ޕާކިސްތާނުގެ އިދިކޮޅު ޕާޓީއެއްގެ ލީޑަރު ހައްޔަރު ކުރުމާ ގުޅިގެން ކުރަމުންދާ މުޒާހަރާތަކުގައި ހަމަނުޖެހުން އުފެދިފައި ވާތީ، އެ ޕާޓީ ހިންގުން މަނާކޮށްފި އެވެ.
ޓެރަރިޒަމް މަނާ ކުރުމުގެ ގާނޫނުގެ ދަށުން ހިންގުން މަނާކޮށްފައި ވަނީ ތެހްރީކޭ ލައްބައިކް ޕާޓީ (ޓީއެލްޕީ) އެވެ. އެއީ ހައްދުފަހަނަ އަޅާފައިވާ ފިކުރުގެ ޕާޓީއެއް ކަމަށް ސަރުކާރުން ބުނެ އެވެ.
އެ ޕާޓީގެ ލީޑަރު ސާދް ރިޒްވީ ހައްޔަރު ކުރުމުން ހިންގަމުންދާ ހަމަނުޖެހުމުގައި މިހާތަނަށް ހަތް މީހަކު މަރުވެފައި ވާއިރު 300 އަށް ވުރެ ގިނަ މީހުންނަށް ވަނީ އަނިޔާވެފަ އެވެ.
ސާދް ހައްޔަރު ކުރި ސަބަބު ހާމަ ނުކުރި ނަމަވެސް، ބެލެވޭ ގޮތުގައި އެއީ ފްރާންސްގެ ސަފީރު ގައުމުން ފޮނުވާލުމަށް ސަރުކާރަށް ދިން އިންޒާރާ ގުޅިގެން އެޅި ފިޔަވަޅެކެވެ.
އޭނާ ވަނީ އެޕްރިލް 20 ގެ ކުރިން ސަފީރު ފޮނުވާލަން ސަރުކާރަށް ގޮވާލާފަ އެވެ. އެގޮތަށް ގޮވާލީ ފްރާންސްގައި ކީރިތި ރަސޫލާގެ ކާޓޫން ކުރަހާ ފުރައްސާރަ ކުރި މައްސަލައެއްގައި ހިތްހަމަނުޖެހިގެންނެވެ.
ޓީއެލްޕީއަކީ އިސްލާމްދީނަށް ފުރައްސާރަ ކުރުމާ ދެކޮޅަށް މީގެ ކުރިން ބޮޑެތި އެއްވުންތައް ބާއްވާފައިވާ ޕާޓީ އެކެވެ. ދީނަށް ފުރައްސާރަ ކުރުމަކީ ޕާކިސްތާނުގައި ވަރަށް ހޫނުވާ މައްސަލަ އެކެވެ.
މިދިޔަ މަހު ވެސް ޝިއައީންގެ ދީނީ އިލްމިވެރިއަކަށް ދީނަށް ފުރައްސާރަ ކުރި ކަމަށް ކުރެވުނު ތުހުމަތެއްގައި ބަޔަކު ވަނީ އޭނާއަށް ހަމަލާދީ މަރާލާފަ އެވެ.
