ނާކާމިޔާބުވީ އެމްޑީޕީގެ ވެރިން ފެއިލްވެގެންކަން ނަޝީދު ގަބޫލު ކުރައްވައިފި

މިއަދުގެ ނޫސްވެރިންގެ ބައްދަލުވުމުގައި ރައީސް މުހައްމަދު ނަޝީދު: ވިދާޅުވީ އިންތިހާބުން ބަލިވުމުގެ ޒިންމާ ނަންގަވާނެ ކަމަށް -- ފޮޓޯ: ހުސެއިން ވަހީދު/އަދަދު

މިއަދުގެ ނޫސްވެރިންގެ ބައްދަލުވުމުގައި ރައީސް މުހައްމަދު ނަޝީދު: ވިދާޅުވީ އިންތިހާބުން ބަލިވުމުގެ ޒިންމާ ނަންގަވާނެ ކަމަށް -- ފޮޓޯ: ހުސެއިން ވަހީދު/އަދަދު

އިއްޔެ ބޭއްވި ލޯކަލް ކައުންސިލްތަކުގެ އިންތިހާބުގައި ވެރި ރަށް މާލެއިން އެމްޑީޕީއަށް ނާކާމިޔާބުވުމުން އެމަނިކުފާނު ވެސް ހިމެނިވަޑައިގަންނާ ގޮތަށް ޕާޓީގެ އިސްވެރިން ފެއިލްވެއްޖެކަމަށް ގަބޫލު ކުރައްވާ ކަމަށް ކުރީގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.

މިހާތަނަށް ގުނި ވޯޓުތަކުން ގާތްގަނޑަކަށް 60 ޕަސެންޓަށް ވުރެ ގިނަ ވޯޓު ހޯދައިގެން މާލޭ މޭޔަރު ކަމުގެ ގޮނޑި ކާމިޔާބުކޮށްފައި ވަނީ ކުރީގެ ހައުސިން މިނިސްޓަރު ޑރ. މުހައްމަދު މުއިއްޒެވެ. އަދި މާލޭ ސިޓީ ކައުންސިލްގެ ވެސް 12 ގޮނޑި އިދިކޮޅު ޕީޕީއެމުން ވަނީ ކާމިޔާބު ކޮށްފަ އެވެ.

މާލޭގެ މޭޔަރުކަން އިދިކޮޅު ކެންޑިޑޭޓް ޑރ. މުހައްމަދު މުއިއްޒު ޔަގީން ކުރައްވާފައިވަނިކޮށް މިއަދު ބަލި ގަބޫލު ކުރެއްވުމަށް އެމްޑީޕީން ބޭއްވި ނޫސްވެރިންގެ ބައްދަލުވުމެއްގައި، ޕާޓީގެ އިސްވެރިން ފެއިލްވެއްޖެކަން ގަބޫލު ކުރައްވަންތޯ "އަދަދު" އިން ސުވާލު ކުރުމުން ތަފްސީލަށް ވަޑައިނުގެން ނަޝީދު ވަނީ އެކަން ގަބޫލު ކުރައްވާ ކަމަށް ވިދާޅުވެފަ އެވެ.

"އެމްޑީޕީގެ ލީޑަޝިޕް ތިޔަ ވިދާޅުވަނީ އަޅުގަނޑަށްތޯ ރައީސުލްޖުމްހޫރިއްޔާއަށްތޯ ނައިބު ރައީސަށްތޯ، ޗެއާޕާސަންއަށްތޯ، އަޅުގަނޑުމެން އެންމެން ވެސް މިކަމާ ޒިންމާވާންޖެހޭނެ. އަޅުގަނޑުމެން އެންމެންގެ އިހުމާލުން މި ޕާޓީގައި ނާކާމިޔާބީއެއް ވިއްޔާ ވާނީ. ކާމިޔާބެއް ވިއްޔާ ވާނީ އަޅުގަނޑުމެން އެންމެން އެކަމާ އުޅެގެން،" ނަޝީދު ވިދާޅުވި އެވެ.

