ރައީސް މިއަދު ވެވަޑައިގެންނެވީ އިއުތިރާފެކެވެ. ރައްޔިތުން ފުންކޮށް ވިސްނަންޖެހޭ ބޮޑު އިއުތިރާފެކެވެ؛
ހޮނިހިރު ދުވަހު ރައްޔިތުންގެ ވޯޓަކުން ނުކުމެ ނިންމި ނިންމުމަކުން، ސިޔާސީ މަސްރަހަށް އެރި ހިރަސްފުގަނޑު އޮބި، މުޅި މަންޒަރު އަދި ރަނގަޅަށް ސާފެއް ވެސް ނުވެ އެވެ. އެކަމަކު އެ އިންތިހާބަށް އެންމެ ބޮޑަށް ފަރިވި، ވެރިކަން ކުރާ މައި ޕާޓީގެ އެތެރޭގެ ރެނދު ވަނީ އިތުރަށް ފޭވެފަ އެވެ.
އިންތިހާބުން މޮޅުވެ، ނާކާމިޔާބުވީމަ އެވެ. އަޑަށް ބާރުލާފަ ޖެހި ހިސާބުތައް ދިމައެއް ނުވި އެވެ. އަބަދުވެސް ފޯރީގައި އިންތިހާބުތަކަށް ނުކުންނަ ސަޕޯޓަރުން، މި ވޯޓާ ޖެހުމުން، ގޭތެރޭގަ ތިބީ އެވެ. އެއާއެކު ޒަމާނުއްސުރެ އެމްޑީޕީގެ ތާއީދު ބޮޑު މާލޭގެ އިތުރުން، ބައެއް ބޮޑެތި ރަށްތަކުގެ ކޮންޓްރޯލް ގެއްލުނީ އެވެ.
ހުރިހާ ބާރުތަކެއް އޮވެމެ، ބޭނުންވި ނަންބަރާ ގާތަށްވެސް ނަތީޖާ ނުނެރުވުމުގެ ޒިންމާ އަޅުވަން ހުރިހާ ދިމާއަކުން ފެންނަނީ އެކަކު އަނެކަކަށް އިނގިލި ދިއްކުރާ ތަނެވެ. އެކަން އިއްޔެ އެންމެ ފުރިހަމައަށް ސިފަކޮށްދެއްވީ އެމްޑީޕީގެ ރައީސް އަދި ކުރީގެ ރައީސް މުހައްމަދު ނަޝީދެވެ.
އެމްޑީޕީގެ ލީޑަޝިޕް ތިޔަ ވިދާޅުވަނީ އަޅުގަނޑަށްތޯ ރައީސުލްޖުމްހޫރިއްޔާއަށްތޯ ނައިބު ރައީސަށްތޯ، ޗެއާޕާސަންއަށްތޯ، އަޅުގަނޑުމެން އެންމެން ވެސް މިކަމާ ޒިންމާވާންޖެހޭނެ - ރައީސް ނަޝީދު
އިއްޔެ ބޭއްވި ނޫސްވެރިންގެ ބައްދަލުވުމުގައި ރައީސް ނަޝީދު ގިނަ ވާހަކަތަކެއް ދެއްކެވި އެވެ. ފުރަތަމަ ފަހަރަށް، އެމަނިކުފާނު ގާތް އެކުވެރިޔާ، ރައީސް އިބްރާހިމް މުހައްމަދު ސޯލިހާ ދެމެދު މައްސަލަ އޮތް ކަން އެއްބަސްވެވަޑައިގެންނެވި އެވެ.
ލަފާކުރެވުނު ގޮތަށް، ރައީސް އޮފީހުން މިއަދު ވަނީ ކުއްލި ނޫސްވެރިންގެ ބައްދަލުވުމެއް ބާއްވައިފަ އެވެ. ރައީސް ނަޝީދެކޭ އެއް ފަދައިން ރައީސް ސޯލިހު ވެސް ވާހަކަ ފެއްޓެވީ މުޅި އިންތިހާބާއެކު އެންމެ ގިނަ ވޯޓުވެސް އެމްޑީޕީއަށް ލިބުނުކަން ފާހަގަކުރައްވަމުންނެވެ.
އެކަމަކު މާލޭ ސިޓީގެ ނަތީޖާއާމެދު ރައީސް ވެސް ހިތްހަމަޖެހިވަޑައިނުގަންނަވާ ކަމަށް ވިދާޅުވި އެވެ. އެކަމަކު ވެރިކަމުގެ ދައުރު ދެ ބައި ވި ފަހުން ރައީސް ވެވަޑައިގެންނެވީ މާޔޫސްވާންޖެހޭ ފަދަ އިއުތިރާފެކެވެ. މާލޭގެ ގިނަ ގޮނޑިތައް ނުލިބުނީ ސަރުކާރާމެދު މާލޭ ރައްޔިތުންގެ ކަންބޮޑުވުންތައް ހުރުމުން ކަން މި ނަތީޖާގެ ކުރިން އެނގިވަޑައިނުގެންނެވީމަ އެވެ.
ފާހަގަވާ ބައެއް ކަންތައްތަކުގެ ތެރޭގައި މާލޭގެ ބޯހިޔާވަހިކަމުގެ މައްސަލަ. އެއީ ހައްލު ހޯދަންޖެހޭ ކަމެއްގެ ގޮތުގައި އެބަ ފާހަގަވޭ.
