޝޯ ގެ މި ހަފުތާގެ އެޕިސޯޑް އޭނާ ނިންމާލީ އާއްމު އާދަޔާ، ހިލާފުކޮށެވެ. އެޕިސޯޑުގެ އެންމެ ފަހު ވަގުތުކޮޅު އޭނާ ބޭނުންކުރީ ކޮވިޑް ޖެހިގެން ދިމާވި ސިއްހީ މައްސަލަތަކާ ގުޅިގެން މި ހަފުތާގައި މަރުވި އޭނާގެ މަންމަ ފާތިމަތު ޒަކަރިއާ އަށް، ހިތުގައި އޮތް ލޯބި ބަންޑުންކޮށް އަސަރުގަދަ އަލްވަދާއެއް ކިޔުމަށެވެ.
"އަހަރެމެން މިދަނީ މުޅި ދުނިޔޭން ކޮވިޑުގެ ތިން މިލިއަން މަރާ ދިމާލަށް. މީހުން ބައެއް ފަހަރު ފާހަގަކުރޭ އެ ތަފާސްހިސާބުތަކުގެ ފަހަތުގައި ވަނީ ވަކިވަކި އިންސާނުންނޭ،" ފަރީދު ފެށި އެވެ.
"މި ހަފުތާގައި އަހަރެންގެ މަންމަ، ފާތިމާ ޒަކަރިއާ ވެގެންދިޔައީ އޭގެން ތަފާސްހިސާބުގެ ބަޔަކަށް."
މަގުބޫލު ނޫސްވެރިޔާ، ކުޅަދާނަ ލިޔުންތެރިޔާ، ވިސްނުންތެރި އެނަލިސްޓް، އަދި ދުނިޔޭގެ މައްސަލަތަކަށް ފިކުރުހިންގުމުގައި އެފަދަ ދެ ވަނަ އެއް ނެތް ފަރީދު ބުނީ އޭނާ، އޭނާ އަށް ވުމުގެ ފަހުރު އެކަކަށް އެންމެ ބޮޑަށް ނެގޭނެ މީހަކީ މަންމަ ކަމަށެވެ.
"ކުޑަ ކަމަކަށް ވިޔަސް ބޮޑު ކަމަކަށް ވިޔަސް އަހަރެން މި ދުނިޔޭން ހާސިލްކުރި ކަމެއް ވިއްޔާ އެކަމަކަށް (ޒިންމާވާނީ) މަންމަ. އެހެންވެ އަހަރެން ހިތަށް އެރީ މަންމައާ ބެހޭގޮތުން ވާހަކަދައްކާލާނަމޭ،" ފަރީދު ބުންޏެވެ.
އަޅާލާނެ މީހަކު ނެތް ނިކަމެތި ކުދިންނަށް ކިޔައިދިނުމަށް އިޖްތިމާއީ ހަރަކާތްތެރިއެއްގެ ގޮތުގައި އެންމެ ފުރަތަމަ މަސައްކަތް ފެށި ނަމަވެސް ފަރީދުގެ މަންމަ ފާތިމާ ދެން މިސްރާބު ޖެހީ ނޫސްވެރިކަމާ ދިމާލަށެވެ. ކުޑަކުދިންގެ ކޮލަމިސްޓެއްގެ ގޮތުގައި މަސައްކަތް ފެށުމަށް ފަހު އޭނާ ވަނީ މުމްބާއީ ޓައިމްސް އާއި ދަ ޓައިމްސް އޮފް އިންޑިއާގެ ސަންޑޭ އެޑިޝަނުގެ އެޑިޓަރުކަންކޮށްފަ އެވެ.
"1970ގެ އަހަރުތަކުގައި މަންމަ އަކީ އިންޑިއާގެ މީޑިއާގެ ސީނިއާ މަގާމުތަކުގައި ތިބި މަދު އަންހެނުންގެ ތެރެއިން އެކެއް،" ފަރީދު ކިޔައިދިނެވެ. "އެއީ ފިރިހެނުންގެ ދުނިޔެއެއް. އެކަމަކު މަންމަ ދުވަހަކު ވެސް ޝަކުވާއެއް ނުކުރޭ. ބުރަކޮށް މަސައްކަތްކުރަމުން ކުރިއަށް ދިޔައީ."
