ލިނޭޖް ސްޕޯޓްސް ކްލަބް ވަކިވުމުން 14 ޓީމާ އެކު ތިން ވަނަ ޑިވިޝަން ފުޓްބޯޅަ މުބާރާތް އަންނަ އާދިއްތަ ދުވަހު ފަށަން އެފްއޭއެމުން ނިންމައިފި އެވެ.
ތިން ވަނަ ޑިވިޝަން ފުޓްބޯޅަ މުބާރާތް މިދިޔަ ފެބްރުއަރީ މަހު ތެރޭގައި ބާއްވަން ނިންމައި ޝެޑިއުލް ނެރުނުއިރު، 15 ޓީމު މުބާރާތުގައި އޮތެވެ. ފެބްރުއަރީ މަހު މުބާރާތް ފެށެން ކުޑަ ދުވަސްކޮޅަކަށްވެފައި ވަނިކޮށް ފަސްކުރަން ޖެހުނީ ކޮވިޑް-19ގެ ކޭސްތައް މާލެ ސަރަހައްދުގައި ގިނަވާތީ ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ އެންގުމަށް ކުޅިވަރު ހަރަކާތްތައް ހުއްޓާލަން ޖެހުމުންނެވެ.
މިދިޔަ މަހު 26 ވަނަ ދުވަހު އެޗްޕީއޭގެ ހުއްދައާ އެކު ދިރާގު ދިވެހި ޕްރިމިއާ ލީގުގެ ކުޅުން ފެށުމާ އެކު އެފްއޭއެމުން އަވަސްވެގަތީ ތިން ވަނަ ޑިވިޝަން ވެސް އަަވަހަށް ފެށުމަށެވެ. އޭގެ ނަތީޖާ އަކަށްވީ އަންނަ އާދިއްތަ ދުވަހު މުބާރާތް ފެށޭ ގޮތްވުމެވެ.
މުބާރާތުގެ ފޯމެޓް މި ވަގުތު އޮތްގޮތަށް ބަލާއިރު، ފުރަތަމަ ދެ ގްރޫޕްގައި ހަތަރު ޓީމު ހިމެނޭނެ އެވެ. އަދި ދެން އޮތް ދެ ގްރޫޕްގައި ހިމެނޭނީ ތިން ޓީމެވެ. ކޮންމެ ގްރޫޕަކުން ވެސް ދެ ޓީމު ކުއާޓާ ފައިނަލަށް ހޮވޭނެ އެވެ.
ގްރޫޕް އޭގައި ހިމެނެނީ ޓެންޓް ސްޕޯޓްސް ކްލަބް، ކްލަބް ބްލޫ ލެޕާޑް ސްޕޯޓްސް، ބިސްބުރު ސްޕޯޓްސް، ތުޅާދޫ އެވެންޗާސް ސްޕޯޓްސް އެވެ. ގްރޫޕް ބީގައި ހިމެނެނީ ވިލިމާލެ ޔުނައިޓެޑް، ލޮރެންޒޯ ސްޕޯޓްސް ކްލަބް، ކެޕިޓަލް ސިޓީ ސްޕޯޓްސް ކްލަބް އަދި ބެންޗް ސްޕޯޓްސް ކްލަބް އެވެ. ގްރޫޕް ސީގައި އޮތީ ސްޕޯޓްސް ކްލަބް ހޮސްކޯވޯ، ލިޓްލް ޓައުން ސްޕޯޓްސް ކްލަބް އަދި ބުރު ސްޕޯޓްސް ކްލަބް އެވެ. ފަހު ގްރޫޕްގައި ހިމެނެނީ ކްލަބް ޓީނޭޖް، ކްލަބް އޮންލީ ވަން އޮޕޮޗިއުނިޓީ އަދި ރޭޖް ސްޕޯޓްސް ކްލަބް އެވެ.
ޓާފް ދަނޑާއި ގައުމީ ފުޓްބޯޅަ ދަނޑުގައި ވެސް ތިން ވަނަ ޑިވިޝަން މެޗުތައް ކުޅޭގޮތަށް ވަނީ ހަމަޖެހިފަ އެވެ. ޓާފް ދަނޑުގައި އާދިއްތަ ދުވަހުގެރޭ 10 ޖަހާއިރު ކުޅޭ ތިން ވަނަ ޑިވިޝަން ފުރަތަމަ މެޗުގައި ޓެންޓް ނުކުންނާނީ ކްލަބް ބްލޫ ލެޕާޑް ސްޕޯޓްސްއާ ދެކޮޅަށެވެ.
ކޮވިޑް-19ގެ ސަބަބުން އަވަހަށް ސީޒަން ނިންމާލަން ޖެހޭތީ މިދިޔަ ސީޒަނުގައި ތިން ވަނަ ޑިވިޝަން ނުބާއްވަ އެވެ. އެހެންވެ މި ފަހަރުގެ ތިން ވަނަ ޑިވިޝަން އަވަހަށް ބާއްވަން ނިންމީ ދެ ވަނަ ޑިވިޝަނަށް ޕްރޮމޯޓްވާނެ ހަތަރު ޓީމެއް ކަނޑައެޅުމަށެވެ. އެފްއޭއެމުން ބުނީ ތިން ވަނަ ޑިވިޝަން ނިމުމުން އެކަށީގެންވާ މުއްދަތެއް ދިނުމަށް ފަހު ދެ ވަނަ ޑިވިޝަން ފުޓްބޯޅަ މުބާރާތް ވެސް ފަށާނެ ކަމަށެވެ.