އިންތިހާބުން ބަލިވުމުގެ ފަހަތުގައި އެމަނިކުފާނުގެ އަދި ރައީސް އިބްރާހިމް މުހައްމަދު ސޯލިހުގެ މައްސަލަ ވެސް އުޅުއްވާނެ ކަމަށް ނަޝީދު ވިދާޅުވި އެވެ.

"އަޅުގަނޑުމެން ޖެހޭނީ އިށީންދެފަ ބަލާލަން، ކިހިނެއްތޯ މި ވީ. އަޅުގަނޑުގެ ކުށަކީ ކޮބައިތޯ؟ ރައީސް ސޯލިހުގެ ކުށަކީ ކޮބައިތޯ؟ މިހާރު ކުށް، އަޅުގަނޑުމެން ދެ މީހުންގެ ތެރޭގައި އުޅެންޖެހޭނެ. އެއަކު އެއްވެސް ޝައްކެއް ނެތް. ދެން އަޅުގަނޑުމެންގެ ސިޔާސީ ހަޔާތް ވަޅުލާވަރުގެ ކުށެއްތޯ އެއީ. އެކަން ރާއްޖޭގެ ރައްޔިތުން ނިންމަމުން ގެންދާނެ،" ނަޝީދު ވިދާޅުވި އެވެ.

އެކަމަކު، އިންތިހާބުގެ ނަތީޖާގެ މާނަ އާއި ސަބަބުތައް އެނގޭނީ ފަހުން ކަމަށް ނަޝީދު ތަކުރާރުކޮށް ވިދާޅުވި އެވެ.

"ބަލިވާ ދުވަހު ވަރަށް ގިނަ އިނގިލި ދިށްވާނެ. ދެން އެކަމާ އަޅުގަނޑުމެން މަޑުމައިތިރިކަމާއެކު ވިސްނާލަންޖެހޭނީ، ކިހިނެއް ވެގެންތޯ އަޅުގަނޑުމެން އެދުނު ކާމިޔާބީ އަޅުގަނޑުމެންނަށް ނުލިބުނީ،" އެމަނިކުފާނު ވިދާޅުވި އެވެ.

ލޯކަލް ކައުންސިލްތަކުގެ އިންތިހާބުގައި އެމްޑީޕީގެ ފަރާތުން އެންޓި ކެމްޕެއިން ކުރެއްވި ކަމަށް ވެސް ނަޝީދު އިއުތިރާފްވެވަޑައިގެންނެވި އެވެ.

"އެންޓި ކެމްޕެއިން ކޮށްގެންތޯ އިލެކްޝަން ގެއްލުނީ، ގަބޫލެއް ނުކުރަން. ރަނގަޅަށް ނުކުރެވުނީ ކަމަށް ގަބޫލު ކުރެވެނީ ... އެންޓި ކެމްޕެއިން. ހާއްސަގޮތެއްގައި، މިސާލަކަށް ބައްލަވާ، އަޅުގަނޑުމެންނަކަށް ހަގީގަތުގައި ނުކެރޭ އެންޓި ކެމްޕެއިން ކުރާކަށް. ދެން އަޅުގަނޑު ވެސް ކޮންމެވެސް މިންވަރަކަށް އެއްޗެކޭ ބުނެލާފަ ވެސް އެއިގެ ފުންމިނަކަށް ނުދަން. ދެން އަޅުގަނޑުމެންގެ އެކްސްޕާޓުން ވެސް ފަހު ހަފުތާގައި ހަވާލުވެވަޑައިގެންނެވި. ދެން އެހެން ނަމަވެސް އަޅުގަނޑު ދަންނަވާނީ އަޅުގަނޑުމެންނަކަށް އެ މިންވަރަކަށް އެންޓި ކެމްޕެއިން ނުކުރެވެޔޭ ހަގީގަތުގައި،" ނަޝީދު ވިދާޅުވި އެވެ.

