ވޯޓްގެ ނަތީޖާގެ ފަރަގު ކުޑަ ނުވަ ދާއިރާއެއްގެ ނަތީޖާ އިތުރަށް ކަށަވަރުކުރުމުގެ މަސައްކަތް ކުރަމުން އަންނަ ކަމަށާއި މާލެ ސިޓީ ކައުންސިލާއި އައްޑޫ ސިޓީ ކައުންސިލުން އިތުރު ގޮނޑިތަކެއް އެމްޑީޕީއަށް ލިބުމުގެ ފުރުސަތު އޮތް ކަމަށް އެ ޕާޓީން ބުނެފި އެވެ.
އެމްޑީޕީން ނެރުނު ބަޔާނެއްގައި ބުނެފައި ވަނީ މާލޭގެ ފަސް ދާއިރާއަކާއި އައްޑޫގެ ހަތަރު ދާއިރާއެއްގެ ނަތީޖާ އިތުރަށް ކަށަވަރުކުރުމަށް މަސައްކަތްކުރާ ކަމަށާއި އެ ދާއިރާތަކުގައި މިހާރު ކުރީގައި އުޅޭ ކެންޑިޑޭޓާއި އެމްޑީޕީގެ ކެންޑިޑޭޓުންނާ ދެމެދު ހުރީ 40 އަކަށް ވޯޓަށްވުރެ ކުޑަ ފަރަގެއް ކަމަށެވެ. އެ ދާއިރާތަކުގައި ނުގުނާ ހުރި ވޯޓް ކަރުދާހުގެ އަދަދު 50 އާއި 60 އަށް އަރާ ކަމަށް ބަޔާނުގައި ބުނެފައިވެ އެވެ.
"މިޕާޓީން މިގެންދަނީ އެ ވޯޓު ފޮށިތަކުގެ ފުރިހަމަ ނަތީޖާ ދެނެގަތުމުގެ މަސައްކަތް ކުރަމުންނެވެ. އަދި އިސްވެ ދެންނެވި ކަންކަން އެހެން ހުރުމުން މިޕާޓީއަށް މިހާތަނަށް ކަށަވަރުވެފައިވާ ގޮނޑިތަކުގެ އިތުރުން މާލެ އާއި އައްޑޫ ސިޓީގެ އިތުރު ގޮނޑި ލިބުމުގެ ފުރުސަތު އޮތްކަން ފާހަގަކޮށް މިވާހަކަ އާންމުކޮށް ދެންނެވީމެވެ،" ބަޔާނުގައި ބުނެފައިވެ އެވެ.
ހޮނިހިރު ދުވަހު ބޭއްވި އިންތިހާބުގައި އެމްޑީޕީއަށް މާލެ އާއި އައްޑޫ ސިޓީ ކައުންސިލްގެ ސުޕަރ މެޖޯރިޓީ ގެއްލިފައިވަނިކޮށް އާދީއްތަ ދުވަހު ބޭއްވި ނޫސްވެރިންގެ ބައްދަލުވުމުގައި، އެ ޕާޓީގެ ރައީސް މުހައްމަދު ނަޝީދު ވިދާޅުވީ މާލޭން ނާކާމިޔާބުވި ކަމަށް ގަބޫލު ކުރައްވާ ކަމަށާއި އެހެންވެ އެމަނިކުފާނު ވެސް ހިމެނިވަޑައިގަންނާ ގޮތަށް ޕާޓީގެ އިސްވެރިން ފެއިލްވެއްޖެކަމަށް ގަބޫލު ކުރައްވާ ކަމަށެވެ.
މާލޭގެ މޭޔަރު ކަމުގެ ގޮނޑިއާއެކު، އިދިކޮޅު ޕީޕީއެމްއިން ވަނީ ސިޓީ ކައުންސިލްގެ 18 ގޮނޑީގެ ތެރެއިން 12 ގޮނޑިއެއް ކާމިޔާބުކޮށްފަ އެވެ. މާލޭން އެމްޑީޕީ އަށް ކަށަވަރު ވެފައިވަނީ ފަ ގޮނޑި އެވެ. އައްޑޫ ސިޓީގެ 12 ގޮނޑީގެ ތެރެއިން އެމްޑީޕީ އަށް ކާމިޔާބު ވީ ހަ ގޮނޑިއެވެ.
