ދެ ކެންޑިޑޭޓުންގެ މެދުގައިވާ ފަރަގަށްވުރެ ބާތިލު ވޯޓު ގިނަ މާލޭ ސިޓީ ކައުންސިލްގެ ހަ ދާއިރާއެއް އަލުން ގުނައިދިނުމަށް ވެރިކަން ކުރާ އެމްޑީޕީގެ ފަރާތުން އިލެކްޝަންސް ކޮމިޝަނުގައި މިއަދު އެދެފި އެވެ.
އެމްޑީޕީން ގުނައިދިނުމަށް އެދިފައި ވަނީ މެދު ހެންވޭރާއި ހެންވޭރު ދެކުނާއި ހެންވޭރު ހުޅަނގާއި މައްޗަންގޮޅީ އުތުރާއި މާފަންނު އުތުރު އަދި މާފަންނު ހުޅަނގު ދާއިރާ އެވެ.
ކޮމިޝަނަށް ޝަކުވާ ހުށަހެޅުމަށްފަހު ބޭއްވި ނޫސްވެރިންގެ ބައްދަލުވުމެއްގައި އެމްޑީޕީގެ ޗެއާޕާސަން ވިދާޅުވީ އަލުން ގުނައިދިނުމަށް އެދިވަޑައިގަތީ "ބާތިލް ވޯޓު ކަނޑައެޅި ގޮތާމެދު ޝައްކު އުފެދިފައިވާތީ" ކަމަށެވެ.
"އޭގެ އިތުރުން ބައެއް ފޮށީގެ ޓެލީ ޝީޓުތައް ވެސް ދިމާ ނުވޭ. އަދި ހަމަ އެހެންމެ އެއް ފަރާތަކުން ވޯޓުލާން ދިޔައިރު އޭނާގެ ނަމުގައި ވޯޓުލާފަ. ނަން ލިސްޓުގައި އިނީ ވޯޓު ލާފަ ކަމަށް،" ހަސަން ލަތީފް ވިދާޅުވި އެވެ.
ބައެއް ވޯޓު ކަރުދާސްތަކުގައި އެކަކަށް ވޯޓުލާފައި، އިތުރު މީހަކަށް ވޯޓުލާފައި ނެތުމުން ބާތިލްކޮށްފައިވާ ކަމަށް ހަސަން ލަތީފް ވިދާޅުވި އެވެ. ނަމަވެސް މާލޭގައި މޭޔަރަށް އެކަނި ލާފައި ހުރި ވޯޓު ކަރުދާސްތައް ވެސް ބާތިލު ނުކުރާ ކަމަށް އޭނާ ވިދާޅުވި އެވެ.
"ބާތިލްކޮށްފައި ހުރި ވޯޓުތަކުގައި އަމަލުކޮށްފައިވާ ގޮތާއި ބާތިލްގެ އަދަދުތައް ހުރި ގޮތް ކަމަށް އަޅުގަނޑަށް ފާހަގަ ކުރެވޭތީ، މިކަންތައް މިހެން ހުރުމުން އަޅުގަނޑުމެން އިލެކްޝަންސް ކޮމިޝަނުގައި މި އެދުނީ މި ދެންނެވި ހަ ފޮށީގެ ވޯޓު އަލުން ގުނައިދެއްވުމަށް،" ހަސަން ލަތީފް ވިދާޅުވި އެވެ.
ޓެލީ ޝީޓުތައް ދިމާނުވާ ބައެއް ވޯޓު ފޮށިތައް އިލެކްޝަންސް ކޮމިޝަނުން އިއްޔެ ގުނަން މަސައްކަތް ކުރުމުން އެމްޑީޕީ އާއި ޕީޕީއެމުން އެއްވެ ވަނީ ހަމަނުޖެހުން ހިންގައިފަ އެވެ. އެހެންވެ އެ ފޮށިތައް ގުނުން ވަނީ ހުއްޓާލައިފަ އެވެ.
އިލެކްޝަންސް ކޮމިޝަނުގެ މަރުކަޒު، ބާ ޖަމާލުއްދީން ސްކޫލް ކައިރިއަށް އެއްވެފައި ތިބި ދެ ޕާޓީގެ މެންބަރުން އެތަނުން ފޮނުވާލާފައި ވަނީ ޕެޕާ ސްޕްރޭ ޖަހައިގެނެވެ.
މިދިޔަ ހޮނިހިރު ދުވަހު ބޭއްވި ލޯކަލް ކައުންސިލްތަކުގެ އިންތިހާބުގެ ގިނަ ގޮނޑި ގެންގޮސްފައި ވަނީ އެމްޑީޕީ ކަމަށް މިހާތަނަށް ވަގުތީ ނަތީޖާތަކުން ދައްކަ އެވެ.
ނަމަވެސް މާލޭ ސިޓީ ހިމެނޭ ގޮތަށް ކުރިން އެމްޑީޕީން ވިދިވިދިގެން ކާމިޔާބު ކުރަމުން އައި މުހިންމު ކައުންސިލްތަކެއްގެ އަގުލަބިއްޔަތު ވަނީ އެ ޕާޓީއަށް ގެއްލިފަ އެވެ. އެގޮތުން މާލޭ މޭޔަރު ކަމަށް ވެސް އިންތިހާބުވެވަޑައިގެންފައި ވަނީ އިދިކޮޅު ޕްރޮގްރެސިވް ޕާޓީ އޮފް މޯލްޑިވްސްގެ ޑރ. މުހައްމަދު މުއިއްޒެވެ.
