ކޮވިޑް-19ގެ ބަލިމަޑުކަމުގައި ދިރިއުޅުމުގެ ހުރިހާ ކަންކަމަކަށް ބުރޫއެރިއިރު ވެސް ދިވެހިންގެ ހިތްތަކުގެ ގުޅުން ބަދަހިވެ އެކަކު އަނެކަކަށް އެހީވެ އެއްބާރުލުމާ އެކު ދެއްކި ރިވެތި އުސޫލު މި ރޯދަމަހު ވެސް ހިފަހައްޓަން ރައީސް އިބްރާހިމް މުހައްމަދު ސޯލިހް މިރޭ އިލްތިމާސްކުރައްވައިފި އެވެ.
ރައްޔިތުންނަށް ރޯދަ ތަހުނިޔާ ފޮނުއްވި ހިތޯބުގައި ރައީސް ވިދާޅުވީ ކޮވިޑާ ހެދި އިގްތިސާދީ ލޮޅުން އަރައި ފަރުދުންގެ ފުދުންތެރިކަން ދަށްވި ނަމަވެސް ދިވެހިންގެ އީމާންތެރިކަމާއި އިސްލާމީ އެއްބަނޑު އެއްބަފާކަމުގެ ވަރުގަދަ ގުޅުން ކުރިއަށް ނެރުން ކަމަށެވެ. މިއާއެކު ދިވެހިންގެ ހިތްތަކުގެ ގުޅުން އިތުރަށް ވަރުގަދަވެ، އެކަކު އަނެކަކަށް އެހީތެރިވުމާއި އެއްބާރުލުމުގެ ރޫހް އިތުރަށް އާލާވިކަން ވެސް އެމަނިކުފާނު ފާހަގަކުރެއްވި އެވެ.
ރައީސް ވިދާޅުވީ ކޮވިޑުގެ ހާލަތާ ހެދި ދުނިޔޭގެ ގައުމުތަކުން ވެސް އަންނަނީ އެއް ބަޔަކު އަނެއް ބަޔަކަށް އެހީވުމުގެ ނަމޫނާ ދައްކަމުން ކަމަށެވެ. މިފަދަ ދުވަސްވަރަކާއި މި އަހަރުގެ ރަމަޟާން މަސް އިއްތިފާގުވެގެން އައުމަކީ ރާއްޖެ ފަދަ އިސްލާމީ މުޖްތަމައަކަށް ގިނަ ކަންކަން ހަނދާންކޮށްދީ، އެތައް އިބުރަތެއް ލިބޭނެ ކަމެއް ކަމަށް ރައީސް ވިދާޅުވި އެވެ.
އެމަނިކުފާނު ވިދާޅުވި ގޮތުގައި ރޯދަ މަސް އުގަންނައިދޭ އެންމެ މަތިވެރި ފިލާވަޅަކީ ވެސް ދަތިކަމާއި ނިކަމެތި ކަމުގައި ދިރިއުޅޭ އެހެން އިންސާނުންގެ ހާލަތު އިހްސާސްކޮށް އަނެކުންނަށް އެހީތެރިވެ އޯގާތެރިވުމެވެ.
މި ރޯދަ މަހުގެ ފައިދާ ހެޔޮގޮތުގައި ލިބިގަތުމަށް އެދިވަޑައިގަތެވެ. ރޯދައިގެ އަޅުކަން ފުރިހަމަކޮށް، ގިނަގިނައިން ގުރުއާން ކިޔަވައި ރޭ އަޅުކަންކޮށް ސަދަގާތްދީ މީސްތަކުންނަށް ހެޔޮ ފޯރުވައި އުޅުމަށް ހާއްސަ ސަމާލުކަމެއް ދެއްވުމަށް ވެސް ރައީސް އިލްތިމާސްކުރެއްވި އެވެ.
