ގޭސްފުޅި ލީކުވެ، ކުއްލި ގޮވުމާ އެކު ރ. އިނގުރައިދޫ ގުލްހަޒާރުގެ ފުނޑުފުނޑުވީ އެވެ. ވަރަށް ކުރިން އިމާރާތް ކޮށްފައިވާ އެ ގެ ދެން ބޭނުން ކުރެވޭކަށް ނެތެވެ. އެހެންކަމުން އާ ގެއެއް އަޅައިގެން ނޫނީ ބޯހިޔާވަހިކަން ލިބޭކަށް ނެތެވެ.
މިދިޔަ ބުރާސްފަތިދުވަހު އެ ހާދިސާ ހިނގިއިރު ގޭގައި ތިބީ ދެ މީހުންނެވެ. އެ ގޭގައި ދިރިއުޅުނު އައިޝަތު އަބޫބަކުރު، 71، އަށް ލިބުނު އަނިޔާއަށް ފަރުވާ ހޯދަން މިހާރު ތިބީ މާލޭގަ އެވެ. އޭނާގެ ހާލު މިހާރު އަންނަނީ ރަނގަޅުވަމުންނެވެ.
"އިންފެކްޓް ވިޔަ ނުދީ ކުރިއަށް ގެންދަން ޑޮކްޓަރު ބުނެފައި އޮތީ. އަތް ވަރަށް ބޮޑަށް ފިހިފައި ހުރީމައި ވަރަށް ނާޒުކު. މޫނުވެސް ވަރަށް ބޮޑަށް ފިހިފައި ހުރީ. ބުރުގާ އާއި އައިނު އަޅާފައި ހުރި ސަރަހައްދު ނޫނީ ވަރަށް ބޮޑަށް ފިހިފައި. އެކަމަކު މިހާރު އަންނަނީ ރަނގަޅުވަމުން،" އައިޝަތުގެ ދަރިފުޅު "އަދަދު" އަށް މިއަދު ބުންޏެވެ.
އެ އާއިލާ އިން މިއަދު ބުނީ އެ މީހުންނަށް މިހާރު އޮތް ހިތްދަތިކަމަކީ ދިރިއުޅެވޭނެ ގޮތެއް ނެތުން ކަމަށެވެ. ބިމާ ހަމަވި ގެ އަލުން އިމާރާތްކުރެވޭނެ ވަރުގެ ތަނަވަސްކަމެއް ނެތެވެ. އާ ގެއެއް އަޅަން ގާތްގަނޑަކަށް 500،000ރ. ހޭދަވެ އެވެ.
ދެ ކޮޓަރި އާއި ސިޓިން ރޫމެއްގެ އިތުރުން ގުދަނެއް ހަދާފައި ހުރި ގެ ތަޅާލުމަށް ފަހު އިތުރު ގެއެއް އަޅައިގެން ނޫނީ އުޅެވޭކަށް ނެތް ކަމަށް އާއިލާއިން ވާހަކަ ދެއްކި މީހާ ބުންޏެވެ.
"ކުރީގެ ގެއަކަސް ހަމަ ދޭތެރެ ދޭތެރެއިން ރިނޮވޭޓް ކުރަމުންއައީ. އެކަމަކު ހާދިސާއަށް ފަހު މުޅި ގެވަނީ ރެނދުލައިފައި. މުޅި ގެއަށް ފެން ފައިބާ ހިފާގެންގުޅޭ ހުރިހާ އެއްޗެއް ހަލާކުވެފައި. ރޯދައަށް ގެންގޮސް ހުރި ހުރިހާ އެއްޗެއް ވެސް ހަލާކުވީ،" ބުރާސްފަތި ދުވަހުގެ ހާދިސާއާ ގުޅޭގޮތުން އޭނާ ބުންޏެވެ.
"އެހީ ލިބިގެން ނޫން ގޮތަކަށް އެކަން ކުރެވޭކަށް ވެސް ނެތް."
ރަށު ކައުންސިލާއި ފުލުހުންގެ އިތުރުން އެމްއެންޑީއެފުން އަންނަނީ އެ ގެއަށް ލިބުނު ގެއްލުން ވަޒަން ކުރުމުގެ މަސައްކަތް ކުރަމުންނެވެ. އެ ރިޕޯޓް ޑިޒާސްޓާ މެނޭޖްމަންޓް އޮތޯރިޓީއަށް ހުށަހަޅަން ވަނީ ނިންމައިފަ އެވެ. އެފަދަ ހާދިސާތަކުގެ ގެއްލުން ވަޒަންކޮށް ސަރުކާރުން މާލީ އެހީތެރިކަން ފޯރުކޮށްދެ އެވެ.
މި ހާދިސާއާ ގުޅިގެން ޑިޒާސްޓާ މެނޭޖްމަންޓް އޮތޯރިޓީގެ ބަހެއް އަދި ވަނީ ލިބޭގޮތް ނުވެފަ އެވެ.
އަލިފާނުގެ ހާދިސާގައި ފިހުނު އަންހެން މީހާ: އޭނާ ހަށިގަނޑުގެ 50 ޕަސެންޓް ވަނީ ފިހިފައި-- ފޮޓޯ: އާއިލާ
އެ ގޭގައި ހަތް ކުދިން ތިބޭއިރު ގެ ރަޖިސްޓްރީ ކޮށްފައިވަނީ އަނިޔާ ލިބުނު އަންހެން މީހާ އާއި ހަގު ހަތަރު ކުދިންގެ ނަމުގަ އެވެ. ދޮށީ ތިން ކުދިން އުޅެނީ އަމިއްލަ ގެ ހަދައިގެން ވަކިންނެވެ.
ގޭސް ފުޅި ގޮވި ހާދިސާގައި ގެ ހަލާކުވެފައި: އާ ގެއެއް އެޅުމަށް ފަސްލައްކައެއްހާ ރުފިޔާ ހަރަދުވޭ-- ފޮޓޯ: އާއިލާ
ދަރިފުޅު ބުނިގޮތުގައި ބާރުގަދަ ގޮވުމެއްގައި ހަށިގަނޑުގެ ބޮޑުބައެއް ފިހުމުން މަންމައަށް ނަފްސާނީ ގޮތުން ވެސް ވަނީ އަސަރުކޮށްފަ އެވެ. ނަމަވެސް ކުރިއަށް ވުރެން މިހާރު ރަނގަޅު ކަމަށާއި އާއްމުކޮށް ވާހަކަ ދައްކައި ވެސް އުޅޭ ކަމަށް އޭނާ ބުންޏެވެ.
އެ ގޭގައި ދިރިއުޅުނީ ފިހުނު އަންހެން މީހާ އާއި އޭނާގެ ޅީދަރި، އުމުރުން 24 އަހަރުގެ ޒުވާން އެހެން އަންހެން ކުއްޖެކެވެ. ހާދިސާ ހިނގިއިރު ކޮޓަރީގައި ހުރި އެ އަންހެން ކުއްޖާއަށް އެއްވެސް އަނިޔާއެއް ނުވެ އެވެ. ނަމަވެސް ހާދިސާއަށް ފަހު ލިބުނު ޝޮކުން އޭނާ ވާހަކަ ނުދައްކާ ހުރުމަށް ފަހު އިއްޔެއިން ފެށިގެން ވާހަކަ ދައްކަން ފަށާފައިވާ ކަމަށް ވެސް އާއިލާއިން ބުނެ އެވެ.