ކޮމެންޓް

ފަހުގެ ޚަބަރު

ލޯ ޑިގްރީ އިމްތިހާނަށް މާލެ އަންނާކަށް ނުޖެހޭނެ: ބާ ކައުންސިލް

ލޯ ޑިގްރީގެ އިމްތިހާނުތައް ހެދުމަށް މާލެއަށް ނުވަތަ ވަކި ހާއްސަ ރަށަކަށް ހާޒިރުވުން ލާޒިމު ނޫން ކަމަށާއި، ދަރިވަރުން ދިރިއުޅޭ ރަށެއްގެ ސްކޫލް ނުވަތަ ކައުންސިލް މެދުވެރިކޮށް އިމްތިހާނު ހެދޭނެ މަގު ބާ ކައުންސިލުން ފަހިކޮށްދީފިއެވެ. އަންނަ އަހަރުން ފެށިގެން އަމަލުކުރާ މި އުސޫލުގެ ދަށުން އިމްތިހާނު ހަދާ ގޮތަށް ބަދަލު އައި ނަމަވެސް، ކޯހުގެ މަންހަޖާއި ކިޔަވައިދޭ މުއްދަތަށް އެއްވެސް ބަދަލެއް ނާންނާނެއެވެ.

ތަރައްގީގެ އެއްވެސް ކަމެއް ކުރުމަށް ލާރިއެއް ނެތް: ޝާކިރު

އަންނަ އަހަރުގެ ބަޖެޓުގައި ރިކަރަންޓް ހަރަދަށް ކެނޑުމަށްފަހު ތަރައްގީގެ މަޝްރޫއުތަކަށް ފައިސާ ނެތް ކަމަށް ވިދާޅުވެ މެންބަރު އަހުމަދު ޝާކިރު ކަންބޮޑުވުން ފާޅުކުރައްވައިފިއެވެ. އޭނާ ވިދާޅުވީ ދައުލަތުގެ އާމްދަނީގެ ބޮޑުބައެއް ހަރަދުވަނީ ރިކަރަންޓް ކަންކަމަށް ކަމަށާއި، މަޝްރޫއުތައް ހިންގަން ޖެހެނީ އިތުރަށް ދަރަނި ނަގައިގެން ކަމަށެވެ. މީގެ އިތުރުން ސަރުކާރު ކުންފުނިތަކުން ބޮޑެތި ގެއްލުންވަމުންދާ ދިއުމަށްވެސް އޭނާ ވަނީ ފާޑުވިދާޅުވެފައެވެ.

"ސިޓިޒަންސް ކޮމްޕްލެއިންޓްސް" ލައުންޖުތަކެއް ގާއިމުކޮށްފި

ރައްޔިތުންގެ ޝަކުވާތަކާއި ކަންބޮޑުވުންތައް ސަރުކާރަށް ހުށަހެޅުމަށްޓަކައި މާލެ އާއި ހުޅުމާލޭގައި "ސިޓިޒަންސް ކޮމްޕްލެއިންޓްސް" ބިއުރޯގެ ދެ ލައުންޖެއް މިއަދު ވަނީ ހުޅުވައިފައެވެ. ސަރުކާރު ބަންދު ނޫން ކޮންމެ ދުވަހަކު ޚިދުމަތް ދޭ މި އޮފީސްތަކަކީ ރައީސުލްޖުމްހޫރިއްޔާގެ އޮފީހުގެ ދަށުން ހިންގާ، ރައްޔިތުންގެ މައްސަލަތަކަށް ހައްލު ހޯދައިދިނުމަށް ގާއިމުކުރި ތަންތަނެވެ.

