މިދިޔަ އަހަރު އާސަންދައިން ކުރި ހޭދަ އޭގެ ކުރީ އަހަރާ އަޅާބަލާއިރު 200 މިލިއަން ރުފިޔާ ދަށް ވެފައިވާ ކަމަށް އާސަންދައިގެ ތަފާސް ހިސާބުތަކުން ދައްކައިފި އެވެ.
އާސަންދައިން "އަދަދު" އާ ހިއްސާކުރި ތަފާސް ހިސާބުތަކަށް ބަލާއިރު 2019 ވަނަ އަހަރު އާސަންދައިން 2.4 ބިލިއަން ރުފިޔާ ހަރަދު ކުރިއިރު މިދިޔަ އަހަރު ހަރަދު ކޮށްފައި ވަނީ 2.2 ބިލިއަން ރުފިޔާ އެވެ. އެހެންކަމުން އެއީ 200 މިލިއަން ރުފިޔާގެ ދަށްވުމެކެވެ.
އެއް ދިމާލަކަށް އެންމެ ބޮޑު ހޭދައެއް އާސަންދައިން މިދިޔަ އަހަރު ވެސް ކޮށްފައިވަނީ ބޭހަށެވެ. އެގޮތުން މިދިޔަ އަހަރު ބޭހަށް އެކަނި 700 މިލިއަން ރުފިޔާ ވަނީ ހަރަދުކޮށްފަ އެވެ. އެއީ މުޅި ބަޖެޓްގެ 37 ޕަސެންޓެވެ.
އެމަޖެންސީގައި އަތޮޅު ތެރޭގައި ބަލި މީހުން އެއްތަނުން އަނެއް ތަނަށް ވައިގެ މަގުން ގެންދަން މިދިޔަ އަހަރު 37 މިލިއަން ރުފިޔާ ހަރަދުކޮށްފައިވެ އެވެ. ކަނޑުގެ މަގުން ގެންދިއުމަށް 17 މިލިއަން ރުފިޔާ ހަރަދުކޮށްފައިވެ އެވެ. އަދި ރާއްޖޭން ބޭރަށް މީހުން ބޭސްފަރުވާއަށް ދިއުމަށް ޓިކެޓަށް 15 މިލިއަން ރުފިޔާ ވަނީ ހަރަދުކޮށްފަ އެވެ.
ރާއްޖޭން ބޭރުގެ ހޮސްޕިޓަލްތަކަށް އާސަންދައިން މިދިޔަ އަހަރު 124 މިލިއަން ރުފިޔާ ވަނީ ހަރަދުކޮށްފަ އެވެ. ރާއްޖޭގެ ހޮސްޕިޓަލްތައް ހިމެނޭ ގޮތަށް ޖުމުލަ ހޮސްޕިޓަލްތަކަށް އެއް ބިލިއަން ރުފިޔާ މިދިޔަ އަހަރު ވަނީ ހަރަދު ކޮށްފަ އެވެ.
އާސަންދައިގެ މެނޭޖިން ޑިރެކްޓަރު މަރިޔަމް ޝަފީގް "އަދަދު" އަށް މިދިޔަ އަހަރު އާސަންދައިން ހަރަދު ކުރި 2.2 ބިލިއަން ރުފިޔާގެ ތެރެއިން ދެބައިކުޅަ އެއްބައި ހަރަދު ކޮށްފައިވަނީ ސަރުކާރުން ހިންގާ ހޮސްޕިޓަލްތަކަށް ކަމަށެވެ.
އަނެއްބައި ހަރަދުކޮށްފައިވަނީ ބޭހަށާއި އަމިއްލަ ހޮސްޕިޓަލް އަދި ކްލިނިކްތަކުގެ އިތުރުން އެހެނިހެން ހަރަދު ތަކަށް ކަމަށް އޭނާ ވިދާޅުވި އެވެ.
އާސަންދައިގެ އިސްރާފު ކުޑަ ކުރުމަށް ވެސް މަސައްކަތްތަކެއް ކުރަމުން އަންނަ ކަމަށް މަރިޔަމް ވިދާޅުވި އެވެ. އޭގެން އެންމެ އިސްކަމެއް ދޭ އެއް ކަމަކަށް ރާއްޖޭގައި ވިއްކާ ބައެއް ބޭސްތައް ހަމަ އަގުގައި އާސަންދައިން ގަތުން ހިމެނޭ ކަމަށް އޭނާ ވިދާޅުވި އެވެ.
ބޭސް ހަމަ އަގަށް ގެންނަން ކުރާ މަސައްކަތުގެ ތެރެއިން "ޒޮވަންޓާ" ކިޔާ ބޭހެއްގެ އަގު މިހާރު ވެސް އާސަންދައިން ވަނީ ކުޑަކޮށްފަ އެވެ. އެއާއެކު އާސަންދައިގެ ހަރަދުތަކުން އަހަރަކު 12 މިލިއަން ރުފިޔާ ކުޑަވާނެ ކަމަށް އެ ކުންފުނިން ބުންޏެވެ.
ބޭސް ވިއްކުމާ ބެހޭ ގަވާއިދުގައިވާ ގޮތުން ބޭސް އެތެރެ ކުރާ މީހުންނަށް ހޯލްސޭލް ކުރެވޭނީ ބޭސް ގަންނަ އަގުގެ 25 ޕަސެންޓަށް ވުރެ މަތި ނުގާ އަގެއްގަ އެވެ. ރާއްޖޭގައި ބޭސް ރީޓެއިލް ކުރާ ފިހާރަތަކުން ބޭހެއްގެ އަގު އެންމެ ބޮޑު ކުރެވޭނީ ގަންނަ އަގުގެ 50 ޕަސެންޓާ ހަމައަށެވެ. ނަމަވެސް އެއަށް ވުރެން މާ ބޮޑު އަގުގައި ބޭސް ވިއްކާ ކަމުގެ ޝަކުވާ ބޮޑެވެ.
މަރިޔަމް ވިދާޅުވީ ކުރިއަށް އޮތް ދުވަސްތަކުގައި ކުޑަ ކުރާނެ 17 ބޭހުގެ އަގު ކަނޑައަޅަނީ މޯލްޑިވްސް ކަސްޓަމްސް ސާވިސްގެ ތަފާސް ހިސާބުތަކުން ބޭހުގެ ވިޔަފާރީގެ ތަފްސީލް ބެލުމަށްފަހު އެންމެ ބޮޑުކޮށް ވިއްކޭނެ އަގު ހޯދުމަށްފަހު ކަމަށެވެ.
އޭނާ އިތުތަށް ވިދާޅުވީ ހަމައަގަށް އާސަންދަ ދިނުމަށް މިހާރު މަސައްކަތް ކުރާ 17 ބޭހުގެ އަގު ކަނޑައެޅުމާ އެކު ވެސް އާސަންދައިގެ ހަރަދު ބޮޑުތަނުން ކުޑަ ކުރެވޭނެ ކަމަށެވެ. އެ 17 ބޭހަކީ އާއްމުކޮށް ވިކޭ ބޭސްތަކެއް ކަމަށް ވެސް އޭނާ ވިދާޅުވި އެވެ.