ބޯހިޔާވަހިކަމުގެ މައްސަލައަކީ ވޯޓާ ހަމައަށް ނުގޮސްވެސް ހާމައަށް ފެންނާން އޮތް ރައްޔިތުންގެ ޝަކުވާއެކެވެ. ދެން ރައީސް ފާހަގަކުރެއްވި އަނެއްކަމަކީ ސަރުކާރު ތެރޭގައި ނުހުއްޓުވުނު ކޮރަޕްޝަނެވެ. ހާއްސަކޮށް އެމްއެމްޕީއާރުސީގެ ބޮޑު ހިޔާނާތާއި ބޮޑެތި މަރުތަކުގެ ތަހުގީގު ލަސްވުމަކީ ރައްޔިތުންގެ ކަންބޮޑުވުމެއްކަން ނޭނގޭ މީހަކު ނެތެވެ.
އެއާ ވިދިގެން ރައީސް ދެން ވިދާޅުވީ އެމްޑީޕީގެ ސަޕޯޓަރުންނަކީ އަބަދުވެސް ކަންތައްތަކެއް ބަދަލުކުރަން ބޭނުންވާ ބައެއް ކަމަށެވެ.
އެމްޑީޕީގެ ވޯޓާ ބޭސްއަކީ ކަންތައްތަކެއް ބަދަލުކުރަން ބޭނުންވާ ބައެއް. ވައްކަމާ އިދިކޮޅު. ހިޔާލުފާޅު ކުރުމާއި މިނިވަންކަމާ އެއްކޮޅު. މިހެންގޮސް ވެލިއުތަކެއް އެބަހުރި އެމްޑީޕީގެ ތެރޭގަ - ރައީސް ސޯލިހު
އެމްޑީޕީ ސަޕޯޓަރުން ވޯޓުލާން ނުނިކުތީ، އެކަންކަން ރަނގަޅު ކުރަން ދިން މެސެޖެއްގެ ގޮތުގައި ރައީސް މިއަދު ސިފަކުރެއްވި އެވެ.
މަސްވެރި ރަށްތަކުން އެމްޑީޕީއަށް އޮތް ތާއީދު ގެއްލުނީ މަަސް ގަންނަ އަގު ހެޔޮކުރަން ސަރުކާރުން ގެނައި ބަދަލު މަސްވެރިން ބަލައިގެންފައި ނުވާތީ ކަން ވެސް ރައީސް ފާހަގަކުރެއްވި އެވެ.
އެ ހުރިހާ ކަމެއްގެ ތެރެއިން އުފެދޭ ސުވާލަކީ ރައްޔިތުންގެ މިހާ ގިނަ ކަންބޮޑުވުންތަކެއް ރައީސްގެ ސަމާލުކަމަށް އައީ ވޯޓުގެ ނަތީޖާއިން ހެއްޔެވެ؟ އެ ސުވާލުގެ ޖަވާބު ކޮންމެ ގޮތަކަށް ދިން ނަމަވެސް، ރަނގަޅެއް ނެތެވެ.
ވޯޓުގެ ކުރިންނަމަ، މިއިން އެއްވެސް ކަމެއް ހައްލު ނުކުރެއްވީ ކީއްވެގެންތޯ ކުރެވޭ ސުވާލެވެ.
މި މައްސަލަތައް ފާހަގަވީ ވޯޓުގެ ފަހުންނަމަ، ގާތްގަނޑަކަށް ދެ އަހަރާ ބައި ވަންދެން ސަރުކާރުން ކުރި ކަމަކާމެދު ސުވާލު އުފެދޭނެ އެވެ.
ހަގީގަތަކީ މީގެ ތެރެއިން ގިނަ ކަންކަމަކީ ރައީސް ސޯލިހުގެ ރިޔާސީ ވައުދުފުޅު ތަކެވެ. އެކަންކަން ނުވެގެން، އެމްޑީޕީގެ ސަޕޯޓަރުންވެސް ހިމެނޭގޮތަށް ރައްޔިތުން ޝަކުވާ ކުރާތާ އެތައް ދުވަހެއް ވެއްޖެ އެވެ.
މި ފަހަރު ލިބުނު ނާކާމިޔާބީގައި އޮންނާނެ ސަރުކާރުން ބަދަލުކުރަން ޖެހޭ ކަންކަން ވެސް - ރައީސް ސޯލިހު
ދައުރު މެދު ތެރެއިން އައި އިންތިހާބަކުން ރިޔާސީ ވައުދުތައް ނުފުއްދޭކަން ރައްޔިތުން ހަނދާކޮށްދިނީ އެވެ.
އެ ވައުދުތައް ނުފުއްދައި، ތާއީދު ފަނޑުވި ސަބަބު ދެނެގަންނަން އަނެއްކާވެސް ދިރާސާ އެއް ކުރަން ވަގުތު ބޭކާރުކޮށްލުމުގެ ބޭނުމެއް ނެތެވެ. ރައީސްގެ އަމިއްލަ އިއުތިރާފުން ވެސް ސަރުކާރާއި ރައްޔިތުންގެ މަޖިލިސް ވެސް އެމްޑީޕީއަށް ދިނުމަށްފަހު، ކައުންސިލުތައް ވެސް ދޭން ރައްޔިތުން ފަސްޖެހުނީ ގޯސްތަކެއް ހެދުނީމަ އެވެ.
ހެދުނު ގޯސްތަކަކީ ކޮބައިކަން އިތުރަށް ބަލާކަށް ނުޖެހެ އެވެ. ނޫނީ އެއީ މާ ފުންކޮށް ވިސްނަންޖެހޭ ކަމެއް ނޫނެވެ. ރައީސަށާއި އެމްޑީޕީއަށް ވަގުތު ނެތީމަ އެވެ. ރިޔާސީ މުހިއްމު ވައުދުތަކެއް ނުފުއްދިގެން ރައްޔިތުން އަދިވެސް މާޔޫސްވެފައި ތިއްބައި، އަނެއްކާ އަނެއް އިންތިހާބުވެސް އަރާ ހަމަކޮށްފާނެތީ އެވެ.