ރިއަލް އެސްޓޭޓު ބިލު މަޖިލީހަށް ބަލައިގަނެފި

މި ބިލު ބަލައިގަންނަން ވޯޓު ދިނީ 42 މެންބަރުން. ބިލާ ދެކޮޅަށް ވޯޓު ދެއްވީ އެމްޑީޕީގެ 13 މެންބަރުން. މި ބިލު ދިރާސާކުރާނީ ގައުމީ ތަރައްގީ އާއި ތަރިކައިގެ ކޮމިޓީން. މިއީ ގާނޫނުއަސާސީގެ ހިމާޔަތްތައް ނައްތާލައި، ތާއަބަދަށް ނުވަތަ ހުސްނުވާ ގޮތަށް ބޭރު މީހުންނަށް ބިން މިލްކުކުރެވޭނެ ގޮތް ހެދުމަށް އިންތިޒާމުތަކެއް ހިމަނާފައިވާ ބިލެއް

ބޮޑެތި ޖޫރިމަނާތަކެއް ހިމަނާފައިވާ އަބުރުގެ ބިލު ކޮމިޓީއަށް

ސޯޝަލް މީޑިއާގައި މީހެއްގެ އަބުރާ ބެހޭ ފަދަ ޕޯސްޓެއް ހިއްސާކޮށްފިނަމަ 5 ލައްކަ ރުފިޔާއާ ހަމައަށް ޖޫރިމަނާ ކުރެވޭ ގޮތަށް ހުށަހެޅި އަބުރުގެ ބިލު މަޖިލީހަށް ބަލައިގަނެ ކޮމިޓީއަށް ފޮނުވައިފިއެވެ. މި ބިލުގައި ބަހާއި، ފޮޓޯއާއި، އިޝާރާތް އަދި ފިލްމު ފަދަ ވަސީލަތްތައް މެދުވެރިކޮށް އަބުރާ ބެހުމުގެ ދައުވާ ކުރެވޭނެ ގޮތްތައް ބަޔާންކޮށްފައިވެއެވެ.

މަރުގެ އަދަބު ތަންފީޒު ކުރާ ބިލު ބަލައިގެންފި

ދަންޖައްސައިގެން މަރުގެ އަދަބު ތަންފީޒުކުރާ ގޮތަށް ސަރުކާރުން ހުށަހެޅި ބިލު ރައްޔިތުންގެ މަޖިލީހަށް މިއަދު ބަލައިގެންފިއެވެ. މި ބިލުގައި މަރުގެ އަދަބު ތަންފީޒުކުރާނެ ގޮތާއި، އެކަން ހިންގާނެ ޕެނަލެއް އެކުލަވާލުމުގެ އިތުރުން، ބަލިވެއިނުމާއި ދަރިފުޅަށް ދެ އަހަރު ފުރުން ފަދަ އަދަބު ތަންފީޒުނުކުރެވޭނެ ހާލަތްތައް ބަޔާންކޮށްފައިވެއެވެ.

ތިން ކުންފުންޏެއްގެ މަނީ އެކްސްޗޭންޖު ލައިސަންސް ބާތިލްކޮށްފި

މަނީ ޗޭންޖިން ގަވާއިދާ ތަކުރާރުކޮށް ހިލާފުވި ތިން ކުންފުންޏެއްގެ ލައިސަންސް އެމްއެމްއޭ އިން ބާތިލުކޮށް، އެ ކުންފުނިތައް ބޮޑެތި އަދަދުތަކުން ޖޫރިމަނާކޮށްފިއެވެ. މި ފިޔަވަޅަކީ ބޭރު ފައިސާގެ ބާޒާރު ކޮންޓްރޯލްކޮށް، ގަވާއިދާ ހިލާފު މުއާމަލާތްތައް ހުއްޓުވުމަށް އެމްއެމްއޭ އިން ކުރަމުންދާ މަސައްކަތުގެ ތެރެއިން އެޅި ފިޔަވަޅެކެވެ.

Newsletter

Get the latest news delivered straight to your inbox