މެޑްރިޑް (އޭޕްރީލް 12) - ސްޕެނިޝް ލީގުގައި ރޭ ރެއާލް ބެޓިސްއާ 1-1 އިން އެއްވަރުކޮށް ލިބުނު ޕޮއިންޓާ އެކު އެތުލެޓިކޯ މެޑްރިޑް އަލުން އެއް ވަނަ އަށް އެރިއިރު، ލީގު ހޯދުމުގެ ރޭސް ފޯރިގަދަވެއްޖެ އެވެ.
ރޭގެ މެޗުން މޮޅުވެގެން އެތުލެޓިކޯ އަށް ތިން ޕޮއިންޓުގެ ލީޑެއް ދެމެހެއްޓުމުގެ ފުރުސަތު އޮތް ނަމަވެސް އެއްވަރުވުމުން އެ ޓީމުގެ ލީޑު މި ވަނީ އެއް ޕޮއިންޓަށް ކުޑަވެފަ އެވެ. ބާކީ އަށް މެޗު އޮތްއިރު، ލީގުގެ ރޭހުގައި އޮތީ އެއް ވަނައިގައި އޮތް އެތުލެޓިކޯ އާއި ދެ ވަނައިގައި އޮތް ރެއާލް މެޑްރިޑް އަދި ތިން ވަނައިގައި އޮތް ބާސެލޯނާ އެވެ.
ރޭހުގައި އޮތް ކޮންމެ ޓީމެއް 30 މެޗު ކުޅެފައިވާއިރު، އެތުލެޓިކޯ އެއް ވަަނައިގައި އޮތީ 67 ޕޮއިންޓް ހޯދައިގެންނެވެ. ދެ ވަނައިގައި އެންމެ ފަހުގެ ޗެމްޕިއަން ރެއާލް އޮތީ 66 ޕޮއިންޓާ އެކު އެވެ. ތިން ވަނައިގައި އޮތް ބާސެލޯނާ އަށް ވަނީ 65 ޕޮއިންޓް ލިބިފަ އެވެ.
ބެޓިސް ދަނޑުގައި ރޭ ކުޅުނު މެޗަށް އެތުލެޓިކޯ އިން ނުކުތީ އަނިޔާގެ ސަބަބުން އެ ޓީމުގެ އެއް ވަނަ ފޯވާޑް ލުއިސް ސުއަރޭޒް ނުލަ އެވެ. ރޭގެ މެޗު ފަށައިގެން ފަސް މިނިޓް ތެރޭގައި އެތުލެޓިކޯ އަށް ލީޑުނަގައިދިނީ އެންހެލް ކޮރެއާ ދިން ބޯޅައަކުން ޔަނިކް ކަރާސްކޯ އެވެ. އެތުލެޓިކޯ އަށް ލީޑު ހިފަަހައްޓައިލެވުނީ 15 މިނިޓް އެވެ. މެޗުގެ 20 ވަނަ މިނިޓްގައި ބެޓިސް އިން ވަނީ އެއްވަރުކޮށްފަ އެވެ. މޮރޭނޯ ލޮޕެރާ ތަނަވަސްކޮށްދިން ފުރުސަތެއްގައި މި ގޯލު ޖެހީ ކްރިސްޓިއަން ޓެލޯ އެވެ.
ޖެނުއަރީ މަސް ނިމުނުއިރު ލީގުގެ އެއް ވަނައިގައި 10 ޕޮއިންޓުގެ ލީޑަކާ އެކު އޮތް އެތުލެޓިކޯ އަށް ފަހަކަށް އައިސް ވަނީ މެޗުތަކުގައި ނަތީޖާ ނެރުމުގައި ގިނަ މައްސަލަތަކެއް ދިމާވެފަ އެވެ. އެތުލެޓިކޯ ހުރިހާ މުބާރާތެއްގައި އެންމެ ފަހުން ކުޅުނު 11 މެޗުގެ ތެރެއިން މޮޅުވީ އެންމެ ތިން މެޗުންނެވެ.
