މިހާރު ހިނގަމުންދާ ރޯދަ މަހުގެ ތެރޭގައި އުތުރު އެފްރިކާ އާއި މެދުއިރުމަތީގެ ބައެއް ގައުމުތަކުގައި ކޮވިޑުގެ ހާލަތު ގޯސްވެދާނެތީ ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ކަންބޮޑުވުން ފާޅުކޮށްފި އެވެ.
ޑަބްލިއުއެޗްއޯއިން ބުނީ އެ ސަރަހައްދުތަކުގައި ކޮވިޑް ކޭސްތައް މިދިޔަ ހަފްތާގައި 22 ޕަސެންޓު އިތުރުވި ކަމަށެވެ. އަދި މި ބަލީގައި މަރުވި މީހުންގެ އަދަދު ވަނީ 17 ޕަސެންޓު އިތުރުވެފަ އެވެ.
ރޯދަ މަހުގެ ތެރޭގައި ގައިދުރުކަމާއި ރައްކާތެރިކަމުގެ އެހެން ފިޔަވަޅުތަކަށް ސަމާލުކަން ދިނުން ކުޑަވެއްޖެ ނަމަ ކޭސްތައް އިތުރުވެދާނެ ކަމަށް ޑަބްލިއުއެޗްއޯއިން ބުނެ އެވެ.
އެ ޖަމިއްޔާއިން ގައުމުތަކަށް ގޮވާލާފައި ވަނީ މިސްކިތްތައް ކައިރީގަ އާއި މިސްކިތްތަކުގެ އެތެރޭގައި ރައްކާތެރިކަމުގެ ފިޔަވަޅުތައް ރަނގަޅަށް ތަންފީޒު ކުރުމަށެވެ. އޭގެ ތެރޭގައި ގައިދުރުކަން ބެހެއްޓުމާއި، ކުޑަ ދޮރުތައް ހުޅުވައި ވައި ދައުރުވާ ގޮތަށް ބެހެއްޓުމާއި، ގަވާއިދުން ޑިސްއިންފެކްޓު ކުރުން ފާހަގަކޮށްފައި ވެއެވެ.
އޭގެ އިތުރުން ބަލި މީހުންނާއި އުމުރުން ދުވަސްވީ މީހުން އަދި ބޮޑެތި ބަލިތަކަށް ފަރުވާ ކުރާ މީހުން މިސްކިތަށް ނުދިޔުމަށް ބާރު އެޅުމަށް ވެސް ޑަބްލިއުއެޗްއޯއިން އެދެ އެވެ.
