ކުރިން ބޭއްވި ހުރިހާ ލޯކަލް ކައުންސިލްތަކުގެ އިންތިހާބުގައި އެމްޑީޕީއަށް މެޖޯރިޓީ ލިބުނު ބޮޑެތި ރަށްތަކުގެ ކޮންޓްރޯލް މިފަހަރުގެ އިންތިހާބުގައި އެމްޑީޕީއަށް ގެއްލިއްޖެ އެވެ.
ރާއްޖޭގެ އެންމެ އުތުރުން ހއ. ދިއްދޫ އާއި އިހަވަންދޫގެ އިތުރުން ގދ. ތިނަދޫގައި މީގެ ކުރިން ބޭއްވި ހުރިހާ ކައުންސިލްތަކެއްގެ އިންތިހާބުގެ މެޖޯރިޓީ ނަގަނީ އެމްޑީޕީންނެވެ. އެ ދާއިރާތަކުގައި މިހާރު ތިބި ހުރިހާ ކައުންސިލަރުންނާއި މަޖިލިސް މެމްބަރު ވެސް ނިސްބަތްވަނީ އެމްޑީޕީއަށެވެ.
ނަމަވެސް އިއްޔެ ބޭއްވި ލޯކަލް ކައުންސިލް އިންތިހާބުގެ ނަތީޖާ ކުރީ ފަހަރުތަކާ އަޅާބަލާއިރު ވަރަށް ބޮޑުތަން ތަފާތެވެ.
އިހަވަންދޫގެ ވަގުތީ ނަތީޖާއަށް ބަލާއިރު އެ ރަށަށް އިންތިހާބު ކުރާ ހަތް ކައުންސިލަރުންގެ ތެރެއިން އެމްޑީޕީއަށް ލިބެނީ އެންމެ ގޮނޑިއެކެވެ. އެހެން ހުރިހާ ގޮނޑިއެއް ކާމިޔާބު ކުރީ އިދިކޮޅު ޕީޕީއެމުންނެވެ. އޭގެ ތެރޭގައި އެރަށު ކައުންސިލްގެ ރައީސްކަން ވެސް ހިމެނެ އެވެ.
މީގެ ކުރިން އެމްޑީޕީއިން ހުރިހާ އިންތިހާބެއް ކާމިޔާބު ކުރާ ދިއްދޫ ކައުންސިލްގެ ވެސް ދެ ގޮނޑި އިދިކޮޅު ޕީޕީއެމުން ކާމިޔާބު ކުރާ ކަމަށް ވަގުތީ ނަތީޖާއިން ދަށްކަ އެވެ. އޭގެ ތެރޭގައި އެ ރަށު ކައުންސިލްގެ ރައީސްކަން ވެސް ހިމެނެ އެވެ. ބާކީހުރި ފަސް ގޮނޑި ލިބެނީ އެމްޑީޕީއަށެވެ.
އެމްޑިޕީގެ ސަޕޯޓް ބޮޑު ހއ. އަތޮޅު ކައުންސިލްގެ ގޮނޑިވެސް އެމްޑީޕީއާ ވާދަކޮށް ކާމިޔާބު ކުރީ ޕީޕީއެމުންނެވެ.
ގދ. ތިނަދޫގައި މީގެ ކުރިން ބޭއްވި ހުރިހާ ލޯކަލް ކައުންސިލެއްގެ ފުލް މެޖޯރިޓީ އޮތީ އެމްޑީޕީއަށެވެ. ނަމަވެސް މިފަހަރު އެ ރަށު ކައުންސިލަށް އިންތިހާބު ކުރި ހަތް މެމްބަރުންގެ ތެރެއިން ތިން ގޮނޑިއެއް އިދިކޮޅު ޕީޕީއެމުން ވަނީ ކާމިޔާބު ކޮށްފަ އެވެ. މިއީ އެ ރަށު ކައުންސިލްގެ ގޮނޑިއެއް އެމްޑީޕީ ނޫން ބަޔަކަށް ލިބުނު ފުރަތަމަ ފަހަރެވެ.
އެމްޑީޕީގެ ސުޕަ މެޖޯރިޓީ އޮތް މާލޭ ސިޓީ އާއި އައްޑޫ ސިޓީގެ ކޮންޓްރޯލް ވެސް މިފަހަރުގެ އިންތިހާބުގައި އެމްޑީޕީއަށް ވަނީ ގެއްލިފަ އެވެ. އެމްޑީޕީގެ ސަޕޯޓް ބޮޑު މާލޭގެ މޭޔަރަކަށް ވެސް އިންތިހާބުވީ އިދިކޮޅު ކޯލިޝަންގެ ކެންޑިޑޭޓް ޑރ. މުހައްމަދު މުއިއްޒެވެ.
ފުވައްމުލަކު ސިޓީ އާއި ކުޅުދުއްފުށީ ސިޓީގެ މެޖޯރިޓީއާއި މޭޔަރުކަން ކާމިޔާބު ކުރީ އެމްޑީޕީންނެވެ.
