ކްލަބް ވެލެންސިއާ އިން އެންމެ ފަހުން ކުޅުނު މެޗުތަކުގައި އަނިޔާގައި ހުރެ ވެސް އެ ޓީމުގެ ކެޕްޓަން އަލީ އަޝްފާގު (ދަގަނޑޭ) ޓީމަށް އެހީވަމުން އަންނަ ކަމަށް ވެލެންސިއާގެ ކޯޗު މުހައްމަދު އާތިފް (އާތީ) ބުނެފި އެވެ.
ލީގުގައި އެންމެ ފަހުން ވެލެންސިއާ އިން ސުޕަ ޔުނައިޓެޑް ސްޕޯޓްސް (ސަސް) އަތުން މޮޅުވި މެޗުގައި ދަގަނޑޭ ވަނީ ދެ ވަނަ ހާފްގެ ކުރީކޮޅުގައި ބަދަލުކޮށްފަ އެވެ. އޭގެ ކުރިން މެޗުތަކެއްގައި ދެ ވަނަ ހާފްގައި ލިބުނު އަނިޔާގެ ސަބަބުން ވެސް ދަގަނޑޭ ބަދަލުކޮށްފައިވެ އެވެ.
ސަސް އަތުން މޮޅުވި މެޗަށް ފަހު އޮތް ނޫސްވެރިންގެ ބައްދަލުވުމުގައި އާތީ ބުނީ މީޑިއާގައި އެ ވާހަކަތައް ނުދެއްކި ނަމަވެސް ކޮންމެވެސް ވަރަކަށް ދަގަނޑޭގެ އަނިޔާގެ މައްސަލަތައް އެބަހުރި ކަމަށެވެ.
"އެހެން ނަމަވެސް ދަގޭ (ދަގަނޑޭ) ކުޑަކޮށް ބަލިވެ އެ އުޅެނީ ފައިގެ އިންޖަރީ އާއި އެހެން ކުޑަ ކަމެއް އެބައުޅޭ. އަހަރެމެން ގަބޫލުކުރަނީ ހަމަ ދަގޭ (ދަގަނޑޭ) އެ ބަލަނީ އެ ހުރި އިންޖަރީއާ އެއްކޮށް ވެސް ވެލެންސިއާ އަށް ކޮންމެ ވެސް ކަމެއް ކޮށްދެވޭތޯ. އެހެންވީމަ އަހަރެމެން ވެސް ވީ ވަރަކުން ދަގޭ (ދަގަނޑޭ) ބަހައްޓައިގެން ނަތީޖާ ނެރެގެން ކުޅެވޭތޯ މި މަސައްކަތްކުރަނީ،" އާތީ ބުންޏެވެ.
" ދަގޭ (ދަގަނޑޭ) ހަމަ 100 ޕަސެންޓް ދެމުން އެ ދަނީ. މި ބުނާހިން ކުޑަކޮށް ބަލިވެ އުޅެންޏާމު މެކްސިމަމް (އެންމެ ރަނގަޅު ކުޅުން) ނުދެއްކިދާނެ. ދެން ތަންކޮޅެއް ދަށްކޮށް ފެންނަނީ އެހެންވެ ކަންނޭނގެ،" އާތީ ބުންޏެވެ.
އުމުރުން 35 އަހަރުގެ ދަގަނޑޭ ވެލެންސިއާ އަށް ބަދަލުވީ މި ފަހަރުގެ ސީޒަން ފެށެން ކުޑަ ދުވަސްކޮޅަކަށް ވެފައި އޮއްވަ އެވެ. އޭނާ ވަނީ މި ސީޒަނުގައި މިހާތަނަށް ވެލެންސިއާ އަށް ފަސް ގޯލު ޖަހައިދީފަ އެވެ. އަދި އެހެން ކުޅުންތެރިންނަށް ގޯލު ޖަހަން ފުރުސަތު ތަނަވަސްކޮށްދިނެވެ.
ވެލެންސިއާ މި ވަގުތު ލީގުގެ ދެ ވަނައިގައި އޮތީ 11 މެޗުން 21 ޕޮއިންޓާ އެކު އެވެ. ލީގުގައި އެންމެ އަވަހަށް ދެން ވެލެންސިއާ ކުޅޭ މެޗުގައި އަންނަ އާދިއްތަ ދުވަހުގެރޭ 10 ޖަހާއިރު ބައްދަލުކުރާނީ ދަ ގްރާންޑޭ ސްޕޯޓްސް ކްލަބާ އެވެ.