ފާތިމާ ވަނީ އިނގިރޭސި ވިލާތުގެ ބޮޑުވަޒީރު މާގްރެޓް ތެޗާ އާއި އިންޑިއާގެ ބޮޑުވަޒީރު އިންދިރާ ގާންދީއާ އިންޓަވިއުކޮށްފަ އެވެ. އަދި އިސްލާމުންނާ ބެހޭގޮތުން، އެތައް ބަޔެއްގެ ތާއީދާއި މަގުބޫލުކަން ލިޔުނު ކަވާ ސްޓޯރީއެއް ހަދާފައިވެ އެވެ. ފަހުން ނޫސްވެރިކަމާ ދުރުވުމަށް ފަހު ފާތިމާ މިސްރާބު ޖެހީ އޭނާގެ ފުރަތަމަ ލޯތްބާ ދިމާލަށެވެ. ކިޔަވައިދިނުމަށެވެ. ފާތިމާގެ ފިރިމީހާ، އިންޑިއާގެ ގާނޫނޫ ހަދާ މަޖިލީހުގެ މެމްބަރު އަދި އިސްލާމީ އިލްމުވެރިޔާ ރަފީގު ޒަކަރިއާއާ ވެގެން އުފެއްދި ސްކޫލުން ނިކަމެތި އެތައް ކުދިން ދަރިވަރުވި އެވެ.
"ތައުލީމަކީ އިޖްތިމާއީ ބަދަލު ގެނައުމަށް މުހިއްމު ވަސީލަތެއް. ތައުލީމާއި ތަމްރީނުގެ ފައިދާ މުޖުތަމައުގެ އެތައް ދިމާލަކަށް ކުރޭ،" ފަރީދުގެ ޝޯގައި ދެއްކި ފާތިމާގެ ވީޑިއޯ ކްލިޕެއްގައި އޭނާ ބުނެފައިވެ އެވެ.
އެކަމަކު ފަރީދު ބުނީ ނޫސްވެރިކާއި ތައުލީމީ ހިދުމަތުގެ ކާމިޔާބީތަކާ އެކު ވެސް، މަންމަ އެންމެ ފަހުރުވެރިވީ މަންމައެއްގެ ގޮތުގައި އަދާކުރެވުނު ދައުރާ މެދު ކަމަށެވެ. ފަރީދު ބުނި ގޮތުގައި ދަރީންގެ ކަންކަމަށް ހުސްވުމުގެ އިތުރުން މަންމަގެ އެންމެ ހާއްސަ ސިފައަކީ ދަރީންގެ ވާހަކަތައް ސީރިއަސްކޮށް ނެގުން ކަމަށެވެ.
"އަހަރެން ހަނދާން އެބަހުރި ރޭގަނޑުގެ ކެއުމުގެ ތެރޭގައި، މަންމަ (އޭރު މަސައްކަތްކުރި މަޖައްލާގެ) ކަވަރުގައި ޖަހާނީ ސްޓޯރީއަކާ މެދު އަހަރެމެން މަޝްވަރާކުރިން. އޭރު ވެސް އުމުރުން 10 އަހަރުގެ އަހަރެންގެ ވަރުގަދަ ވިސްނުންތަކެއް ހުރި،" ފަރީދު ބުންޏެވެ.
ފާތިމާ (ކ-2) އޭނާގެ މާމަދަރިންނާ އެކު. --ފޮޓޯ: އިންސްޓަގްރަމް
ފަރީދު ބުނި ގޮތުގައި ދަރިން ދެކެ މަންމަވީ ލޯބި އެންމެ ބޮޑަށް ހާމަކޮށްދެނީ، އެނބުރި ނާންނާކަން އެނގޭ އިރު ވެސް، ދަރިން އެމެރިކާ އަށް ކިޔަވަން ދިއުމަށް ބާރު އެޅި އެޅުން ކަމަށެވެ. މަންމަގެ އުފާވެރިކަން އަގެއްގެ ގޮތުގައި ދެއްކުމަށް ފަހު ވިޔަސް މަންމަ ބޭނުންވީ ދަރީންނަށް ރަނގަޅު ގޮތް ކަމަށް ފަރީދު ބުންޏެވެ.
ކަންވީ އެހެންނެވެ. އެމެރިކާގެ ޔޭލް ޔުނިވާސިޓީން ފުރަތަމަ ޑިގްރީ އަދި ހާވަޑް ޔުނިވާސިޓީން މާސްޓާސް އާއި ޕީއެޗްޑީ ހާސިލްކުރުމަށް ފަހު ފަރީދު އެމެރިކާގައި މަޑުކުރީ އެވެ. އެމެރިކާގެ ރައްޔިޔަކަށްވެ އެ ގައުމުގައި ކެރިއަރު ބިނާކުރީ އެވެ. ނިއުސްވީކް އިންޓަނޭޝަނަލްގެ އެޑިޓަރުކަމާއި ޓައިމް މަޖައްލާގެ ކޮންޓްރިބިއުޓިން އެޑިޓަރުކަންކޮށްފައިވާ ފަރީދު ހުށަހަޅާ "ޖީޕީއެސް" ޝޯ އަކީ ދުނިޔޭގެ މަސްރަހު ދިރާސާކޮށް މުޅި ދުނިޔޭގައި ގެނެސްދޭ އެންމެ މަގުބޫލު އެއް ޝޯ އެވެ. ވޮޝިންޓަން ޕޯސްޓުގައި އޭނާ ލިޔާ ކޮލަމްތައް އެހާމެ ހިނގަ އެވެ. މިވަގުތު ދުނިޔޭގައި ހުރި އެންމެ ވަރުގަދަ އެއް ޕަބްލިކް އިންޓަލެކްޗުއަލް، ވަނީ "ޕޯސްޓް އެމެރިކަން ވޯލްޑް" ފަދަ ކާމިޔާބު އެތައް ފޮތެއް ލިޔެފަ އެވެ.
