ހޮނިހިރުދުވަހު ބޭއްވި ކައުންސިލް އިންތިހާބުގައި ޕީޕީއެމަށް ލިބުނު ގޮނޑިތައް ގެއްލުވާލަފާނެ ކަމުގެ ބިރު އެބައޮތް ކަމަށާއި އެކަމަކު 24 ގަޑިއިރު އިލެކްޝަންސް ކޮމިޝަންގައި ޑިއުޓީކޮށްގެން ނަމަވެސް އެންމެ ވޯޓެއް ވެސް އޮޅުވާލަން ފުރުސަތު ނުދޭނެ ކަމުގެ ޔަގީންކަން ސަޕޯޓަރުންނަށް، އިދިކޮޅު ކޯލިޝަނުން މިއަދު ދީފި އެވެ.
މަސްލަހަތު ހިމެނޭ ފަރާތްތަކަށް ދައުވަތު ދީގެން މިއަދު މެންދުރު ފަހު ވޯޓު ފޮށިތަކެއް ގުނަން އުޅުމުން އިލެކްޝަންސް ކޮމިޝަނުގެ މައި މަރުކަޒަށް ޕީޕީއެމްގެ އިސް ބޭފުޅުންތަކެއް ވަޑައިގަތެެވެ. އެހެންވެ، އެތަނަށް އެމްޑީޕީގެ ރައީސް މުހައްމަދު ނަޝީދާއި ޕާޓީގެ އިސް ބައެއް ބޭފުޅުން ވަޑައިގަތުމުން ހަމަނުޖެހުންތަކެއް ހިނގި އެވެ. ފުލުހުން އެކަން ކޮންޓްރޯލްކުރީ ޕެޕަ ސްޕްރޭ ޖަހައިގެންނެވެ.
ޕީޕީއެމުން ބޭއްވި ނޫސްވެރިންގެ ބައްދަލުވުމުގައި، ޕީޕީއެމް/ޕީއެންސީ ކޯލިޝަން ހިންގެވުމާ ހަވާލުވެ ހުންނެވި ލީޑަރު އަބްދުއްރަހީމް (އަދުރޭ) ވިދާޅުވީ ވޯޓު ގުނާ ތަނަށް ވަޑައިގަތީ ކޯލިޝަންގެ އިސް ބޭފުޅުން ވަޑައިގަތީ ވޯޓު އޮޅުވާލަފާނެތީ ކަމަށެވެ. ކުރީގެ ރައީސް އަބްދުﷲ ޔާމީނަށް ނާކާމިޔާބުވެވަޑައިގަތް 2018ގެ ރިޔާސީ އިންތިހާބާއި 2019 ގެ ރައްޔިތުންގެ މަޖިލީހުގައި ވެސް ވޯޓު އޮޅުވާލި ކަމުގެ ތުހުމަތު އޭނާ މިއަދު ވެސް ތަކުރާރު ކުރެއްވި އެވެ.
އޭނާ ވިދާޅުވި ގޮތުގައި އެކަން ތަކުރާރުވިޔަ ނުދޭން މި އިންތިހާބުގެ ހުރިހާ ކަމެއް ގާތުން ބައްލަވާނެ އެވެ.
އެންމެ ވޯޓެއްގެ މައްސަލަ ވެސް ދުލެއް ނުކުރާނަން. ކޯޓަށް ދާން ޖެހިއްޖިއްޔާ އެކަން ކުރާނަން. މުޒާހަރާކުރަން ވެއްޖިއްޔާ ވެސް ކުރާނަން. 24 ގަޑިއިރު ގޮނޑި އަޅައިގެން އެތަނުގައި ތިބެން ވެއްޖިއްޔާ އެކަން ވެސް އަޅުގަނޑުމެން ކުރާނަން. -- އަދުރޭ
އިލެކްޝަނާ ބެހޭ މައި މަރުކަޒަށް ވަޑައިގަތީ، އޭނާ ވިދާޅުވި ގޮތުގައި، ކައުންސިލް އިންތިހާބުގެ ވޯޓާ ކުޅުނަ ނުދޭށެވެ. އެމްޑީޕީއަށް މި އިންތިހާބުގައި މާލެ އިން ބޮޑު ނާކާމިޔާބީއެއް ލިބިފައިވާކަން ފާހަގަކުރައްވައި އަބްދުއްރަހީމް ވިދާޅުވީ އެކަން ގަބޫލުނުކުރެވިގެން މާލޭގެ އިތުރު ގޮނޑިތަކެއް އެމްޑީޕީއަށް ލިބުނު ކަމަށް ވޯޓު އޮޅުވާލަން މަސައްކަތްތަކެއް ކުރަމުންދާ ކަމަށެވެ.
