ލޯކަލް ކައުންސިލް އިންތިހާބުން ރައްޔިތުންގެ އިހުސާސްތައް އެނގިއްޖެ ކަމަށާއި އެކަން ބަލައިގަނެ ކުރިއަށް ދާނެ ކަމުގެ ޔަގީންކަން ސަރުކާރުން ދީފި އެވެ.
ލޯކަލް ކައުންސިލް އިންތިހާބުގައި ނުކުތް ތަފާތު ނަތީޖާއާއެކު، ރައީސް އޮފީހުން އާންމުކުރި ސަރުކާރުގެ ނޫސް ބަޔާނެއްގައި ބުނީ، އިންތިހާބުގައި ރައްޔިތުން ލީ ވޯޓާއި، ރައްޔިތުންގެ އިހުސާސްތައް ފުރިހަމައަށް ސަރުކާރުން ބަލައިގަނެ، އަދި، ރައްޔިތުންގެ ވިންދާ އެއްގޮތަށް ސަރުކާރުގެ ހިންގުން ކުރިއަށް ގެންދާނެކަމުގެ ފުރިހަމަ ޔަގީންކަން އަރުވާ ކަމަށެވެ.
ކުރު ދެ ޕެރެގްރާފްގެ އެ ބަޔާނުގައި އިތުރަށް ބުނެފައިވަނީ އިންތިހާބުވި ފަރާތްތަކުގެ އެއްބާރުލުން ލާމަރުކަޒީ ނިޒާމް ފުރިހަމަ ގޮތުގައި ހިންގުމަށް ލިބޭނެ ކަމަށް އުއްމީދު ކުރައްވާ ކަމާއި އިންތިހާބުވި އެންމެންނަށް މަރުހަބާ ކިޔާ ކަމަށެވެ.
އިއްޔެ، ކުރިއަށް ދިޔަ އިންތިހާބުގައި ސަރުކާރު ހިންގާ، އެމްޑީޕީއަށް ވަނީ މާލޭ ސިޓީން ބޮޑު ނާކާމިޔާބީއަކާ ކުރިމަތިވެފަ އެވެ. އެންމެ ވާދަވެރިކަން އޮތް މާލޭގެ މޭޔަރު ކަމުގެ މަގާމަށް އިންތިހާބުވެފައިވަނީ ޕީޕީއެމްގެ ކެންޑިޑޭޓް، ކުރީގެ ހައުސިން މިނިސްޓަރު މުހައްމަދު މުއިއްޒެވެ. ނަމަވެސް މާލޭން ވޯޓުލާން ނުކުތް މީހުންގެ ނިސްބަތް މަދެވެ.
އެމްޑީޕީއަށް އަނެއް ތިން ސިޓީގެ މޭޔަރުކަން ޔަގީން ކުރެވިފައިވީ ނަމަވެސް އައްޑޫ ސިޓީގެ ސުޕަ މެޖޯރިޓީ ވެސް ގެއްލުނެވެ. އެ ޕާޓީގެ ސަޕޯޓް ބޮޑު އެހެން ބައެއް ރަށްރަށުން ވެސް ވަނީ އެމްޑީޕީއަށް މިފަހަރު ތާއިދު ކުޑަވެފަ އެވެ. ނަމަވެސް ޖުމްލަކޮށް ބަލާނަމަ، އެންމެ ގިނަ ގޮނޑި ކާމިޔާބުކޮށްފައިވަނީ އެމްޑީޕީއިންނެވެ.
ރައީސް އިބްރާހިމް މުހައްމަދު ސޯލިހު، ރޭ ވަނީ އިންތިހާބު ކާމިޔާބު ކުރެއްވި މޭޔަރުންނަށް ގުޅުއްވައި މަރުހަބާ ވިދާޅުވެފަ އެވެ. ނަމަވެސް އިންތިހާބަށްފަހު ރައީސް އަދި އާންމުކޮށް އެއްޗެއް ވިދާޅެއް ނުވެ އެވެ.
ނަމަވެސް، އެމްޑީޕީގެ ރައީސް މުހައްމަދު ނަޝީދު ވަނީ މާލޭން އިންތިހާބު ނާކާމިޔާބުވުމުގައި އެ ޕާޓީގެ ލީޑަޝިޕް އޮތް ކަމަށް ވިދާޅުވެ، އެކަމުގެ ޒިންމާ ނަންގަވާފަ އެވެ.
