ސެވިލް (އޭޕްރީލް 13) - ޗެލްސީގެ ވިސްނުމަކީ އަބަދުވެސް ކާމިޔާބު ހޯދުން ކަމަށާއި އެ ޓީމު ބައްޓަންވެފައި އޮންނަން ޖެހޭނީ ވެސް ތަށި ހޯދާ ޓީމެއްގެ ގޮތުގައި ކަމަށް އެ ކްލަބްގެ ކޯޗު ތޯމަސް ޓުޗެލް ބުނެފި އެވެ.
ޗެމްޕިއަންސް ލީގުގެ ކުއާޓާ ފައިނަލް ފުރަތަމަ ލެގުން މިދިޔަ ހަފްތާގައި ޗެލްސީ ވަނީ 2-0 އިން ޕޯޓޯ ބަލިކޮށްފަ އެވެ. މިރޭ ކުޅޭ ދެ ވަަނަ ލެގު (ޗެލްސީގެ ހޯމް މެޗު) ވެސް ކުޅޭނީ ފުރަތަމަ ލެގު ކުޅުުނު ސްޕެއިންގެ ސެވިލްގަ އެވެ. ދެ ލެގު ވެސް ސްޕެއިނުގައި ކުޅެން ނިންމީ ކޮވިޑް-19ގެ ސަބަބުން ޕޯޗުގީސް ސަރުކާރުން އަޅާފައިވާ ފިޔަވަޅުތަކުގެ ސަބަބުން އިންގްލެންޑަށް ގޮސްގެން ޕޯޓޯ އަށް މެޗު ކުޅެވޭނެ ގޮތެއް ނުވުމުންނެވެ. މިރޭ ކުއާޓާ ފައިނަލު ކުޅުމަށް ފަހު އަންނަ އާދިއްތަ ދުވަހުގެރޭ އެފްއޭ ކަޕް ސެމީ ފައިނަލުގައި ޗެލްސީން މެންޗެސްޓާ ސިޓީއާ ދެކޮޅަށް ނުކުންނާނެ އެވެ.
ޓުޗެލް ބުނީ ކުރިއަށް އޮތް ފަސް ވަރަކަށް ދުވަހަކީ ޗެލްސީގެ ސީޒަނުގެ މުހިއްމު ކަންތައްތަކެއް ފެންނާނެ ދުވަސްތަކެއް ކަމަށާއި މި ޗެލެންޖްތަކަށް ނުކުންނައިރު ވިސްނަންވީ ކަމަކީ ޗެލްސީ އަކީ ތަށި ހޯދަން ޖެހޭ ޓީމެއްގެ ގޮތުގައި ކަމަށެވެ.
"އަހަރެން މި ތަނަށް (ޗެލްސީ އަށް) މި އައީ ތަށި ހޯދަން. އަހަރެން މި އައީ މި ތަނަށް މެޗުތަކުން މޮޅުވަން. އޭގެ ނަތީޖާ އަކީ ތަށި ހޯދުން. ޗެލްސީން ތަށި ހޯދަން ޖެހޭ. މި ކްލަބް އޮތީ އެހެން ބައްޓަންވެފައި. އެހެންވީމަ އަހަރެން ވަކި އެހެން ވާހަކައެއް ދައްކަން ޖެހޭ ސަބަބެއް ނެތް. ފަސް އަހަރުން ތަށި ހޯދަން ނޫނީ ތިން އަހަރު ތަށި ހޯދަން. އެއީ އަހަރެން ދައްކާހިތްވާ ވާހަކަތަކެއް ނޫން،" މިދިޔަ ޑިސެމްބަރު މަހު ޕީއެސްޖީގެ ކޯޗުކަމުން ވަކިކުރިތާ މަހެއްހާ ދުވަސް ފަހުން ޗެލްސީއާ ހަވާލުވި ޓުޗެލް ބުންޏެވެ.
ކުރިން ބޮރޫޝިއާ ޑޯޓްމަންޑަށް ކޯޗުކޮށްދިން ޓުޗެލް ހަވާލުވި ފަހުން ޗެލްސީ ކުޅުނު 17 މެޗުގެ ތެރެއިން އެ ޓީމު ބަލިވެފައިވަނީ އެންމެ މެޗަކުންނެވެ. އެއީ އިނގިރޭސި ޕްރިިމިއާ ލީގުގައި ވެސްޓް ބްރޮމް އަތުންނެވެ. މި ފަހަރުގެ ޗެމްޕިއަންސް ލީގުގައި އަދި ޗެލްސީ ބަލިނުވެ އެވެ.
ޕޯޓޯގެ ކޯޗު ސާޖިއޯ ކޮންސެސާއޯ ބުނީ ކުރިމަތީގައި އޮތް އުނދަގޫ ޗެލެންޖް ބަލައިގަނެ ޕޯޓޯ ކުޅުންތެރިން ތިބީ މި މެޗުން ނަތީޖާ އަނބުރާލަން ކުރެވޭނެ ހުރިހާކަމެއް ކުރުމަށް އަމާޒުހިފައިގެން ކަމަށެވެ. އޭނާ އަށް އޮތް އެންމެ ބޮޑު ހިތްހަމަ ޖެހުމަކީ ޓީމުގެ މުހިއްމު ދެ ކުޅުންތެރިން ކަމަށްވާ ސާޖިއާ އޮލިވޭރާ އާއި އީރާންގެ ފޯވާޑް މަހުދީ ތަރޭމީ އަށް މި މެޗުގައި ކުޅެވުމެވެ.
ޗެމްޕިއަންސް ލީގުގެ ނޮކައުޓު ބުރުގައި ފުރަތަމަ ލެގުން ޗެލްސީ މޮޅުވެފައިވަނިކޮށް މިހާތަނަށް އެ ޓީމު ކަޓާފައިވަނީ ދެ ފަހަރު އެވެ. އެއީ 2000 ވަަނަ އަހަރު ބާސެލޯނާ އަތުންނާއި 2007 ވަނަ އަހަރު ލިވަޕޫލް އަތުންނެވެ.
ޗެލްސީ އާއި ޕޯޓޯ ކުޅޭ މެޗު ފަށާނީ ރާއްޖެ ގަޑިން މިރޭ 12 ޖަހާއިރު އެވެ.
