މިދިޔަ ހޮނިހިރު ދުވަހު އިންތިހާބު ކުރި ކައުންސިލަރުން ހުވާ ކުރުން އޮންނާނީ ރޯދައިގެ ފަހުން ކަމަށް، ލޯކަލް ގަވަމަންޓް އޮތޯރިޓީ (އެލްޖީއޭ) އިން ބުނެފި އެވެ.
އެލްޖީއޭގެ ސީއީއޯ އަފްޝަން ލަތީފް، "އަދަދު" އަށް ވިދާޅުވީ އާ ކައުންސިލަރުން ހުވާ ކުރަން މިހާރު މަސައްކަތް ކުރަމުން އަންނަ ތާރީހަކީ އަންނަ މަހުގެ 18 ވަނަ ދުވަސް ކަމަށެވެ. ނަމަވެސް އަދި އެ ދުވަސް ޔަގީން ނުވާ ކަމަށް އޭނާ ވިދާޅުވި އެވެ.
"ރޯދައާއި އީދަށް ފަހު ހުވާ ކުރަން އަދި އޮތީ. ރޯދައަށް ފަހު މަސައްކަތް ފަށަން ވެސް އާ ކައުންސިލަރުންނަށް ފަސޭހަ ވާނެތީ އާއެކު،" އަފްޝަން ވިދާޅުވި އެވެ.
ކައުންސިލް އިންތިހާބުގެ ވަގުތީ ނަތީޖާ އިއުލާން ކުރަން އިލެކްޝަންސް ކޮމިޝަންސް (އީސީ) އިން މިހާރު ވަނީ ފަށައިފަ އެވެ.
ލޯކަލް ކައުންސިލްތަކުގެ އިންތިހާބު ބާއްވަން ކުރިން މަސައްކަތް ކުރީ މިދިޔަ އަހަރު އެވެ. އެ މުއްދަތުގެ ތެރޭގައި އިންތިހާބު ނުބޭއްވުނީ ކޮވިޑުގެ ސަބަބުންނެވެ. އާ ކައުންސިލަރުން އިންތިހާބު ނުކުރެވުމުގެ ސަބަބުން ގާނޫނަށް ބަދަލު ގެނެސް ކުރިން ހޮވައިފައި ތިބި ކައުންސިލަރުންގެ މުއްދަތު ފަހުން ވަނީ އިތުރުކޮށްފަ އެވެ.
އާ ކައުންސިލަރުން އިންތިހާބު ކޮށްފައިވާއިރު މިފަހަރު ވެސް އެންމެ ގިނަ ގޮނޑި ކާމިޔާބުކޮށްފައިވަނީ ވެރިކަން ކުރާ އެމްޑީޕީންނެވެ.
ނަމަވެސް އެ ޕާޓީގެ ތާއީދު ކުރިން ބޮޑު ބައެއް ރަށްތައް މިފަހަރު ގެއްލުނެވެ. އޭގެ ތެރޭގައި މާލޭ ސިޓީގެ މޭޔަރުކަން ވެސް ހިމެނެ އެވެ. އެ އިންތިހާބު ކާމިޔާބު ކުރީ ޕީޕީއެމްގެ ޑރ. މުހައްމަދު މުއިއްޒު އެވެ.
