ރޯދަމަހާ ދިމާކޮށް މާލޭ މަގުމަތީގައި ގިނަ އަދަދެއްގެ އާންމުކޮށް އުކާނުލެވޭ ފަދަ ބޮޑެތިި ކުނި ބަހައްޓަމުންދާތީ އެކަން ނުކުރުމަށް ވެމްކޯއިން އަންގައިފި އެވެ.
ރަޖިސްޓްރީކޮށްގެން ވެމްކޯއިން އުކައިދެނީ ގޭބީސީތަކުން އާންމުކޮށް އުފައްދާ ކުންޏެވެ. ފަރުނީޗަރު ފަދަ ބޮޑެތި ކުނި އުކުމަށް ނަގަން ޖެހެނީ ވެމްކޯގެ އެހެން ހިދުމަތެކެވެ.
ވެމްކޯއިން މިއަދު ނެރުނު ބަޔާނެއްގައި ބުނީ، މިހެން މާލޭގެ މަގުތަކަށް ޖަމާކޮށްފައި ހުރި ގިނަ ކުންޏަކީ ގޭބިސީތަކުން ނަގާ ކުންޏަށް ނުފެތޭ މާ ބަރު އަދި ބޮޑެތި ކުނިތަކެއް ކަމަށެވެ.
މިހެން މަގުމަތީގައި ކުނިބެހެއްޓުމުގެ ބަދަލުގައި ބޮޑެތި ކުނި އުކާލުމަށް ހާއްސަ "ކެޕްސް" ހިދުމަތުގެ ބޭނުން ހިފުމަށް ވެމްކޯއިން ބުންޏެވެ.
މި މައްސަލައަކީ ކޮވިޑް-19 ރޯގާގެ ސަބަބުން މާލެ ސަރަހައްދުން ކުނި ނަގާ އުސޫލު ބަދަލުކޮށް، މަގުމަތީގައި ބަހައްޓައިގެން ކުނި ނަގަން ފެށި ފަހުން ވެމްކޯއަށް ހައްލު ނުވެގެން އުޅޭ މައްސަލައެކެވެ.
ދަނޑިވަޅުގެ ފައިދާ ނަގައިގެން ވެމްކޯގެ ހިދުމަތަށް ރަޖިސްޓްރީ ނުކުރާ ފަރާތްތަކުން މަގުމަތީގައި ކުނި ބަހައްޓައިގެން ވެމްކޯއަށް އެ ކުނި އުކާލަން މަޖުބޫރުވާކަމަށް ބުނެ އެ ކުންފުނިން ވަނީ މީގެ ކުރިންވެސް ކަންބޮޑުވުން ފާޅުކޮށްފަ އެވެ. މިހެން ކުނި ބަހައްޓާ ފަރާތްތަކުގެ ތެރޭގައި ގޭބިސީތަކާއި ވިޔަފާރިތައް ހިމެނޭކަމަށް ވެމްކޯއިން ތުހުމަތުކުރެ އެވެ.
ވެމްކޯގެ ހިދުމަތަށް ރަޖިސްޓްރީކޮށްފައިވާ ފަރާތްތަކުން ވީހާވެސް އަވަހަށް އެ ކޯޕަރޭޝަނުގެ ހިދުމަތަށް ދައްކަންޖެހޭ ފީ ދެއްކުމަށް އެ ކުންފުނިން އެދުނެވެ.