އޭނާ ވިދާޅުވި ގޮތުގައި މާލެއަށް ޕީޕީއެމުން 14 ގޮނޑިއަށް ވާދަކޮށް ބޮޑު ކާމިޔާބީއެއް ހޯދާފައިވާ އިރު މިހާތަނަށް ވެސް ދެ ގޮނޑި ގެއްލިއްޖެ ކަމަށް މައުލޫމާތު އެބަ ލިބެ އެވެ.
"ވޯޓު ގުނަން އަޅުގަނޑުމެން ބޭނުންވީ އަޅުގަނޑުމެންގެ ކުރިމަތީގައި. ވަރަށް ހަމަޖެހިގެން އަޅުގަނޑުމެން އެތަނުގައި ތިއްބައި މަސްލަހަތު ނަގާލަން އެތަނަށް ވަޑައިގަތީ އެމްޑީޕީގެ ރައީސް،" އަބްދުއްރަހީމް ވިދާޅުވި އެވެ.
އޭނާ ވިދާޅުވީ ކުރީގެ ރައީސް މުހައްމަދު ނަޝީދު އެތަނަށް ވަޑައިގަތީ ރައްޔިތުންގެ މަޖިލީހުގެ ރައީސްގެ ހައިސިއްޔަތުން ކަމަށާއި އެއީ ގޯހެއް ކަމަށް ވިދާޅުވި އެވެ. ނަޝީދު މިއަދު ބޭނުންފުޅުވީ ބޮޑު ހަމަނުޖެހުމަކުން އަލުން އިންތިހާބަށް ހުޅުވާލުމުގެ ޖާގަ ހޯދުން ކަމުގެ ތުހުމަތު އަދުރޭ ކުރެއްވި އެވެ.
އަބްދުއްރަހީމް ވިދާޅުވި ގޮތުގައި ނަތީޖާއަށް ބަދަލެއް ގެންނަން އުޅޭ ނަމަ އެކަން ކުރިޔަނުދޭން ރައްޔިތުން ދާނެ އެވެ. ޕީޕީއެމުން ފާރަވެރިވާނެ ކަމަށާއި އެ ފުރުސަތު އެމްޑީޕީ އާއި އިލެކްޝަންސް ކޮމިޝަނަށް ނުދޭނެ ކަމަށް ވިދާޅުވި އެވެ.
އޭނާ ވިދާޅުވި ގޮތުގައި މި އިންތިހާބުގައި ޕީޕީއެމުން 60 ޕަސެންޓަށް ވުރެން ގިނަ ގޮނޑިތައް ވަނީ ކާމިޔާބުކޮށްފަ އެވެ. އެކަމަކު އެމްޑީޕީން ބުނަނީ މާލޭގެ މެޖޯރިޓީ ނުލިބުނަސް ގިނަ ގޮނޑިތައް ނެގީ އެ ޕާޓީން ކަމަށެވެ.
އިންތިހާބާ ބެހޭ މަރުކަޒުގައި ހިނގި ހަމަނުޖެހުމާ ގުޅޭ ގޮތުން އިލެކްޝަންސް ކޮމިޝަނުން ބުނެފައި ވަނީ ވޯޓު އޮޅުވާލަން އެއްވެސް ކަމެއް އެ ކޮމިޝަނުން ނުކުރާ ކަމަށެވެ. ފޮށިތަކެއް ގުނަން އުޅުނީ ކެންޑިޑޭޓުންނާއި މަންދޫބުންގެ ވެސް ހާޒިރުގައި ކަމަށް އެ ކޮމިޝަނުން ބުންޏެވެ.