އެކަމަކު ފަރީދުގެ ދިރިއުޅުމުގައި ހުސްކަމެއް އެބައޮތެވެ؛ އޭނާ ބުނީ ހިޖުރަވެރިންގެ ވާހަކަ މީހުން ދައްކަނީ އުފާވެރި ވާހަކައެއްގެ ގޮތުގައި ކަމަށާއި އެކަމަކު ކޮންމެ ހިޖުރަވެރިއެއްގެ ވާހަކައިގައި ހިތާމަ ވެސް އެކުލެވޭ ކަމަށެވެ.
"ގައުމަކާއި ސަގާފަތަކާއި އާއިލާއެއް ދޫކޮށްލާފައި އައުމުގެ ހިތާމަ. ލޯބިވާ ދަރިފުޅާ ދުރުވާން ޖެހި، ރޭގަނޑު ސިއްރުސިއްރުން ކަރުނަ އޮހޮރަ މަންމައަކާ ވަކިވުމުގެ ހިތާމަ،" ފަރީދު އެ ހުސްކަން ސިފަކޮށްދިނެވެ.
ފަރީދު ބުނީ ކޮވިޑުގެ ބަލިމަޑުކަމުގެ ސަބަބުން، އެންމެ ފަހު ފަހަރަށް މަންމަ ދެކިލުމުގެ ފުރުސަތު ނުލިބި އަދި އެ މަންމަ ވަޅުނުލުމުގެ ފުރުސަތު ނުލިބުމުން މިއަދު އޭނާ އަށް އެ ދުރުމިނުގެ ހިތާމަ އިހުސާސްކުރެވޭ ކަމަށެވެ.
"އެހެންވެ އަހަރެން ހިތަށް އެރީ މި ފުރުސަތުގެ ބޭނުން ހިފައި ބުނެނާލަމޭ، މަންމާއޭ އަލްވަދާއު ކިޔަމޭ، މަންމަ ދެކެ ވަރަށް ލޯބިވެޔޭ،" ފަރީދު ނިންމާލި އެވެ.
މިއީ ފަރީދު އޭނާގެ މަންމަ އަށް ލޯބި ބަންޑުންކޮށްލި ފުރަތަމަ ފަހަރެއް ވެސް ނޫނެވެ. ހަވާޑް ޔުނިވާސިޓީގެ ދަސްވެނިވުމުގެ ރަސްމިއްޔާތުގައި 2012 ވަނަ އަހަރު ދިން ތަގުރީރުގައި، މައިންބަފައިން ދެކެ ލޯބިވުމާ ގުޅޭ ދިން ނަސޭހަތް ގިނަ ބަޔެއްގެ ހަނދާނުގައި ހަރުލާފައިވެ އެވެ. ތަޖުރިބާ އިން ލިބުނު ފިލާވަޅެއް ކަމަށް ބުނެ ފަރީދު ދަސްވެނީންނަށް އެ ދުވަހު ބުނީ ދަރިން ދެކެ މަައިންބަފައިން ވާ ލޯބި، ތިމާ އަށް އަމިއްލަ ދަރިން ލިބުމުން މެނުވީ އިހުސާސްނުކުރެވޭނެ ކަމަށެވެ.
"ދަސްވެނީންނޭ، އަހަންނަށް ކަމެއްކޮށްދީ. މާ ގިނަ ދުވަހު މަޑުނުކުރޭ. އަހަރެންގެ މަންމަ ދިރިއުޅެނީ 8000 މޭލު ދުރުގައި (އިންޑިއާގައި) އެހެންވެ އަހަރެން ކޮންމެ ދުވަހަކު މިކަމާ ވިސްނަން. ހުރިހާ ދުވަހެއްގެ ތެރެއިން ވެސް މިއަދު ތިކުދިން ތެދުވެ މައިންބަފައިންގައިގައި ބައްދާލާފައި ބުނޭ ލޯބިވެޔޭ،" ފަރީދު ބުންޏެވެ.
